LEVÍTICO 5
5
1Pipas testigananpaq waqyasqa kaspa rikuq kashaspa otaq yachaq kashaspa mana chayta willakunqachu chayqa, paymi huchachasqa kanqa.
2Pipas mana yachaspa ima qhelli kaqtapas tupaykuqqa, salqa uywa wañusqapas kachun, animal wañusqapas kachun, mach'aqway wañusqapas kachun, payqa qhellin kanqa, huchayoqmi rikhurinqa.
3Pipas mana yachaspa runaq ima qhellintapas tupaykunqa, chaymantañataq yachanqa chayqa, huchayoqmi rikhurinqa.
4Pipas mana yachaspa allinpaqpas mana allinpaqpas hawan ukhunta imapipas juranqa, chaymantañataq chayta yachanqa chayqa, huchayoqmi rikhurinqa.
5Pipas chaykunapi huchallikuqqa huchallikusqantan willakunqa. 6Huchallikusqanmanta paganatataqmi Señor Diosman apamunqa malta ovejatapas china cabratapas huchan pampachaypaq ofrenda kananpaq. Sacerdotetaq chayta haywanqa huchallikusqanmanta pampachanapaq.
7Manataq malta ovejamanpas cabramanpas aypanqachu chayqa, huchallikusqanmanta paganatan Señor Diosman apamunqa iskay kullkuta, mana chayqa iskay urpi malqotapas. Hukninmi hucha pampachaypaq kanqa, huknintaq ruphachina ofrendapaq. 8Sacerdotemanmi chaykunata apamunqa, paymi hucha pampachaypaq kaqtaraq haywanqa. Kunkantan q'ewinqa, ichaqa manan umanta p'itirparinqachu, 9yawarnintataq altar qhataman ch'aqchuykunqa. Yawar puchutataq altar qhataman sut'uchinqa. Chayqa hucha pampachaypaq ofrendan. 10Hukkaqtataqmi kamachisqaman hinapuni ruphachinqa. Chay hinatan sacerdoteqa chay huchallikuqpa huchan pampachaypaq haywanqa, hinan pampachasqa kapunqa.
11Manataq iskay kullkumanpas iskay urpi malqomanpas aypanqachu chayqa, huchallikuqmi huchan pampachaypaq huk kilo hina ñut'u hak'u ofrendata apamunqa. Manan chaymanqa aceitetapas inciensotapas yapaykunqachu, hucha pampachaypaq ofrenda kasqanrayku. 12Chaytan sacerdoteman apamunqa, sacerdotetaq chaymanta huk hapt'ayta hoqarinqa llapallanta Señor Diosman apamusqa kasqanta rikuchinapaq, hinaspan chayta altarpi ruphachinqa Señor Diospaq mikhuna ofrendakuna patapi. Chayqa hucha pampachaypaq ofrendan. 13Chhaynatan sacerdoteqa chay hina hucha pampachaypaq sacrificiota haywanqa, hinan pampachasqa kapunqa. Puchuq ofrendataqmi sacerdotepaq kanqa, ruru ofrenda hina, nispayki, nispa.
Kutichipunapaq ofrendakuna
14Señor Diosmi Moisesta nirqan: 15—Pipas mana yachaspa huchallikunqa ñoqapaq apamunakunata mana apamuspa chayqa, ñoqamanmi kutichipuna ofrendata apamuwanqa mana imanasqa anejotapas orqo cabratapas. Hayk'achus valesqanqa yupaychana karpa qolqepi chaninchasqan kanqa. 16Ñoqapaq apamunakunata hap'ikapusqantan kutichipunqa, chaymantaqmi phisqamanta hukninta yapaykunqa, hinaspan chayta sacerdoteman qonqa. Sacerdotetaq chay runaq huchan pampachaypaq kutichipuna ofrenda animalta haywawanqa, hinan pampachasqa kapunqa.
17Hinallataq pipas mana yachaspa huchallikunqa, mayqen kamachikusqaytapas p'akinqa chayqa, huchayoqmi rikhurinqa, pagapunqataqmi. 18Chaymi kutichipuna ofrendata sacerdoteman apamunqa mana imanasqa anejotapas orqo cabratapas. Hayk'achus valesqanqa yupaychana karpa qolqepi chaninchasqan kanqa. Sacerdotetaqmi huchan pampachaypaq haywawanqa mana yachaspa pantasqanmanta, hinan pampachasqa kapunqa. 19Chayqa kutichipuna ofrendan, ñoqa contra huchallikusqapaq kutichipuna, nispa.
Currently Selected:
LEVÍTICO 5: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
