LEVÍTICO 24
24
Lamparachakunapaq aceite
(Ex 27.20-21)
1Señor Diosmi Moisesta nirqan: 2—Israel runakunata kamachiy olivo ruru kutasqa ch'uya aceiteta k'anchapaq apamunasuykikupaq, lamparachakuna k'anchashanallanpaq. 3Ñoqawan Tupana Karpapin Aaronqa lamparachakunata tutantin qhawanqa kamachikuy simi p'alta rumiyoq cajaq ñawpaqen cortinaq hawa ladonpi. Chayqa wiñaypaq kamachikuy simin miray-mirayniykichispaq kanqa. 4Aaronmi ñoqa Señor Diospa ñawpaqeypi kashaq ch'uya qori candelero patapi lamparachakunata qhawashallanqapuni.
Diospa ñawpaqenpi churana t'anta
5Ñut'u hak'umantan chunka iskayniyoq t'antata masanki, sapanka t'antan iskay kilo kanqa. 6Chaykunatan ñawpaqey ch'uya mesa patapi iskay tawqata churanki, sapanka tawqapi soqtata. 7Sapanka tawqamanmi churanki ch'uya inciensota, llapallanta ñoqa Señor Diosman apamuwasqa kasqanta rikuchinapaq, chayqa ñoqapaq mikhuna ofrendan. 8Sapa samana p'unchaymi Israel runakunaq sutinpi ñoqa Señor Diospa ñawpaqeypi churanqa, chayqa wiñaypaq rimanakuymi. 9Aaronpaq churinkunapaqwanmi chay t'antakunaqa kanqa. Chay t'antakuna ancha ch'uya kasqanrayku karpaq ch'uya kanchanpi mikhunqaku. Ñoqa Señor Diospaq mikhuna ofrendakunamantaqa chay t'antakunan Aaronman tupallanqapuni, nispa.
Diosta k'amiqkunata muchuchina
10-11Israel runakunawanmi huk runa tiyarqan, mamanmi karqan Dan ayllumanta Dibriq ususin Selomit sutiyoq, taytantaq Egipto runa karqan. Huk p'unchaymi payqa Israel runawan karpa-karpapi maqanakurqan. Hinaspan millayta rimaspa Señor Diospa sutinta ñakarqan, chaymi payta Moisesman aparqanku. 12Hinaspan presota wisq'arqanku Señor Diospa paykunapaq chayta sut'inchanankama.
13Hinaqtinmi Señor Diosqa Moisesta nirqan: 14—Chay pisichawaqniyta karpa-karpamanta horqoy, llapa payta uyariqkunataq umanman makinkuta churaykuchunku, hinaspa llapalla payta rumiwan ch'aqechunku. 15Israel runakunatataq ninki: Pipas Diosninta ñakaqqa, huchanmantan muchunqa. 16Pipas Señor Diospa sutinta pisichaqqa, wañuchisqan kanqa, llapallanmi payta ch'aqenqa. Llaqtayoqpas wak llaqtayoqpas kachun, Señor Diosta k'aminqa chayqa, wañuchisqapunin kanqa.
17Pipas mayqen runatapas wañuchiqqa wañuchisqallataqmi kanqa. 18Pipas ima animaltapas wañuchiqqa huktan sayachipunqa, animalmanta animalta.
19Pipas runamasinta k'iriqqa, imaynatachus k'irirqan chay hinallataqmi paypas k'irisqa kanqa: 20p'akisqamanta p'akisqa, ñawimanta ñawi, kirumanta kiru. Imaynatachus hukkaqta k'irirqan chay hinallataqmi paypas k'irisqa kanqa. 21Ima animaltapas wañuchiqqa huktan sayachipunqa, runata wañuchiqmi ichaqa wañuchisqa kanqa.
22Huk kamachikuy simillatan hap'inkichis wak llaqtayoqpaqpas llaqta-masiykichispaqpas. Ñoqaqa Apu Señor Diosniykichismi kani, nispayki, nispa.
23Hinan Moisesqa Israel runakunaman willarqan, chaymi paykunaqa chay millay rimaqta karpa-karpamanta horqospa rumiwan ch'aqerqanku. Israel runakunaqa ruwarqanku Señor Diospa Moisesta kamachisqanman hinan.
Currently Selected:
LEVÍTICO 24: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
