LEVÍTICO 25
25
Samana wata
1Señor Diosmi Moisesta Sinaí orqopi nirqan: 2—Israel runakunata nimuy: Señor Diosmi nin:
Qankunaman qonay hallp'aman haykuqtiykichisqa, chakraqa ñoqa Señor Diosta yupaychawanapaqmi samanqa. 3Soqta watan chakraykita tarpunki, soqta watataqmi uvas chakraykitapas k'allmananki, hinaspa rurusqantapas hoqarinki. 4Qanchiskaq watapitaqmi chakraqa ñoqa Señor Diosta yupaychawanapaq samanqa. Aman chakraykita tarpunkichu, amallataq uvas chakraykitapas k'allmanankichu. 5Chakraykipi k'ipataqa aman cosechankichu, uvas chakraykipi k'ipa uvastapas aman pallankichu. Samana watan chakrakunapaqqa kanqa. 6Chakraq samana watapi rurusqantaqa mikhunkin, mikhullanqataqmi qhari kamachiykipas, warmi kamachiykipas, uywasqaykipas, qanwan kuska tiyaq wak llaqtayoqpas, 7uywaykipas, hallp'aykipi kaq salqa animalpas. Chakraq imapas rurusqanqa mikhunapaqmi kanqa.
Kacharipuna wata
8Qanchis kuti qanchis watatan yupanki, chhaynapin qanchis wata qanchisqa tawa chunka isqonniyoq wata kanqa. 9Hinan qanchiskaq killaq chunkakaq p'unchayninpi Hucha Pampachay P'unchaypi hinantin suyuykichispi waqrata tocankichis. 10Phisqa chunkakaq watatan ñoqa Señor Diospaq t'aqankichis, hinaspan suyuntinpi llapa tiyaqkunapaq kacharisqa-kayta willankichis. Chay wataqa kacharipuna watan kanqa, sapankaykichismi chakraykichista hap'ikapunkichis, sapanka kamachitaq familianman kutipunqa. 11Phisqa chunkakaq wataqa kacharipunaykichispaqmi kanqa. Aman tarpunkichischu, amallataq k'ipakunatapas pallankichischu, amallataq mana k'allmanasqa uvas chakraykichistapas pallankichischu. 12Qankunapaqqa chay wataqa ch'uyan kanqa. Chakraq kikillan rurusqantan mikhunkichis.
13Chay kacharipuna watapiqa sapankaykichismi chakraykichista hap'ikapunkichis. 14Runa-masiykichismanchus imatapas vendenkichis, otaq paymanta imatapas rantinkichis chayqa, ama pipas wawqenta q'otuchunchu. 15Runa-masiykimantachus rantinki chayqa, hamuq kacharipuna watapaq hayk'a wataraqchus kananta yupanki, chaymi payqa vendesunki hayk'a watatachus cosechawaq chayman hina. 16Askha watapaq kanqa chayqa, askha qolqewanmi rantinki, pisi watallapaq kanqa chayqa, pisi qolqellawanmi rantinki, hayk'a cosechachus kanantan rantishanki. 17Aman mayqenniykichispas runa-masiykichista q'otunkichischu, aswanpas ñoqa Diosniykichistan manchakuwankichis. Ñoqaqa Apu Señor Diosniykichismi kani.
18Hunt'aychis unanchayniy simikunatapas kamachikuyniykunatapas, hinan mana llakipakuspa chay suyupi tiyankichis. 19Hallp'ataq ruruchinqa, hinan saksanaykichiskama mikhunkichis, chaypitaqmi mana llakipakuspa tiyankichis. 20Ninkichistaqchus: ¿Imatan qanchiskaq watapi mikhusun? Manataq tarpusunchu, manallataq cosechasunpaschu, nispaykichis chayqa, 21ñoqan soqtakaq watapi saminchamusqaykichis, chaymi hallp'aqa kinsa watapaq rurupusunkichis. 22Pusaqkaq watapi tarpushaspaykichispas, ñawpaqkaq mikhunataraqmi mikhushankichis isqonkaq watakama, rurunankaman ñawpaqkaqta mikhunkichis.
23Manan hallp'aqa wiñaypaqchu vendekunqa, hallp'aqa ñoqaqmi, qankunaqa wak llaqtayoqmi tiyapakuqmi hallp'aypi kashankichis. 24Chayraykun tukuy hap'isqaykichis hallp'ata hallp'ayoqpa horqokapunanta ama hark'akunkichischu.
25Wawqeykichus wakchayapun, hinaspa hallp'anta vendenqa chayqa, sispa ayllunmi hamuspa wawqenpa vendesqanta rantipanan. 26Manataq sispa ayllun kanqachu, ichaqa hallp'ayoqchus rantipananpaq hunt'asqata huñunqa chayqa, 27hayk'a watañachus vendesqan pasasqantan yupanqa. Hinaspan rantiqninpaq hayk'a wataraqchus kacharipuna watakama qhepasqanmanta kutichipuspa hallp'anta hap'ikapunqa. 28Manataq rantipananpaq taripaqtinqa, vendesqanta rantikuqmi kacharipuna watakama hap'inqa. Kacharipuna watapitaqmi kacharisqa kapunqa, hinan vendeqqa hallp'anta hap'ikapunqa.
29Pipas tiyana wasita muyuriq perqayoq llaqtapi vendenqa chayqa, huk watakaman wasinta horqokapuyta atinqa. Watantinmi horqokapunanpaq kanqa. 30Manataq watantin ukhupi horqosqachu kanqa chayqa, chay wasitaqa rantikuqmi wiñaypaq hap'ikapunqa, mirayninkunapaqwan. Manan kacharipuna watapiqa kacharisqachu kanqa. 31Mana muyuriq perqayoq llaqta wasikunan ichaqa campo chakrakuna hina rikusqa kanqa. Atikunmi horqokapunapaq, kacharipuna watapitaqmi kacharisqa kapunqa.
32Leví runakunaqa ima tiempopipas atinkun llaqtankupi wasinkuta horqokapuyta. 33Pipas Leví runakunaq llaqtanpi wasita rantiqqa kacharipuna watapin rantisqan wasita kacharipunqa, Leví runakunaq llaqtankupi wasikunaqa Israel runakuna ukhupi paykunaq kasqanrayku. 34Ichaqa llaqtanku muyuriq uywa michina hallp'akunaqa manan hayk'aqpas vendekunqachu, wiñaypaq paykunaq kasqanrayku.
35Llaqta-masiykichus wakchayapuspa kawsananpaq manaña kanchu chayqa, qanqa yanapaykunkin wak llaqtayoqta hina tiyapakuqta hina, qayllaykipipas tiyachillankitaqmi. 36Mañaspaykiqa aman paymanta uñantapas wachaynintapas chaskinkichu, aswanpas ñoqa Diosniykitan manchakuwanki, llaqta-masiykitapas qayllaykipin tiyachillankitaq. 37Aman qolqeykita uñayoqpaq manunkichu, amallataq mikhunaykitapas hayk'apichus vendenamanta aswanmanqa vendenkichu. 38Ñoqaqa Apu Señor Diosniykichismi kani. Diosniykichis kanaypaqmi Canaán suyuta qankunaman qonaypaqwan Egipto suyumanta horqomurqaykichis.
39Qanwan kashaspachus, llaqtamasiyki wakchayapunqa, hinaspa qanman vendekapusunki chayqa, aman paytaqa rantisqata hina llank'achinkichu. 40Llank'apakuqta hinan, wak llaqtayoqta hinan paytaqa hap'inki, kacharipuna watakamataq servisunki. 41Hinaspan wasiykimanta kacharisqa lloqsipunqa, ayllunmanpas kutipunqa, hinallataq tayta-mamanpa hallp'anmanpas kutiykapunqa. 42Paykunaqa Egipto suyumanta horqokamusqay kamachiykunan, manan rantisqakuna hinachu vendesqa kanqaku. 43Aman paytaqa muchuchinkichu, aswanpas ñoqa Diosniykitan manchakuwanki.
44Muyuriqniykichispi tiyaq suyukunamantan qhari kamachikunatapas warmi kamachikunatapas rantikuyta atinkichis. 45Atillankichistaqmi rantiyta qankuna ukhupi tiyaq wak llaqtayoqkunata suyuykichispi naceq wawankutapas. Paykunan kaqniykichis kayta atin. 46Paykunatan wawaykichiskunapaqpas herenciata saqeyta atinkichis. Paykunan kamachiykichisqa wañunankama kanqa. Ichaqa Israel runa llaqta-masiykichiskunataqa aman muchuchinkichischu.
47Qayllaykipi tiyaq wak llaqtayoqchus qhapaqyapunqa, paypa qayllanpi kaq wawqeykitaq wakchayapunqa, hinaspa chay wak llaqtayoqmanpas, mayqen ayllunmanpas pay kikinta vendekapunqa chayqa, 48vendesqa kasqanmantañapas rescatasqa-kayta atinmi. Huknin wawqenmi payta rescatanman. 49Paytaqa rescatanmanmi tionpas, primonpas, ayllun ukhupi mayqen sispa parientenpas. Allintataqchus gananqa chayqa, pay kikinmi rescatakunman. 50Rantiqninwanmi yupanqa payman vendesqa kasqan watamantapacha kacharipuna watakama. Hayk'atachus pagananqa chaninchakunqa hayk'a watañachus llank'asqanman hina, llank'apakuqpa llank'asqanman hina. 51Askha wataraq kaqtinpas, chaykunaman hinan rescatasqa kananpaq vendekusqan qolqeta kutichipunqa. 52Kacharipuna watakamataqchus pisi watalla qhepanqa chayqa, paywanmi hayk'ataraqchus paganantaqa chaninchanqa, hinaspan hayk'a wataraqchus qhepananman hina kutichipunqa.
53Sapa wata llank'apakuqta hinan paytaqa rikunki, aman paytaqa muchuchinkichu.
54Manataq chay watakunapi rescatasqachu kanqa chayqa, payqa churinkunawan kuskan kacharipuna watapi kacharisqa kapunqa. 55Israel runakunaqa serviwaqniykunan, Egipto suyumanta horqomusqay kamachiykunan. Ñoqaqa Apu Señor Diosniykichismi kani.
Currently Selected:
LEVÍTICO 25: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
