LEVÍTICO 23
23
Watapi fiestakuna
(Núm 28.16-25)
1Señor Diosmi Moisesta nirqan: 2—Israel runakunata nimuy: Señor Diosmi nin:
Fiestaykunaqa yupaychanapaq huñunakuy p'unchaykunan. Kay hinan kanqa:
Samana p'unchay
3Soqta p'unchaymi llank'akunkichis, qanchiskaq p'unchaymi ichaqa samana kanqa, yupaychanapaq huñunakuna p'unchay, aman imatapas llank'ankichischu. Ñoqa Señor Diospaq samana p'unchaymi kanqa maypiña tiyankichis chaypas.
Alqaspa Pasarpariy Fiesta Mana Qonchuyoq T'anta Fiestapiwan
4Kay fiestaykunamanta yupaychanapaq huñunakuykunamanta tiemponpipuni willachinkichis.
5Ñawpaqkaq killaq chunka tawayoq p'unchayninpi rasphiyaykuyta ñoqa Señor Diospaq Alqaspa Pasarpariy Fiestay qallarinqa.
6Chay killaq chunka phisqayoq p'unchayninpitaq ñoqa Señor Diospaq Mana Qonchuyoq T'anta Fiestay qallarinqa. Qanchis p'unchaymi mana qonchuyoq t'antata mikhunkichis. 7Ñawpaqkaq p'unchayqa yupaychanapaq huñunakuyniykichismi kanqa, aman imatapas llank'ankichischu. 8Qanchis p'unchaymi mikhuna ofrendata ñoqa Señor Diosman haywawankichis. Qanchiskaq p'unchaypitaqmi yupaychanapaq huñunakuy kanqa, aman imatapas llank'ankichischu, nispa, nispayki.
Ñawpaqkaq cosecha
(Núm 28.26-31)
9Señor Diosmi Moisesta nirqan: 10—Israel runakunata nimuy: Señor Diosmi nin:
Ñoqaq qonay hallp'aman haykuspaykichis cosechaspaykichisqa, sacerdotemanmi huk marq'ay ichhusqaykichis ñawpaqkaq ruruta apamunkichis. 11Sacerdotetaqmi chay marq'ay ichhumusqata ñoqa Señor Diosman t'aqasqata haywawanqa allinta qankunata qhawarinaypaq. Samana p'unchay qhepatan chay t'aqasqata haywawanqa. 12Chay marq'ay ichhumusqata haywawasqaykichis p'unchaypin mana imanasqa watayoq borregota ruphachina sacrificiota ñoqa Señor Diosman haywawankichis. 13Haywallawankichistaqmi ruru ofrendatapas, huk litro vinotapas, aceitewan chapusqa iskay kilo ñut'u hak'utapas, chayqa ñoqa Señor Diospaq mikhuna ofrendan kanqa, q'apayninmi sonqoyman chayanqa. 14Aman mikhunkichischu t'antatapas, hank'asqa rurutapas, qholla rurutapas, ñoqa Diosniykichisman chaykunata haywawanaykichis p'unchaykama. Wiñaypaq kamachikuy simin chayqa kanqa miray-mirayniykichispaq maypiña tiyasqaykichispipas.
Cosecha Fiesta
15Samana p'unchaypa paqarisnin p'unchaymantapacha, marq'ay ichhumusqata haywawasqaykichismantan qanchis semana hunt'ata yupankichis. 16Qanchiskaq samana p'unchaypaq paqarisninkama phisqa chunka p'unchayta yupankichis, chayllaraq cosechasqa trigo ofrendata ñoqa Señor Diosman haywawankichis. 17Wasiykichismantan iskay t'antata ñoqapaq t'aqanapaq apamunkichis, chayqa qonchuyoq chapusqa iskay kilo ñut'u hak'umantan kanqa, ñoqapaq ñawpaqkaq ruru ofrenda kananpaq. 18T'antatawanmi qanchis mana imanasqa borregota watayoqtakama haywawankichis, huk torillota, iskay anejotawan. Chaykunaqa ñoqa Señor Diosman ruphachina sacrificion kanqa. Haywallawankichistaqmi ruru ofrendatapas vino ofrendatapas, chayqa ñoqa Señor Diospaq mikhuna ofrendan, q'apayninmi sonqoyman chayanqa.
19Haywallawankichistaqmi hucha pampachaypaq huk orqo cabratapas, watayoqtakama iskay borregotataq sumaq kawsay ofrendapaq. 20Sacerdotetaq chaykunata t'aqasqa ofrendata ñoqa Señor Diosman haywawanqa, ñawpaqkaq ruru t'antatawan iskaynin borregotawan. Chaykunaqa ñoqa Señor Diospaq t'aqasqan, sacerdotekunapaqmi kanqa.
21Chay p'unchayllapitaqmi yupaychanaykichispaq huñunakunkichis, aman chaypiqa imatapas llank'ankichischu. Wiñaypaq kamachikuy simin chayqa kanqa miray-mirayniykichispaq maypiña tiyasqaykichispipas.
22Chakraykichista ichhuspaykichisqa aman chakraq cantonkamachu ichhunkichis, amallataq ichhusqaykichistapas qhellankichischu. Chaytaqa wakchakunapaqmi wak llaqtayoqkunapaqwan saqenkichis. Ñoqaqa Apu Señor Diosniykichismi kani, nispa, nispayki.
Waqra Tocana Fiesta
(Núm 29.1-6)
23Señor Diosmi Moisesta nirqan: 24—Israel runakunata nimuy: Señor Diosmi nin:
Qanchiskaq killaq qallariynin p'unchayqa samanaykichis hatun p'unchaymi kanqa. Chay p'unchaytan waqrakunata tocaspa qallarinkichis, hinaspan yupaychawanaykichispaq huñukuspa yuyariwankichis. 25Aman imatapas llank'ankichischu, mikhuna ofrendatan ñoqa Señor Diosman haywawankichis, nispa, nispayki.
Hucha Pampachay P'unchay
(Núm 29.1-11)
26Señor Diosmi Moisesta nirqan: 27—Chay qanchiskaq killaq chunkakaq p'unchayninmi Hucha Pampachay P'unchay kanqa. Yupaychanapaq huñunakuyniykichismi kanqa, ayunankichismi, ñoqa Señor Diosmantaqmi mikhuna ofrendata haywawankichis. 28Aman chay p'unchaypiqa imatapas llank'ankichischu, chayqa Hucha Pampachay P'unchaymi, ñoqa Apu Señor Diosniykichispa ñawpaqeypi huchaykichis llapan pampachasqa kananpaq. 29Pipas chay p'unchaypi mana ayunaqqa, llaqtaymanta qarqosqan kanqa. 30Pipas chay p'unchaypi imatapas llank'anqa chayqa, ñoqan chay runata wañuchisaq. 31Aman imatapas llank'ankichischu. Wiñaypaq kamachikuy simin chayqa kanqa miray-mirayniykichispaq maypiña tiyasqaykichispipas. 32Qankunapaqqa samanaykichis hatun p'unchaymi, isqonkaq p'unchay ch'isinmantan qhepantin p'unchay ch'isinkama ayunaspa samankichis, nispa.
Ch'uklla Ruway Fiesta
33Señor Diosmi Moisesta nirqan: 34—Israel runakunata nimuy: Señor Diosmi nin:
Chay qanchiskaq killaq chunka phisqayoq p'unchayninpin ñoqapaq Ch'uklla Ruway Fiesta qallarinqa, qanchis p'unchaytaq kanqa. 35Ñawpaqkaq p'unchaymi yupaychanapaq huñunakuy kanqa, aman imatapas llank'ankichischu. 36Qanchis p'unchaymi mikhuna ofrendata ñoqa Señor Diosman haywawankichis. Pusaqkaq p'unchaypitaqmi yupaychanapaq huñunakuyniykichis kallanqataq, mikhuna ofrendatan ñoqaman haywawankichis. Chayqa tukupay p'unchay hatun huñunakuymi, aman chaypiqa imatapas llank'ankichischu.
37Chaykunan ñoqa Señor Diospa hatun fiestaykunaqa, chaykunamanmi yupaychanapaq huñunakuyman waqyankichis. Chay fiestakunapin mikhuna ofrendakunata, ruphachina sacrificiokunata, ruru ofrendakunata, vino ofrendakunata sapanka tupamusqan p'unchaypi ñoqa Señor Diosman haywawankichis. 38Chay fiestakunaqa samana p'unchaykunamantaqa sapaqmi, chay ofrendakunapas qokuyniykichiskunamanta, prometekusqaykichista hunt'anapaq ofrendakunamanta, munayllaykichismanta ñoqaman qosqa llapa ofrendakunamantapas sapaqmi.
39Qanchiskaq killaq chunka phisqayoq p'unchayninpitaqmi hallp'aq rurusqanta hoqarispaykichisña, qanchis p'unchayta ñoqa Señor Diospaq fiestata ruwankichis. Ñawpaqkaq p'unchaymi samana kanqa, pusaqkaq p'unchaypas samana p'unchayllataqmi kanqa. 40Ñawpaqkaq p'unchaypin sach'aq allinkaq rurunkunata hoqarinkichis, hoqarillankichistaqmi palmera sach'a k'allmakunatapas, raphisapa sach'a k'allmakunatapas, unu pata saucekunatapas, hinaspan ñoqa Apu Señor Diosniykichispa ñawpaqeypi qanchis p'unchayta kusikunkichis. 41Sapa watan qanchis p'unchayta ñoqapaq chay fiestata chay hinata ruwankichis. Wiñaypaq kamachikuy simin miray-mirayniykichispaq kanqa. Qanchiskaq killapin fiestata ruwankichis. 42Qanchis p'unchaytan Israelpi tukuy naceqkuna ch'ukllakunapi tiyanqa. 43Chay hinapin Egipto suyumanta horqomuspay Israel runakunata karpakunapi tiyachisqayta wawaykichiskuna yachanqa. Ñoqaqa Apu Señor Diosniykichismi kani, nispa, nispayki.
44Chay hinatan Moisesqa Israel runakunata rimaykurqan Señor Diospa hatun fiestankunamanta.
Currently Selected:
LEVÍTICO 23: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
