LEVÍTICO 22
22
Ofrendakunaq ch'uya kanan
1Señor Diosmi Moisesta nirqan: 2—Aarontawan churinkunatawan nimuy Israel runakunaq haywawasqan ch'uya ofrendankunata allinpaq hap'inankupaq, ch'uya sutiyta ama pisichanankupaq. Ñoqaqa Señor Diosmi kani.
3Paykunata nimuy: Señor Diosmi nin: Mirayniykichismanta mayqen qharipas qhelli kashaspa, Israel runakunaq ñoqapaq t'aqasqan ch'uya ofrendakunaman qayllaykunqa chayqa, manañan serviwanqachu. Ñoqaqa Señor Diosmi kani.
4Aaronpa miraynin mayqen qharipas aycha qaranpi onqoyniyoq kanqa, q'eya hisp'aqpas kanqa chayqa, aman ch'uya ofrendakunata mikhunqachu ch'uya kanankama. Mayqen sacerdotepas ima wañusqatapas tupaykunqa, muhunpas phawanqa, 5ima mach'aqwaytapas tupaykunqa, ima qhellichaqwan qhellichasqa runatapas tupaykunqa chayqa, qhellin kanqa. 6Chay sacerdoteqa ch'isinkaman qhelli kanqa, manataqmi ch'uya ofrendakunataqa mikhunqachu cuerponta unuwan manaraq bañakushaspanqa. 7Inti haykuqtinñan ch'uya kapunqa, hinaspan chay ch'uya ofrendakunata mikhunqa, mikhunanku kasqanrayku. 8Manan wañusqatapas phiña uywaq llik'irqarisqantapas mikhunqachu chaywan qhellichakapuspaqa. Ñoqaqa Señor Diosmi kani.
9Sacerdotekunaqa kamachikusqaytapuni hunt'achunku, ama chay hawa huchallikunankupaq, paqtan chay hinata wañunkuman chay kamachikusqayta pisichaspanku. Ñoqaqa Señor Diosmi kani, paykunata ch'uyanchaqmi kani.
10Mana sacerdoteqa aman ch'uya ofrendataqa mikhunqachu. Sacerdoteq qorpachasqanpas llank'apakuqninpas aman ch'uya ofrendataqa mikhunqachu. 11Ichaqa sacerdotechus qolqenwan huk kamachita rantinqa chayqa, kamachiqa chaytaqa mikhunmanmi, wasinpi naceq kamachipas chay mikhunataqa mikhunmanmi.
12Sacerdoteq ususin mana sacerdotewanchu casarakuspaqa, aman ch'uya ofrendakunata mikhunqachu. 13Sacerdoteq ususintaqchus viudapas wikch'usqapas kapunqa, manataq wawayoqchu kanqa, taytanpa wasinmantaq kutimpunqapas chayqa, sipas kashaspan hinan taytanpa mikhunanta mikhunqa, ichaqa aman mayqen mana sacerdotepas chaytaqa mikhunqachu.
14Pipas mana reparaspa ch'uya ofrendata mikhuqqa, chaymanmi phisqamanta hukninta yapaykunqa, hinaspan chayta ch'uya ofrendatawan sacerdoteman kutichipunqa. 15Aman sacerdotekunaqa pisichanqakuchu Israel runakunaq ch'uya ofrendankunataqa, chaykunaqa ñoqa Señor Diospaq t'aqasqakunan. 16Paykunaqa ch'uya ofrendakunataqa aman piwanpas mikhuchinqakuchu, chay mikhuqkunaqa huchallikunkumanmi, hinaspan ofrendata kutichipunkuman. Ñoqaqa Señor Diosmi kani, paykunata ch'uyanchaqmi kani, nispa, nispayki.
Animalkunata imaynatachus haywana
17Señor Diosmi Moisesta nirqan: 18—Aaronman, churinkunaman, Israel llapa runakunamanwan nimuy: Señor Diosmi nin:
Israel mayqen runapas Israelpi tiyaq wak llaqtayoqpas prometekusqanta hunt'ananpaq munayllanmanta ofrendata qonanpaq ñoqa Señor Diosman ruphachina ofrendata haywawanqa chayqa, mana imanasqa animalmi kanqa. 19Ñoqaq chaskisqay kananpaqqa mana imanasqa orqon kanqa, toropas, borregopas, cabrapas kachun. 20Aman imatapas mana allintaqa haywawankichischu, chay animaltaqa manan qankunamanta chaskisqaykichischu.
21Hinallataq pipas ñoqa Señor Diosman sumaq kawsay ofrendata haywawanqa prometekusqanta hunt'ananpaq, otaq munayllanmanta ofrenda kananpaq, toropas ovejapas cabrapas kachun, chaskisqa kananpaqqa mana imanasqa qhalin kanqa. 22Ñawsatapas, p'akisqatapas, qhorusqatapas, lleqthisqatapas, qarachisapatapas, thiskisqatapas aman ñoqaman haywawankichischu. Amallataqmi chaykunataqa ñoqaq altarniy patapi ruphachina sacrificiopaq churankichischu. 23Toroqpas anejoqpas kanman hukkaq chakin yaparisqa, hukkaq chakintaq huch'uylla chayqa, munayllamanta ofrendata hinan haywawaqchis, ichaqa manan prometekusqamanta haywasqaqa chaskisqachu kanqa. 24Aman ñoqa Señor Diosman haywawankichischu ima animaltapas runtun k'irisqatapas, t'astasqatapas, llik'isqatapas, kapasqatapas. Aman hallp'aykichispipas animalkunata kapankichischu. 25Amallataqmi wak llaqtayoqkunamantapas chay animalkunataqa chaskinkichischu Diosniykichispa mikhunanta hina haywanaykichispaq. Chaykunaqa mana allinmi, manan sumaqchu, chaymi qankunamanta mana chaskisunkichischu, nispa, nispayki.
26Señor Diosmi Moisesta nirqan: 27—Torillopas borregopas cabrapas nacespanqa qanchis p'unchaytan mamanta ñuñunqa, pusaqkaq p'unchaymanta qhepamanmi ichaqa ñoqa Señor Diospaq nak'asqa mikhuna ofrendapaq chaskisqa kanqa. 28Wakatapas ovejatapas cabratapas aman kaq p'unchayllapichu mamantin uñantinta nak'ankichis.
29Ñoqa Señor Diosman agradecey ofrendata haywawaspaykichisqa, chaskinaypaq hinapunin haywawankichis. 30Chay kikin p'unchaypin mikhunkichis, aman qhepantin p'unchaypaqqa imatapas saqenkichischu. Ñoqaqa Señor Diosmi kani.
31Kamachikuyniykunata waqaychaspaykichismi hunt'ankichis. Ñoqaqa Señor Diosmi kani. 32Aman ch'uya sutiyta pisichankichischu. Israel runakunaqa ch'uya kasqaytan qhawawananku. Ñoqa Señor Diosmi ch'uyanchaqniykichis kani. 33Diosniykichis kanaypaqmi Egipto suyumanta horqomurqaykichis. Ñoqaqa Señor Diosmi kani, nispa.
Currently Selected:
LEVÍTICO 22: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
