LEVÍTICO 21
21
Sacerdotekunaq ch'uya kanan
1Señor Diosmi Moisesta nirqan: —Aaronpa churin sacerdotekunata nimuy: Señor Diosmi nin:
Aman llaqtaykichispi ayata tupaykuspa qhellichakunkichischu. 2Ichaqa qaylla familiaykichis, mamaykichis, taytaykichis, churiykichis, wawqeykichis, 3wasiykichispi tiyaq soltera panaykichispas wañullaqtinmi qhellichakuwaqchis. 4Ichaqa manan qhellichakuwaqchischu casarakuymanta aylluraykuqa.
5Wañuqniyoq kashaspaykichisqa aman umaykichista rutukunkichischu, aman sunkhatapas rutukunkichischu, amallataq cuerpoykichistapas kuchukunkichischu. 6Ñoqa Diosniykichispaqmi ch'uya kankichis, amataq sutiyta pisichankichischu, qankunaqa mikhuna ofrendakunatan ñoqaman haywawankichis, chayrayku ch'uya kaychis.
7Aman casarakunkichischu rabona warmiwanpas, violasqawanpas, qosanpa wikch'usqan warmiwanpas, sacerdoteqa ñoqapaq ch'uya kasqanrayku. 8Llaqtaqa Diospaq t'aqasqatan qhawasunkichis, qankunaqa ñoqa Diosniykichispa t'antaytan haywankichis. Llaqtaqa ch'uyatan qhawasunkichis, ch'uyanchaqniykichis Señor Diosqa ch'uya kasqayrayku.
9Sacerdoteq ususinchus qhellipi puriyta qallarinqa chayqa, taytantan p'enqaman churan. Ninawan kanasqan kanqa.
10Wawqenkuna ukhupi uma sacerdoteqa hawina aceitewan uman hawiykusqan karqan, ch'uya p'achakunata p'achakunanpaqpas churasqan karqan. Chaymi uma sacerdoteqa wañusqamanta chukchanta ama paskarparinqachu, p'achankunatapas llik'irqarinqachu. 11Aman pi runa wañusqamanpas qayllaykunqachu, aman taytanraykupas mamanraykupas qhellichakunqachu.
12Amallataq yupaychana cheqasmantapas lloqsinqachu, chaytapas qhellichanqachu, hawina aceiteywan t'aqasqa kasqanrayku. Ñoqaqa Señor Diosmi kani.
13Uma sacerdoteqa doncella warmiwanmi casarakunqa. 14Aman viudawanpas, wikch'usqawanpas, violasqawanpas, rabonawanpas casarakunqachu, aswanpas llaqtan doncella warmiwanmi casarakunqa. 15Ahinapin mirayninta llaqtanpi mana qhellichanqachu. Ñoqa Señor Diosmi paytaqa ch'uyanchani, nispa, nispayki.
16Señor Diosmi Moisesta nirqan: 17—Aaronta nimuy: Señor Diosmi nin:
Qhepa mirayniykipi mayqen mirayniykipas imanpas mana qhali kaqtinqa, aman asuykunqachu ñoqa Diosninpa mikhunayta haywaq. 18Mayqen qharipas imanpas mana qhali kaqtinqa aman asuykunqachu: ñawsa qharipas, wist'upas, t'astasqa senqayoqpas, iman kurakchasqapas, 19p'akisqa chakiyoqpas, p'akisqa makiyoqpas, 20qhopupas, eqopas, qoyrusqa ñawiyoqpas, qarachiyoqpas, seqsi onqoyniyoqpas, kapasqapas. 21Mirayniykimanta mayqen qharipas imanpas mana qhali kaqtinqa, aman ñoqa Señor Diosman ruphachina ofrendata haywawananpaq qayllaykamuwanqachu. Manan payqa qhalichu, manan ñoqa Diosninpa mikhunayta haywaq asuykamuwanqachu. 22Mikhunaytaqa ch'uyay-ch'uyamanta kaqtapas ch'uyamanta kaqtapas mikhunmanmi, 23ichaqa manan cortina ukhumanqa qayllaykunqachu, manallataq altarmanpas, paypa imanpas mana allin kasqanrayku. Chay hinapin ñoqa yupaychana cheqasta mana qhellichanqachu. Ñoqaqa Señor Diosmi kani, paykunata ch'uyanchaqmi kani, nispa, nispayki.
24Moisestaq chayta willarqan Aaronman, churinkunaman, Israel llapa runakunamanwan.
Currently Selected:
LEVÍTICO 21: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
