LEVÍTICO 20
20
Mana kasukuqta muchuchinamanta
1Señor Diosmi Moisesta nirqan: 2—Israel runakunatan nillankitaq: Señor Diosmi nin:
Mayqen Israel runapas, Israelpi tiyaq mayqen wak llaqtayoqpas mayqen wawantapas Molok nisqa diosman haywanqa chayqa, wañuchisqapunin kanqa. Llaqta runakunan payta rumiwan ch'aqenqa. 3Ñoqa yupaychana cheqastan qhellichan, ch'uya sutiytan pisichan, chaymi ñoqaqa chay runaq awqan kasaq hinaspan llaqtaymanta qarqosaq, wawanta Molokman haywasqanrayku. 4Wawanta Molokman haywaq runatachus chay llaqta runakunaqa mana wañuchinqakuchu chayqa, 5ñoqan chay runaq chay aylluq awqan kasaq, hinaspaymi llaqtaymanta qarqosaq, Molokwan qhellichakuspa llapa paywan qhellichaysikuqkunatawan.
6Pipas wañusqakunaq almanta tapuchinqa, layqamanpas rinqa chaykunawan qhellichakunanpaq chayqa, ñoqan chay runaq awqan kasaq, hinaspan llaqtaymanta qarqosaq.
7Ñoqapaq t'aqakuychis, ch'uyataq kaychis, ñoqa Apu Señor Diosniykichis kasqayrayku. 8Unanchayniykunata waqaychaspa hunt'aychis. Ñoqa Señor Diosmi ch'uyanchaqniykichis kani.
9Pipas taytantapas mamantapas ñakaqqa wañuchisqapunin kanqa. Taytanta mamanta ñakasqan huchanmantan wañunqa.
10Pi qharipas runa masinpa warminwan wasanchanqa chayqa, chay wasanchaqkunaqa wañuchisqapunin kanqa.
11Pipas taytanpa warminwan puñukuqqa taytantan pisichan, chaymi iskayninku huchankumanta wañuchisqa kanqaku.
12Pipas qhachuninwan puñunqa chayqa, iskayninkun huchankumanta wañuchisqa kanqaku. Chay ruwayqa waqlliymi.
13Pikunapas qharipura t'inkikunqaku chayqa, millaytapunin ruwanku, iskayninkun huchankumanta wañuchisqa kanqaku.
14Pipas ususintin mamantinwan casarakuqqa, sinchi millaytan ruwan. Ninawanmi qharitapas warmikunatapas kanaykunqaku, qankuna ukhupi chay hina ancha millay ama kananpaq.
15Pipas animalwan t'inkikuqqa wañuchisqan kanqa, animaltapas wañuchinkichismi.
16Huk warmitaqchus ima animalmanpas qayllaykunqa chaywan t'inkikunanpaq chayqa, warmitawan animaltawanmi wañuchinkichis. Huchankumantan wañunqaku.
17Pipas pananwan casarakunman, taytanpa ususinña mamanpa ususinña kaqtinpas, hinaspa puñunkuman chayqa, p'enqan. Chaymi llaqtan runakuna rikushaqtin qarqosqa kanqaku. Pananwan puñukusqan huchanmantan qarqochikunqa.
18Pipas killanwan kashaq warmiwan puñukunqa chayqa, paypa yawarnintan rikurqan, warmipas yawarnintan rikuchikurqan. Iskayninkun llaqtanku ukhumanta qarqosqa kanqaku.
19Aman mamaykiq ñañanwanpas taytaykiq pananwanpas puñukunkichu, chayqa familiata pisichaymi kanman, Iskayniykichismi huchaykichismanta muchuchisqa kankichis.
20Pipas taytanpa wawqenpa warminwan puñukuqqa, tiontan pisichan. Huchankumantan wañuchisqa kanqaku, mana wawaqoymi wañunqaku.
21Wawqe kawsashaqtin warminwan casarakuyqa millay ruwaymi. Pipas chayta ruwaqqa wawqentan pisichan. Mana wawayoqmi kapunqaku.
22Waqaychankichismi llapa unanchayniykunata, llapa kamachikuyniykunatapas, hinaspa chaykunata hunt'ankichis. Paqtan tiyanaykichispaq pusaykushasqay hallp'a qarqomusunkichisman. 23Aman ñawpaqeykichismanta wikch'usaq chay hatun suyukunaq ruwasqankunata hina ruwankichischu. Paykunaqa tukuy chay millaykunatan ruwarqanku, ñoqataq paykunata millakurqani. 24Qankunatan ichaqa nirqaykichis: Qankunan hallp'ankuta hap'inkichis, chaytan herenciaykichis kananpaq qosqaykichis, imaymanaq hunt'asqa wiñanan hallp'ata, nispa. Ñoqaqa Apu Señor Diosniykichismi kani, wak llaqtakunamanta t'aqaqniykichis.
25Chayraykun reparankichis mayqenchus mikhuna animal kasqanta, mana mikhuna kasqantapas, mikhuna phalaq animal kasqanta, mana mikhuna kasqantapas. Qankunapaq qhelli kasqanta t'aqasqay animalkunawan, phalaq animalkunawanpas, pampanta ima suchuqwanpas ama qhellichakuychischu.
26Ñoqapaq ch'uya kaychis, ñoqa ch'uya kasqayrayku, llaqtakunamantan t'aqarqaykichis ñoqaq kanaykichispaq.
27Qharipas warmipas wañusqakunaq almanta waqyanman otaq layqa kapunman chayqa, wañuchisqan kanqa. Rumiwan ch'aqesqan kanqaku, huchankumantan wañunqaku, nispa, nispayki.
Currently Selected:
LEVÍTICO 20: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
