LEVÍTICO 19
19
Ch'uya kanapaq chanin kanapaq kamachikuykuna
1Señor Diosmi Moisesta nirqan: 2—Llapa Israel runakunata nimuy: Señor Diosmi nin:
Ch'uyan kankichis, ñoqa Apu Señor Diosniykichis ch'uya kasqayrayku.
3Sapankaykichismi mamaykichista taytaykichista respetankichis. Samana p'unchayniykunatapas waqaychankichismi. Ñoqaqa Apu Señor Diosniykichismi kani.
4Aman idolokunata yupaychankichischu, amallataq unuyachispa hich'asqa dioskunatapas ruwakunkichischu. Ñoqaqa Apu Señor Diosniykichismi kani.
5Sumaq kawsay sacrificiota ñoqa Señor Diosman haywawaspaykichisqa, chaskisqa kanaykichispaq hinapunin chayta haywankichis. 6Haywasqaykichis p'unchaypin mikhusqa kanqa, otaq paqarisnin p'unchayta. Kinsakaq p'unchaypaq puchuqtaq ninapi ruphachisqa kanqa. 7Kinsakaq p'unchaypichus mikhusqa kanqa chayqa, qhellin kanqa, manan chaskisqachu kanqa. 8Pipas mikhuqqa huchachasqan kanqa, ñoqa Señor Diospaq t'aqasqa kaqta pisichasqanrayku. Chay runaqa llaqtanmantan qarqosqa kanqa.
9Chakraykita cosechaspaykiqa aman chakra cantokamachu ichhunki, amallataq ichhuspa puchuqkunataqa pallapankipaschu. 10Aman uvas chakraykitapas qhellankichu, amallataq hich'akuq uvastapas pallankichu, wakchakunapaqmi wak llaqtayoqkunapaqwan chaytaqa saqenki. Ñoqaqa Apu Señor Diosniykichismi kani.
11Aman suwakunkichischu, aman q'otunkichischu, amallataq llullakuspakama ninakunkichispaschu.
12Aman llullakuspa sutiypi jurankichischu, ñoqa Diosniykichispa sutiytan sarunchawaqchis. Ñoqaqa Señor Diosmi kani.
13Aman runa-masiykita sarunchankichu, amallataq imantapas suwankichu. Aman llank'apakuqpa pagonta paqarisninkama wasiykipi hap'ikunkichu.
14Aman roqt'ota k'aminkichu, ñawsaq ñawpaqenpipas aman misk'anata churankichu, aswanpas ñoqa Diosniykitan manchakuwanki. Ñoqaqa Señor Diosmi kani.
15Juez kaspaykiqa aman chanin-kayta waqllichinkichu, wakchamanpas qhapaqmanpas aman sayakunkichu, chanintan runa masiykipaqqa kuskachanki.
16Aman llaqta-masiykikuna ukhupi hukmanta rimakuspa purinkichu. Aman runa masiykita wañuchinapaq mat'iykunkichu. Ñoqaqa Señor Diosmi kani.
17Aman wawqeykita sonqoykipi cheqnikunkichu, aswanpas anyaykunkin payta, ama huchalliysikuq-masin kanaykipaq.
18Aman vengakunkichu, amallataq llaqta-masiykikunapaqpas phiñakushallankichu, aswanpas qan kikiykita hinan runa masiykitaqa munakunki. Ñoqaqa Señor Diosmi kani.
19Unanchayniykunata waqaychanki.
Aman uywaykita wak casta uywawan urwachinkichu. Aman iskay rikch'aq muhuwan chakraykita tarpunkichu. Aman iskay rikch'aq q'aytuwan awasqa p'achawan churakunkichu.
20Pipas mayqenpa rimaykusqan kamachi warmiwanpas puñunman, mana rescatasqa mana kacharichisqa chay warmi kashaqtin chayqa, honranmantan payqa paganqa, ichaqa manan wañuchisqachu kanqaku, warmiq kamachi kasqanrayku. 21Qharitaqmi Ñoqawan Tupana Karpa punkuman huk anejota apamunqa ñoqapaq kutichipuna ofrenda kananpaq. 22Chay anejotataqmi sacerdoteqa ñoqa Señor Diosman haywawanqa huchallikusqanmanta pampachanapaq, hinan huchallikusqanqa pampachasqa kapunqa.
23Canaán suyuman haykuspaykichis imaymana niraq fruta sach'akunata mallkispaykichisqa, ñawpaq rurusqantan mana mikhuna qhellita hina qhawankichis. Kinsa watantinmi qhelli kanqa, aman rurusqantaqa mikhunkichischu. 24Tawakaq watapitaq tukuy rurusqanqa ñoqa Señor Diosman qosqa kapunqa ñoqata yupaychanapaq. 25Phisqakaq watapitaq ichaqa rurusqanta mikhunkichis. Chaymi astawanraq rurunqa. Ñoqaqa Apu Señor Diosniykichismi kani.
26Aman imatapas yawarnintintaqa mikhunkichischu.
Aman imatapas watunkichischu.
27Aman ch'ipu chukchaykichista rutukunkichischu. Amallataq sunkhaykichistapas rutukunkichischu.
28Aman wañuqkunamanta cuerpoykichista kuchukunkichischu. Amallataq cuerpoykichispi ima señaltapas t'urpukunkichischu. Ñoqaqa Señor Diosmi kani.
29Aman ususiykita qhellichankichu payta qhellipi purichispayki, paqtan suyuntin qhellipi purinman, hinaspa qhelli kawsay hunt'aykunman.
30Samana p'unchayniykunatan waqaychankichis, ñoqa yupaychana cheqastan manchakunkichis. Ñoqaqa Señor Diosmi kani.
31Aman wañusqakunaq almanta tapuchinkichischu, amallataq layqamanpas rinkichischu, ama chaykunawan qhellichakunaykichispaq. Ñoqaqa Apu Señor Diosniykichismi kani.
32Machu runaq ñawpaqenpin sayaykunki, hinaspan payman k'umuykukunki. Ñoqa Diosniykitapas manchakuwankin. Ñoqaqa Señor Diosmi kani.
33Hallp'aykichispi wak llaqtayoq qankunawan tiyaqtinqa, aman payta sarunchankichischu. 34Hukniykichista hinan rikunkichis qankunawan tiyaq wak llaqtayoqtaqa, qanta hinataqmi munakunkipas. Wak llaqtayoqllataqmi qankunapas Egipto suyupi kamurqankichis. Ñoqaqa Apu Señor Diosniykichismi kani.
35Tupushaspaqa aman mana chaninta ruwankichu, thaskispa tupuypipas, llasa aysaypipas, imayna sayay tupuypipas. 36Chanin balanzakunatan, chanin aysanakunatan, chanin tupunakunatan qankunaqa hap'inaykichis. Ñoqaqa Apu Señor Diosniykichismi kani, Egipto suyumanta horqomuqniykichis.
37Llapa unanchayniykunatan, llapa kamachikuyniykunatan hunt'ankichis. Ñoqaqa Señor Diosmi kani, nispa, nispayki.
Currently Selected:
LEVÍTICO 19: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
