LEVÍTICO 18
18
Ch'uya kawsanapaq kamachikuykuna
1Señor Diosmi Moisesta nirqan: 2—Israel runakunata nimuy: Señor Diosmi nin:
Ñoqaqa Apu Señor Diosniykichismi kani. 3Aman tiyamusqaykichis Egipto suyupi ruwasqankuta hinaqa ruwankichischu, amallataq pusaykushasqay Canaán suyupi ruwasqankuta hinapas ruwankichischu, hina yachasqa ruwayninkutaqa aman ruwankichischu. 4Kamachikuyniykunatan hunt'ankichis, unanchayniykunatan waqaychankichis, chaykunaman hinataq puriychis, ñoqaqa Apu Señor Diosniykichismi kani. 5Unanchayniykunatan kamachikuyniykunatan waqaychankichis, chaykunata hunt'aspanmi runaqa kawsanqa. Ñoqaqa Señor Diosmi kani.
6Aman pipas mayqen familian warmiwanpas puñukunqachu. Ñoqaqa Señor Diosmi kani.
7Aman taytaykita pisichankichu mamaykiwan puñukuspayki. Mamaykin payqa, aman paywan puñukunkichu.
8Aman taytaykiq qhepa warminwan puñukunkichu, chayqa taytaykita pisichaymi kanman.
9Aman panaykiwan puñukunkichu, taytaykiq ususinwanpas, mamaykiq ususinwanpas, qanwan wiñaq kaqtinpas, wakpi wiñaq kaqtinpas.
10Aman churiykiq ususinwanpas ususiykiq ususinwanpas puñukunkichu, paykunaqa yawarniykin.
11Aman taytaykiq ususinwan puñukunkichu wak mamayoqña kaqtinpas, payqa panaykin.
12Aman taytaykiq pananwan puñukunkichu, payqa taytaykiq ayllunmi.
13Aman mamaykiq ñañanwan puñukunkichu, payqa mamaykiq ayllunmi.
14Aman taytaykiq wawqenpa warminwan puñukunkichu, payqa tiaykin.
15Aman qhachuniykiwan puñukunkichu, payqa churiykiq warminmi, aman paywan huchallikunkichu.
16Aman wawqeykiq warminwan puñukunkichu, chayqa wawqeykita pisichaymi kanman.
17Aman mamantin ususintinwan puñukunkichu. aman chay warmiq nietanwanpas puñukunkichu, ayllu masintinmi kanku. Chayqa millay ruwaymi.
18Warmiyki kawsashaqtinqa, aman ñañanwan casarallankitaqchu paywan puñukuspaqa cheqninachiwaqmi.
19Aman killanwan kashaq warmiwan puñukunkichu.
20Aman runa masiykiq warminwan puñukunkichu, paywanqa qhellichakuwaqmi.
21Aman mayqen wawaykitapas Molok nisqa diosman qonkichu ruphachisqata haywanapaq, aman chay hinata Diosniykiq sutinta sarunchankichu. Ñoqaqa Señor Diosmi kani.
22Aman qharipura t'inkikunkichu, chayqa sinchi millaymi.
23Aman ima animalwanpas t'inkikunkichu, chaywanqa qhellichakuwaqmi. Aman mayqen warmipas animalman qayllaykunqachu chaywan t'inkikunanpaq, chayqa waqlliymi.
24Aman chay hina ruwaykunawan qhellichakunkichischu, chaykunawanmi waqllirqanku qayllaykichismanta wikch'ushani chay hatun suyu runakunaqa. 25Chay suyu hallp'ataqmi qhellichasqa karqan, chaymi ñoqaqa mana chanin ruwasqankumanta muchuchirqani, chay suyu hallp'ataqmi tiyaqninkunata qarqomurqan. 26Qankunaqa waqaychankichismi unanchayniykunata kamachikuyniykunatawan, amataq chay mayqen millaytapas ruwankichischu, llaqtayoqpas qankuna ukhupi tiyaq wak llaqtayoqpas. 27Manaraq tiyashaqtiykichis chay suyupi tiyaq runakunaqa llapan kay millaykunatan ruwarqanku, chaymi chay suyuqa qhellillaña kapurqan. 28Paqtan chay suyuqa qhellichaykusqaykichismanta qarqomusunkichisman, manaraq tiyashaqtiykichis chaypi tiyaq runakunata qarqomusqanta hina. 29Pipas chay hina millaykunata ruwaqqa llaqtanmantan qarqosqa kanqa. 30Hunt'aychispuni kamachikusqayta, amataq chay mayqen millaytapas ruwaychischu, chaykunatan manaraq haykushaqtiykichis Canaán suyu runakuna ruwarqanku, amataq chaykunawan qhellichakuychischu. Ñoqaqa Apu Señor Diosniykichismi kani, nispa, nispayki.
Currently Selected:
LEVÍTICO 18: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
