LEVÍTICO 17
17
Yawarta mana mikhunamanta
1Señor Diosmi Moisesta nirqan: 2—Aarontapas, churinkunatapas, Israel llapa runakunatapas nimuy: Kaymi Señor Diospa kamachikusqan:
3Mayqen Israel runapas karpa-karpapi otaq hawapi nak'anqa torotapas borregotapas cabratapas, 4manataq chayta apamuspa Dioswan Tupana Karpa punkumanchu apamunqa Señor Diosman haywananpaq chayqa, chay runan yawar hich'asqamanta huchachasqa kanqa. Yawarta hich'asqanraykun chay runaqa llaqtan ukhumanta qarqosqa kanqa. 5Kay kamachikuyqa campopi amaña uywakunata nak'anankupaqmi. Chay uywakunataqa sacerdotemanmi apamunqaku, hinaspan Dioswan Tupana Karpa punkupi nak'anqaku Señor Diosman sumaq kawsay sacrificiota haywanankupaq. 6Sacerdotetaqmi Dioswan Tupana Karpa punkupi kaq Señor Diospa altarninman yawarta hich'aykunqa, wiratataq ruphachinqa q'apaynin Señor Diospa sonqonman chayananpaq. 7Amañan hayk'aqpas sacrificasqankuta cabraman rikch'akuq idolokunaman haywanqakuchu, chaykunawanmi qhellichakushanku. Israel runakunaqa kay kamachikuytaqa kasushallanqakupunin, nispayki.
8Paykunataqa nillankitaqmi: —Mayqen Israel runapas, otaq qankuna ukhupi tiyaq wak llaqtayoqpas ruphachina sacrificiotapas nak'asqatapas haywanqa, 9manataq chayta apamuspa Dioswan Tupana Karpa punkupichu haywanqa chayqa, chay runaqa llaqtanmanta qarqosqallataqmi kanqa.
10Mayqen Israel runapas, otaq qankuna ukhupi tiyaq wak llaqtayoqpas ima yawartapas mikhunqa chayqa, Señor Diosmi chay yawar mikhuq runaq awqan sayarinqa, hinaspan llaqtanmanta payta qarqonqa. 11Kawsaqpa kawsayninqa yawarninpin kashan, Señor Diosmi chayta qosunkichis huchaykichista altar patapi pampachachinaykichispaq, chay yawarllataqmi huchataqa pampachachin. 12Chaymi Señor Diosqa Israel runakunata nin: Aman mayqenniykichispas yawartaqa mikhunkichischu, aman qankuna ukhupi tiyaq wak llaqtayoqpas yawartaqa mikhunqachu, nispa.
13Mayqen Israel runapas otaq paykuna ukhupi tiyaq wak llaqtayoqpas mikhuna animalta otaq phalaq animaltapas hap'inqa chayqa, yawarnintan hich'anqa hinaspan hallp'awan pakanqa. 14Llapa kawsaqpa kawsayninqa yawarninmi, chaymi Señor Diosqa Israel runakunata kamachin: Aman ima animalpa yawarnintapas mikhunkichischu, llapa kawsaqpa kawsayninqa yawarnin kasqanrayku. Pipas chayta mikhuqqa qarqosqan kanqa, nispa.
15Mayqen runapas, llaqtayoqpas wak llaqtayoqpas, wañusqa animalta otaq phiña animalpa llik'irqarisqanta mikhunqa chayqa, p'achankunatan t'aqsakunqa, unuwanmi bañakunqa, ch'isinkamataq qhelli kanqa, chaymantataq ch'uya kapunqa. 16Manataq chaykunata t'aqsakunqachu, cuerpontapas bañakunqachu chayqa, paymi huchayoq kanqa, nispayki, nispa.
Currently Selected:
LEVÍTICO 17: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
