LEVÍTICO 16
16
Hucha Pampachay P'unchay
1Aaronpa iskaynin churinkunan Señor Diosman qayllaykuspa wañurqanku, chay qhepatan Señor Diosqa Moisesta nirqan: 2—Wawqeyki Aaronta niy unanchasqa tiempollapi cortina qhepa Ch'uyay-ch'uya Cheqasman haykunanpaq, caja patapi kaq hucha pampachana cheqas nisqa kirpana qayllaman, paqtan wañunman. Ñoqaqa kirpana patapin phuyu ukhupi rikhurini. 3Aaronqa karpa kanchaman haykunqa hucha pampachaypaq huk torillontin, ruphachina sacrificiopaqtaq huk anejontin. 4Unuwan bañakuspañan churakunqa linomanta ch'uya sotanawan, lino calzoncillowan, lino chumpiwan chumpikunqa, linomanta uma k'uyunawan umanta k'uyukunqa. Chaykunaqa ch'uya p'achakunan. 5Israel runakunamantataq iskay orqo cabrata hucha pampachaypaq hap'inqa, huk anejotataq ruphachina sacrificiopaq.
6Aarontaq hucha pampachaypaq huk torillota haywanqa paypaqwan familianpaqwan. 7Hinaspataq iskaynin orqo cabrata qayllayman apamunqa Ñoqawan Tupana Karpa punkuman. 8Chaymantataq Aaronqa iskaynin orqo cabrapaq sorteanqa, hukta ñoqa Señor Diospaq, huktataq hucha apaqpaq. 9Aaronmi ñoqapaq sorteasqa orqo cabrata apachimunqa, hinaspan chayta hucha pampachaypaq haywanqa. 10Hucha apaqpaq sorteasqa orqo cabratataq ichaqa kawsashaqta ñawpaqeyman chimpachimunqa, hinaspa ch'inneqman qatirparipunqa Israel runakunaq huchankunata apananpaq.
11Hinaspan Aaronqa huchan pampachaypaq kaq torillota apachimunqa paypaqwan familianpaqwan, hinaspa chay torillota nak'anqa. 12Chaymantataq ñawpaqeypi kaq altarmanta incienso q'osñichinata hunt'a sansayoqta hoqarinqa, hinallataq huk phoqtuy q'apashaq incienso kutasqatapas, chaykunatan cortina ukhuman apaykunqa. 13Hinaspan inciensotaqa ñawpaqeypi kaq nina pataman churaykunqa kamachikuy simiyoq caja patapi kaq hucha pampachana cheqas nisqa kirpanata incienso q'osñi pakaykunanpaq, ahinapi mana wañunanpaq. 14Hinamantataq torillo yawarta hap'ispa kirpana pataman ch'allaykunqa, hinaspataq kirpanaq ñawpaqenman chay yawarta dedonwan qanchis kutita ch'allaykunqa.
15Hinaspataq orqo cabrata nak'anqa llaqtaq huchanta pampachaypaq, hinamantataq yawarninta apaykunqa cortina ukhuman, hinaspataq torilloq yawarninwan ruwasqanta hina ruwanqa, chay yawartan kirpana pataman ch'aqchuykunqa, hinallataq kirpanaq ñawpaqenmanpas. 16Chay hinatan Ch'uyay-ch'uya Cheqasta ch'uyanchanqa Israel runakunaq qhelli kasqankurayku, mana kasukusqankurayku, tukuy huchallikusqankumantawan. Kaqllataqmi Ñoqawan Tupana Karpatapas ch'uyanchanqa qhelli runakuna ukhupi kasqanrayku. 17Ch'uyay-ch'uya Cheqasman Aaronqa haykuspa paypaq, familianpaq, llapa Israel runakunapaqwan hucha pampachaypaq chay yawarta haywanqa. Chaymi haykusqanmanta lloqsinankama mana pipas karpaman haykunqachu.
18Ñawpaqeypi kaq altarman lloqsimuspan chayta ch'uyanchananpaq haywanqa, hinaspan torillo yawartapas orqo cabra yawartapas hap'ispa altar waqrakunaman llusiykunqa. 19Chay altar patamanmi qanchis kutita yawarta dedonwan ch'allaykunqa, chay hinatan Israel runakunata qhelli kasqankumanta ch'uyanchaspa ñoqapaq t'aqanqa.
20Ch'uyay-ch'uya Cheqasta, Ñoqawan Tupana Karpata, altartawan ch'uyanchasqanmantataq Aaronqa kawsashaq orqo cabrata apachimunqa. 21Hinaspan chay cabra umaman iskaynin makinta churaykuspa chay patapi willakunqa Israel runakunaq tukuy huchallikusqanta, tukuy mana kasukusqanta, hinaspa chay cabra umaman llapa huchankuta q'epiykachispa chaypaq kamachisqaña runawan ch'inneqman qatirparichipunqa. 22Chay cabrataq llapa mana chanin ruwasqankuta mana runaq tiyasqan hallp'aman apanqa, chay runataq ch'inneqman chay cabrata qatirparipunqa. 23Chaymantataq Aaronqa Ñoqawan Tupana Karpaman haykunqa, hinaspan Ch'uyay-ch'uya Cheqasman haykunanpaq p'achakusqan lino p'achakunata ch'utikuspa chayman churaykunqa. 24Chaymantataq karpaq ch'uya kanchampi bañakunqa, p'achankunawan p'achakuspataq lloqsispa ruphachina sacrificiokunata haywanqa, paypa huchantapas llaqtaq huchantapas pampachaypaq. 25Huchapaq nak'asqaq wirantataq altarpi ruphachinqa.
26Hucha apaq orqo cabrata qatirpariqqa p'achankunatan t'aqsakunqa, unuwanmi bañakunqa, hinaspañan karpa-karpaman haykunqa. 27Hucha pampachaypaq torilloq orqo cabraq yawarninta Ch'uyay-ch'uya Cheqasman apaykusqan qhepatataq chay animalkunaq qaranta, aychanta, phusnuntawan karpa-karpa hawaman horqospa ruphachinqaku. 28Chaykunata ruphachiqqa p'achankunatan t'aqsakunqa, unuwanmi bañakunqa, chaymantañan karpa-karpaman kutiykapunqa.
29Wiñaypaqmi kayqa kamachikuy simi qankunapaq kanqa: Qanchiskaq killaq chunkakaq p'unchayninpin ayunankichis, aman ima ruwanatapas ruwankichischu, llaqtayoqpas qankuna ukhupi tiyaq wak llaqtayoqpas. 30Chay p'unchaypin qankunapaq hucha pampachaypaq haywakunqa, chaymi tukuy huchaykichismanta qayllaypi ch'uya kapunkichis. 31Samakuna p'unchaymi qankunapaqqa kanqa, chaypiqa ayunankichismi. Chayqa wiñaypaq kamachikuy simin. 32Taytanman qatiq sacerdote kananpaq hawispa churasqa uma sacerdoten hucha pampachaypaq haywanqa. Payqa linomanta ch'uya p'achakunawanmi p'achakuspa 33ch'uyanchanqa Ch'uyay-ch'uya Cheqastapas, Ñoqawan Tupana Karpatapas, altartapas, hinaspan sacerdotekunaq huchan llaqtaq huchan pampachaypaq sacrificiota haywanqa.
34Chaykunaqa wiñaypaq kamachikuy simin qankunapaq kanqa, Israelpa tukuy huchankunapaq watapi ch'ulla kutillata hucha pampachachiypaq, nispa.
Hinan Señor Diospa Moisesta kamachisqanqa ruwasqa karqan.
Currently Selected:
LEVÍTICO 16: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
