LEVÍTICO 13
13
Aycha qarapi onqoypaq kamachikuy simikuna
1Señor Diosmi Moisestawan Aarontawan nirqan: 2—Piqpa aychanpipas punkisqapas, pukayasqapas, k'anchashaqpas kanqa, millay onqoymantaq aycha qaranpi tukuq hina kanman chayqa, sacerdote Aaronmanpas churinmanpas pusasqan kanqa. 3Sacerdotetaq aycha qaranpi onqoyta qhawanqa, hinaspa onqoypa kasqanpi suphu yuraqyasqata onqoypas aswan ukhuman haykusqanta tarinqa chayqa, millay onqoymi. Sacerdoten chayta allinta qhawaspaña chay runata qhelli kasqanta sut'inchanqa. 4Chay k'anchashaq cheqaschus yuraq kanqa, manataq aswan ukhumanchu haykunqa, suphupas manataq yuraqyanqachu chayqa, sacerdoten chay onqoyniyoq runata qanchis p'unchayta wisq'anqa. 5Qanchiskaq p'unchaypitaqmi sacerdoteqa qhawanqa, onqoytaqchus kaqlla kashanqa aycha qarapi mana aqarispa chayqa, qanchis p'unchaytawanraqmi sacerdoteqa payta wisq'anqa. 6Qanchiskaq p'unchaypitaq sacerdoteqa qhawallanqataq, onqoytaq mana k'anchapushanqachu, aycha qarapipas manataq aqarinqachu chayqa, pukayasqalla kaqtinmi sacerdoteqa chay runata ch'uyata sut'inchapunqa. P'achankunatan t'aqsakunqa, ch'uyataq kapunqa.
7Ch'uya kananpaq sacerdoteman qhawachikamusqan qhepatataqchus chay runaq aycha qaranpi pukayasqaqa aqarinqa chayqa, huktawanmi sacerdoteman qhawachikamunqa. 8Sacerdotetaqchus qhawashaspa rikunqa aycha qarapi pukayasqaqa aqarisqanta chayqa, chay runatan qhelli kasqanta sut'inchanqa, chayqa millay onqoymi.
9Mayqen runapipas aycha qaranpi millay onqoy rikhuriqtinqa sacerdotemanmi pusasqa kanqa. 10Sacerdotetaq chayta qhawanqa, aycha qarapitaqchus yuraq punkisqa rikhurinqa, chaytaq suphuta yuraqyachinqa, punkisqapitaq llullu aycha rikhurinqa chayqa, 11aycha qaranpi unay onqoyñan. Sacerdoten paytaqa qhelli kasqanta sut'inchanqa, qhelli kasqanta rikuspan mana wisq'anqachu.
12Millay onqoytaqchus cuerpontinman aqarinqa, chhaynapi onqosqata umamanta chakikama khiki onqoyniyoqta hina sacerdote rikunqa chayqa, 13paymi allinta qhawanqa. Onqoytaqchus cuerpontinta tukunqa chayqa, ch'uyatan khiki onqoyniyoqta sut'inchanqa. Llapallan yuraqyapuqtinmi payqa ch'uya. 14Maypachachus llullu aycha paypi rikhuriqtinmi ichaqa, qhelli kapunqa. 15Sacerdoten chay llullu aychata qhawanqa, hinaspan qhelli kasqanta sut'inchanqa. Llullu aychaqa qhellin, chayqa millay onqoymi. 16Llullu aychataqchus hukman tukunqa yuraqyapunqataq chayqa, sacerdotemanmi qayllaykunqa, 17hinan sacerdoteqa payta qhawanqa. Llullu aychataqchus yuraqyapunqa chayqa, sacerdoten chay onqoypa hap'isqanta ch'uya kasqanta sut'inchanqa, chaymi ch'uya kapunqa.
18-19Piqpa aychanpipas ch'upu alliyasqanmantaña punkispa yuraqyanqa otaq t'oqra-pukapas kanqa chayqa, chay runaqa sacerdotemanmi qhawachikamunqa. 20Sacerdotetaq qhawanqa, chaytaqchus aycha qarapi aswan ukhu kapushanqa, suphunpas yuraqyasqataq kapushanqa chayqa, sacerdoten qhelli kasqanta sut'inchanqa. Chayqa ch'upu sayariq millay onqoymi. 21Sacerdotetaqchus chayta qhawaspa mana chaypi yuraq suphuta rikunqachu, manataq aycha qara ukhumanpas haykunqachu, aswanpas tiyaykapunqataq chayqa, qanchis p'unchaytan payta wisq'anqa. 22Aycha qarapitaqchus aqarinqa chayqa, sacerdoten qhelli kasqanta sut'inchanqa, chayqa onqoymi. 23K'anchashaq punkisqataqchus kaqllapi mana aqarispa kashanqa chayqa, sacerdoten chayta ch'uya kasqanta sut'inchanqa.
24Piqpa aycha qaranpipas ninaq ruphasqan kanqa, hinaspa ninaq ruphasqan llullu aychapi t'oqra-pukapas yuraq k'anchashaqpas kanqa chayqa, 25sacerdoten chayta qhawanqa. Suphutaqchus yuraq k'anchashaq cheqaspi yuraqyashanqa, chaytaq aycha qara ukhuman haykushanqa chayqa, ruphasqapi hatariq millay onqoymi. Sacerdoten qhelli kasqanta sut'inchanqa, millay onqoy kasqanrayku. 26Ichaqa sacerdotetaq chayta qhawaspa, yuraq k'anchashaq cheqaspi yuraq suphu mana rikhurisqanta, manataq aycha qara ukhumanchu haykusqanta, aswanpas t'oqrayasqatataq rikunqa chayqa, qanchis p'unchaytan chay runata sacerdote wisq'anqa. 27Qanchiskaq p'unchaypitaqmi sacerdoteqa payta allinta qhawanqa, aycha qaramantaqchus aqarinqa chayqa, sacerdoten chay runata qhelli kasqanta sut'inchanqa, chayqa millay onqoymi. 28Yuraq k'anchashaqchus kaqllapi kashanqa, manataq aycha qaraman aqarinqachu, tiyaykapunñataq chayqa, ruphasqa sich'un. Sacerdoten chayta ch'uya kasqanta sut'inchanqa ruphasqa sich'u kasqanrayku.
29Qhariqpas warmiqpas umanpi otaq k'akinpi p'aspa hina hatarinqa chayqa, 30sacerdoten chay p'aspata allinta qhawanqa. Chaytaqchus aycha qarapi aswan ukhu rikhurinqa, chaypi suphupas q'ellu niraytaq t'akallataq kanqa chayqa, sacerdoten chayta qhelli kasqanta sut'inchanqa. Chayqa seqsi onqoymi, umapi otaq k'akipi millay onqoymi. 31Sacerdotetaq chay p'aspata qhawaspa, aycha qara ukhuman mana haykusqanta, manallataq chaypi yana suphupas kasqanta rikunqa chayqa, qanchis p'unchaytan sacerdoteqa chay runata wisq'anqa. 32Qanchiskaq p'unchaypitaqmi sacerdoteqa chay p'aspata allinta qhawanqa, manataq seqsi onqoy aqariqtinqa, chaypi q'ellu niray suphupas mana kaqtinqa, manallataq aycha qarapi p'aspapas ukhumanchu haykuqtinqa, 33chay runatan suphunta k'isuchinqa, ichaqa manan seqsi onqoy cheqastaqa k'isukunqachu, sacerdotetaq chay runata qanchis p'unchaytawanraq wisq'anqa. 34Qanchiskaq p'unchaypitaq sacerdoteqa chay seqsi onqoyta allinta qhawanqa, manataqchus onqoyqa aycha qarapi aqarinqachu, manataq aycha qara ukhumanchu haykunqa chayqa, sacerdoten chay runata ch'uya kasqanta sut'inchanqa. P'achankunatan t'aqsakunqa, ch'uyataq kapunqa. 35Ichaqa ch'uyayapusqan qhepatataqchus seqsi onqoyqa aycha qarapi aqaripushanqa chayqa, 36sacerdoten chayta allinta qhawanqa. Seqsi onqoytaqchus aycha qarapi aqaripushanqa chayqa, manañan sacerdoteqa q'ellu niray suphutaqa maskhanqachu. Chay runaqa qhellin. 37Ichaqa seqsi onqoytataqchus mana aqarishaqta hina reparanqa, chaypitaqchus yana suphu lloqsimunqa chayqa, chay seqsi onqoyqa alliyapusqañan. Payqa ch'uyan kapushan, ch'uya kasqantataq sacerdoteqa sut'inchanqa.
38Hinallataq qhariqpas otaq warmiqpas aycha qaranpi yuraq alqakuna kanqa chayqa, 39sacerdoten allinta qhawanqa. Aycha qaranpitaqchus yuraq niray alqakuna rikhurinqa chayqa, manan onqoychu. Chay runaqa ch'uyan.
40Piqpa chukchanpas urmaqtinqa, p'aqlan kapun, ichaqa ch'uyan. 41Piqpa mat'i chukchanpas urmaqtinqa, p'aqla mat'in kapun, ichaqa ch'uyan. 42P'aqlanpipas otaq mat'i p'aqlanpipas t'oqra-puka punkisqa kanqa chayqa, p'aqlanpi sayariq millay onqoymi. 43Sacerdoten chayta allinta qhawanqa, punkisqataqchus p'aqlanpipas t'oqra-puka kanqa, aycha qarapi millay onqoyman rikch'akuq chayqa, 44millay onqoymi, chay runaqa qhellin. Umanpi chay hina punkisqa kaqtinmi, sacerdoteqa qhelli kasqanta sut'inchanqa.
45Pipas millay onqoyniyoqqa llik'irqarisqa p'achayoq t'ampa umantinmi kanqa, simi patan pakasqataq qaparkachaspa purinqa: ¡Qhellin kani! ¡Qhellin kani! nispa. 46Chay millay onqoyniyoq kasqan tukuy tiempon qhelli kanqa, sapallantaq karpa-karpa hawapi tiyanqa.
47P'achapi qhoqayay kaqtinqa, millma p'achapiña, lino p'achapiña, 48lino awasqapiña, millma awasqapiña, qarapiña, qaramanta ima ruwasqapiña kaspapas, 49q'omer niray otaq puka niray kanqa chayqa, qhoqayay aqariymi, sacerdotemanmi chay qhoqayayta qhawachimunqa. 50Hinan sacerdoteqa chay qhoqayayta allinta qhawanqa, hinaspan qhoqayasqataqa qanchis p'unchayta wisq'anqa. 51Qanchiskaq p'unchaypitaqmi qhoqayasqata allinta qhawanqa, qhoqayaytaqchus aqarinqa p'achapipas, awasqapipas, qaramanta ima ruwasqapipas chayqa, ismuchiq qhoqayaymi, qhellin chayqa kanqa. 52Ruphachikunqan chay qhoqayasqakunaqa ismuchiq qhoqayay kasqanrayku.
53Ichaqa sacerdote allinta qhawaqtin chay qhoqayasqakunapi qhoqayayqa mana aqarinqachu chayqa, 54sacerdoten kamachikunqa chay qhoqayasqata t'aqsanankupaq, chaymantataq qanchis p'unchaytawan wisq'anqa. 55Chay qhoqayay t'aqsasqa kasqan qhepatataq sacerdoteqa allinta qhawanqa, qhoqayasqatataq mana huk niray kasqantachu rikunqa, chayqa qhellin, hinaña mana aqarinqachu chaypas. Mayneq ladopipas ismuchiq qhoqayayqa kachun, ninapipunin ruphachikunqa. 56Ichaqa sacerdote chayta allinta qhawaqtin, t'aqsasqamantaña qhoqayayqa mana yuraqñachu rikhurinqa chayqa, chaytan llik'inqa p'achamantapas, qaramantapas, awasqamantapas. 57Huktawantaqchus p'achapipas, awasqapipas, qaramanta ruwasqapipas rikhurinqa chayqa, aqarishanmi, chay qhoqayasqataqa ninapin ruphachikunqa. 58Ichaqa p'achatapas, awasqatapas, qaramanta imatawanpas t'aqsasqamanta qhoqayayqa chinkapunqa chayqa, huk kutitawanmi t'aqsakunqa, chaymi ch'uya kapunqa.
59Chaymi millma p'achapipas, lino p'achapipas, awasqapipas, qaramanta ruwasqa imapipas qhoqayaypaq kamachikuy simiqa, ch'uyatapas qhellitapas sut'inchanapaq, nispa.
Currently Selected:
LEVÍTICO 13: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
