LEVÍTICO 12
12
Wachakusqanmanta warmiq ch'uyanchakunan
1Señor Diosmi Moisesta nirqan: 2—Israel runakunata nimuy: Warmi wiksallikuspa qhari wawata wachakuqqa qanchis p'unchaymi qhelli kanqa, killan purinan p'unchaykunapi hinan qhelli kanqa. 3Pusaqkaq p'unchaypitaqmi wawaq qhari-kaynin qarachaqa kuchuqasqa kanqa. 4Mamantaq kinsa chunka kinsayoq p'unchaymantaraq yawarninmanta ch'uya kapunqa, manan Diospaq ima t'aqasqatapas tupaykunqachu, manan yupaychana karpatapas rinqachu ch'uyanchakuynin p'unchaykuna hunt'akunankama. 5Warmi wawatachus wachakunqa chayqa, killan purinan p'unchaykunapi hinan iskay semana qhelli kanqa, soqta chunka soqtayoq p'unchaymantaraqmi yawarninmanta ch'uya kapunqa.
6Ch'uyanchakuynin p'unchaykuna hunt'akuqtintaq, ima wawaña kaqtinpas, Dioswan Tupana Karpaman punkupi kaq sacerdoteman apamunqa ruphachina sacrificiopaq watayoq borregota, hucha pampachaypaqtaq malqo urpita mana chayqa kullkutapas. 7Sacerdotetaq chaykunata Señor Diosman haywanqa warmiq qhelli-kayninta ch'uyanchanapaq, hinan warmiqa yawar apayninmanta ch'uya kapunqa.
Chaymi wachakuq warmipaq kamachisqa simiqa. 8Huk borrego haywananpaq mana apaspanqa iskay kullkuta otaq iskay malqo urpita hap'inqa, hukninta ruphachina sacrificiopaq huknintataq hucha pampachay sacrificiopaq. Hinan sacerdoteqa chay warmiq qhelli-kayninta ch'uyanchanapaq haywanqa, chaymi ch'uya kapunqa, nispayki, nispa.
Currently Selected:
LEVÍTICO 12: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
