LEVÍTICO 14
14
Aycha qarapi onqoyniyoqkunaq ch'uyanchakunanpaq kamachikuykuna
1Señor Diosmi Moisesta nirqan: 2—Aycha qarapi millay onqoyniyoqta ch'uyanchanapaq kamachikuy simiqa kaymi:
Chay runatan ch'uyanchakunan p'unchaypi sacerdoteman pusamunqaku. 3Sacerdoten karpa-karpa hawaman pusaspa allinta payta qhawanqa. Millay onqoyniyoqtachus qhaliyapusqantaña rikunqa chayqa, 4chay ch'uyanchakuqmanmi iskay kawsashaq ch'uya pichinchutapas, cedro k'aspitapas, puka q'aytutapas, muñatapas apamunapaq kamachinqa. 5Chaymantataq sacerdoteqa kamachinqa pukyumanta horqomusqa unuyoq manka patapi huknin pichinchuta sipinapaq. 6Hinamantataq hap'inqa kawsashaq pichinchuta, cedro k'aspita, puka q'aytuta, muñatawan, hinaspa pukyumanta horqomusqa unu patapi sipisqa pichinchuq yawarninman chaykunata challpuykunqa. 7Hinaspataq millay onqoymanta ch'uyanchakuqman qanchis kutita ch'allaykunqa, ahinapin ch'uya kapusqanta sut'inchanqa. Chaymantataq kawsashaq pichinchuta campoman kacharparipunqa.
8Ch'uyanchakuqtaq p'achankunata t'aqsakunqa, llapa suphuntapas k'isukunqa, hinaspataq unuwan bañakuspa ch'uya kapunqa. Chaymantataq karpa-karpaman haykunqa, ichaqa qanchis p'unchaymi karpanpi mana tiyanqachu. 9Qanchiskaq p'unchaypitaq k'isukunqa llapan chukchanta, sunkhanta, ñawi qhechiphranta, tukuy suphuntawan. P'achankunatan t'aqsakunqa, cuerpontapas unuwanmi bañakunqa, ahinapin ch'uya kapunqa.
10Pusaqkaq p'unchaypin mana imanasqa iskay borregota apamunqa, mana imanasqa malta ovejatawan, ruru ofrendapaqtaq aceitewan chapusqa kinsa kilo ñut'u hak'utawan, kinsa cuarta aceitetawan. 11Ch'uyanchaq sacerdotetaq ch'uyanchakuqta chaykunatawan Señor Diosman qayllaykachinqa Dioswan Tupana Karpa punkuman. 12Sacerdoten huknin borregota hap'ispa kinsa cuarta aceitewan kutichipuna ofrendata haywanqa, chaytan Señor Diospaq sumaq sonqota t'aqanqa. 13Hinaspan chay borregota karpa kanchapi nak'ana cheqaspi nak'anqa, chaypin ruphachina sacrificiotapas hucha pampachaypaq sacrificiotapas nak'anku. Huchapaq nak'asqa hinan kutichipuna ofrendaqa sacerdotepaq. Chay ofrendaqa ancha ch'uyan.
14Hinamantataq sacerdoteqa kutichipuna ofrenda nak'asqaq wakin yawarninta hoqarispa llusiykunqa ch'uyanchakuqpa paña ninrin ura puntata, paña makinpa mama dedonta, paña chakinpa mama dedontawan. 15Hinallataqmi sacerdoteqa kinsa cuarta aceiteta hap'ispa wakinta lloq'e maki qochanman hich'aykunqa, 16hinaspan paña dedonta lloq'e makinpi kaq aceiteman chapuykuspa aceiteta dedonwan qanchis kutita Señor Diospa ñawpaqenman ch'allanqa. 17Hap'isqan puchuq aceitewantaq sacerdoteqa yawar pataman llusiykunqa ch'uyanchakuqpa paña ninrin ura puntata, paña makinpa mama dedonta, paña chakinpa mama dedontawan. 18Hap'isqan puchuq aceitetataq hich'aykunqa ch'uyanchakuqpa uman pataman. Chhaynatan sacerdoteqa chay runaq ch'uyanchakunanpaq Señor Diospa ñawpaqenpi ruwanqa.
19chaymantataq sacerdoteqa hucha pampachaypaq sacrificiota haywanqa, qhelli kasqanmanta chay runata ch'uyanchanapaq. Hinamantataq ruphachina ofrendata nak'anqa. 20Hinaspan sacerdoteqa ruphachina sacrificiotapas ruru ofrendatapas altar patapi haywanqa. Chay hinatan sacerdoteqa chay runaq huchan pampachaypaq ruwanqa, ch'uyataq kapunqa.
21Wakchataq mana aypakunchu chayqa, huk borregotan kutichipuna ofrendapaq apanqa, chaymi Señor Diospaq t'aqasqa kanqa. Apallanqataqmi ruru ofrendapaq aceiteyoq chapusqa huk kilo ñut'u hak'uta, kinsa cuarta aceiteta, 22iskay kullkutapas, mana chayqa iskay malqo urpitapas, aypasqanman hina. Hukninmi hucha pampachaypaq sipisqa kanqa, huknintaq ruphachina ofrendapaq kanqa. 23Pusaqkaq p'unchaypin chaykunata sacerdoteman apanqa, Dioswan Tupana Karpa punkuman, Señor Diospa ñawpaqenpi ch'uyanchakunanpaq. 24Sacerdotetaq hap'inqa kutichipuna ofrendapaq borregota kinsa cuarta aceitetawan, hinaspan chaykunata Señor Diospaq sumaq sonqota t'aqanqa. 25Kutichipuna ofrendapaq borregota nak'aspañataq wakin yawarninta hoqarispa llusiykunqa ch'uyanchakuqpa paña ninrin ura puntata, paña makinpa mama dedonta, paña chakinpa mama dedontawan. 26Hinaspan sacerdoteqa lloq'e maki qochanman wakin aceiteta hich'aykunqa. 27Paña makin huknin dedonwantaq lloq'e makinpi kaq aceiteta sacerdoteqa qanchis kutita Señor Diospa ñawpaqenman ch'allanqa. 28Hinallataqmi sacerdoteqa aceitewan yawar pataman llusiykunqa ch'uyanchakuqpa paña ninrin ura puntata, paña makinpa mama dedonta, paña chakinpa mama dedontawan. 29Hap'isqan puchuq aceitetataq ch'uyanchakuqpa umanman hich'aykunqa, chhaynatan sacerdoteqa chay runaq ch'uyanchakunanpaq Señor Diospa ñawpaqenpi ruwanqa.
30-31Hinallataqmi aypasqanman hina huknin kullkuta, mana chayqa huknin malqo urpitapas haywanqa hucha pampachaypaq, huknintataq ruphachina sacrificiota haywanqa, ruru ofrendatawan kuska. Chay hinatan sacerdoteqa Señor Diospa ñawpaqenpi ruwanqa chay ch'uyanchakuqpa huchan pampachaypaq.
32Chay hinaqa wakcha runa aycha qaranpi millay onqoyniyoq kanman, manataq ch'uyanchakunanpaq iman qona ofrendata haywayta atinmanchu chayqa, chay kamachikuyman hina ruwanqa, nispa.
Sallisqa wasikunata ch'uyanchanapaq kamachikuykuna
33Señor Diosmi Moisestawan Aarontawan nirqan: 34—Hap'ikapunaykichispaq ñoqaq qonay Canaán hallp'aman haykuqtiykichis, mayqen wasipipas salliyta rikhurichiqtiyqa, 35wasiyoqmi sacerdoteman willaq rinqa: Imachá wasiypi salliq hina rikhurin, nispa.
36Hinaqtinmi sacerdoteqa sallisqanta qhawaq manaraq haykushaspa wasita qasichinapaq kamachikunqa, ama imapas chaypi kaq qhellichakunanpaq. Chaymantañan sacerdoteqa chayta allinta qhawananpaq haykunqa.
37Chayta allinta qhawaspachus wasi perqakunapi sallisqata tarinqa q'omer niray khapusqakunata, chaykunataq perqa qhatapi aswan t'oqorqarisqa rikhurinqa chayqa, 38chaymantan sacerdoteqa lloqsinqa, hinaspan qanchis p'unchayta chay wasita wisq'anqa. 39Qanchiskaq p'unchaypitaqmi sacerdoteqa allinta qhawanqa, salliytaqchus wasi perqakunaman aqarinqa chayqa, 40sacerdoten kamachikunqa chay sallisqa rumikunata khakaspa llaqta hawapi qhelli cheqasman wikch'umunankupaq. 41Wasi ukhutataq muyuriqta qhetuchinqa, qhetusqanku hallp'atataq llaqta hawapi qhelli cheqasman hich'amunqaku. 42Hinaspan wak rumikunata hoqarispa khakasqa rumikunaq kasqanta perqanqaku, hinallataq mosoq pachaswan wasita llut'anqaku.
43Rumipas khakasqa, wasi qhatapas qhetusqa, hinaspa llut'apasqa qhepataña chay wasipi salliyqa rikhurillanqataq chayqa, 44sacerdoten haykullanqataq hinaspa chayta allinta qhawanqa. Salliytataqchus wasipi aqarisqata tarinqa chayqa, wasita khapuq salliymi, chayqa qhellin. 45Chaymi chay wasitaqa thuninqaku. Wasiq ruminkunata, k'aspinkunata, hallp'antawantaq llapallanta llaqta hawapi qhelli cheqasman horqonqaku. 46Wisq'asqa kashasqan p'unchaykunapi pipas chay wasiman haykuqqa, ch'isinkaman qhelli kanqa. 47Chay wasipi puñuqpas mikhuqpas p'achankunatan t'aqsakunqa.
48Ichaqa sacerdote haykuspa chayta allinta qhawaspa, llut'apasqa qhepataña chay salliypa mana aqarisqanta rikunqa chayqa, chay wasiq ch'uya kasqantan sut'inchanqa salliypa chinkapusqanrayku. 49Chaymantataq chay wasita ch'uyanchanapaq hap'inqa iskay pichinchuta, cedro k'aspita, puka q'aytuta, muñatawan. 50Hinaspan pukyumanta horqosqa unuyoq manka patapi huknin pichinchuta sipinqa. 51Cedro k'aspita, muñata, puka q'aytuta kawsashaq pichinchutawan hap'ispataq, pukyumanta horqomusqa unu patapi sipisqa pichinchuq yawarninman chaykunata challpuykunqa. Hinamantataq wasita qanchis kutita ch'allanqa. 52Chay hinatan wasita ch'uyanchanqa pichinchu yawarwan, pukyumanta horqomusqa unuwan, kawsashaq pichinchuwan, cedro k'aspiwan, muñawan, puka q'aytuwan ima. 53Kawsashaq pichinchutataq llaqta hawa campoman kacharparipunqa. Chay hinatan wasita ch'uyanchanapaq ruwanqa, hinan ch'uya kapunqa.
54Chay kamachikuykunan llapa aycha qarapi millay onqoypaq, seqsi onqoypaq, 55p'achapi qhoqayaypaq, wasipi salliypaq, 56punkisqapaq, pukayasqapaq, k'anchashaq aycha qarapaqwan. 57Chay kamachikuykunaqa hayk'aqchus qhelli, hayk'aqchus ch'uya kasqanta yachanapaqmi, nispa.
Currently Selected:
LEVÍTICO 14: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
