LEVÍTICO 11
11
Mikhuna mana mikhuna animalkuna
(Dt 14.3-21)
1Señor Diosmi Moisestawan Aarontawan nirqan: 2-3—Israel runakunata nimuychis: Campo animalkunamantaqa mikhuwaqchismi mayqenpas p'alqa phapatuyoq kutirpakuqta. 4Ichaqa kutirpakuqkunatapas p'alqa phapatuyoqkunatapas aman mikhunkichischu. Camelloqa kutirpakunmi ichaqa llama hina phapatuyoqmi, chayqa mana mikhunan qankunapaqqa kanqa. 5Ama mikhuychischu k'ita qowitapas, kutirpakunmi ichaqa manan p'alqa phapatuyoqchu, chayqa mana mikhunan qankunapaqqa kanqa. 6Ama mikhuychischu wisk'achatapas, kutirpakunmi ichaqa manan p'alqa phapatuyoqchu, chayqa mana mikhunan qankunapaqqa kanqa. 7Ama mikhuychischu khuchitapas, p'alqa phapatuyoqmi ichaqa manan kutirpakunchu, chayqa mana mikhunan qankunapaqqa kanqa. 8Aman chay animalkunaq aychantaqa mikhunkichischu, amallataq chaykuna wañusqatapas llamiykunkichischu. Chaykunaqa qankunapaqqa mana mikhunan kanqa.
9Mama qochapipas mayukunapipas tiyaq animalkunataqa pharpayoqkunatan sarphayoqkunatan mikhunkichis. 10Ichaqa mama qochapipas mayukunapipas mana pharpayoq mana sarphayoq animalkunataqa millakunkichismi. 11Aman chay animalkunaq aychantaqa mikhunkichischu, chay wañusqakunatapas millakunkichismi. 12Unupi kaq tukuy mana pharpayoqkunataqa mana sarphayoqkunataqa millakunkichismi.
13Phalaq animalkunataqa kaykunatan millakuspa ama mikhunkichischu: ankata, kunturta, qocha ankata, 14k'illinchata, tukuy t'aqa ankata, 15tukuy t'aqa alqamarita, 16surita, ch'useqta, tukuy t'aqa wamanta, 17hukuta, cormoranta, pikpirita, qellwaytuta, 18cisneta, pelicanota, suweq'arata, 19cigüeñata, tukuy t'aqa waqarta, abubillata, masu huk'uchata ima.
20Tawa chakiwan puriq raphrayoq llapa kurutaqa millakunkichismi. 21Chaywanpas tawa chakiwan puriq raphrayoq llapa kurutaqa mikhuwaqchismi ichaqa chakinkunamanta moqoyoqmi kanan chaykunawan t'iwkananpaq. 22Mikhuwaqchismi tukuy t'aqa langostata, tukuy t'aqa ch'illikuta, tukuy t'aqa t'isku-t'iskutapas. 23Wakin raphrayoq tawa chakiyoq kurutaqa millakunkichismi.
24-28Qankunapaqqa mana mikhunan kanqa kay animalkuna: llapa mana p'alqa phapatuyoq mana kutirpakuq animalpas, llapa tawa chakiyoq chaki planta silluwan puriq animalpas. Pipas chay animalkunaq wañusqa cuerponta tupaykuqqa ch'isinkaman qhelli kanqa, pipas chay wañusqakunata hoqariqpas p'achankunatan t'aqsakunqa, ch'isinkamataq qhelli kanqa.
29-30Pampanta puriq huch'uy animalkunaqa kaykunan qankunapaq mana mikhuna kanqa: achuqalla, huk'ucha, tukuy t'aqa qaraywapas. 31Chay animalkunan qankunapaqqa mana mikhuna kanqa, pipas chay wañusqakunata tupaykuqqa ch'isinkaman qhelli kanqa.
32Ima patamanpas chay wañusqakuna urmaykunqa chayqa, qhellin chayqa kanqa, k'ullupas, p'achapas, qarapas, costalpas, ima ruwanapiwanpas. Unuman chapusqan kanqa, ch'isinkamataq qhelli qhepanqa, chaymantañan ch'uya kapunqa.
33Chay huknin wañusqachus ima t'uru mankamanpas urmaykunqa chayqa, chay ukhupi kaqkunantinmi qhelli kanqa, mankatapas p'akipunkichismi. 34Chay manka unu ima mikhunamanpas hich'aykukunqa chayqa, chay mikhunaqa qhellin kanqa. Ima ukyanapas chay mankapi kaqqa qhellin kanqa.
35Chay wañusqakuna ima patamanpas urmaykuspaqa qhellichanqan. Hornotapas q'onchatapas thuninkichismi, qhellin chaykunaqa qankunapaqqa kanqa. 36Unu pukyuwan p'uytullawanmi ichaqa ch'uyallapuni kashanqa, aswanpas chay wañusqakunata tupaykuqqa qhellin kanqa.
37Chay animalkunamanta mayqen wañusqapas urmaykunqa tarpunapaq kaq ima muhumanpas chayqa, manan qhellichasqachu kanqa. 38Chay mayqen wañusqapas chullusqa muhuman urmaykunqa chayqa, qankunapaqqa chay muhuqa qhellin kanqa.
39Mikhunaykichis ima animalpas wañunqa chayqa, chay wañusqata tupaykuqqa ch'isinkaman qhelli kanqa. 40Pipas chay wañusqa aychata mikhuqpas hoqariqpas p'achankunatan t'aqsakunqa, ch'isinkamataq qhelli kanqa.
41-42Pampanta puriq llapa huch'uy animalqa millaymi: qhasqonwan suchuqpas, tawa chakinwan puriqpas, askha chakiwan puriqpas. Chaykunataqa aman mikhunkichischu. 43Ama chay animalkunawanqa map'achakuychischu qhellichakuychischu, amataq chaykunawanqa qhellichachikuychischu. 44Ñoqan Apu Señor Diosniykichis kani, qankunaqa ñoqapaq t'aqasqa kaychis, ch'uya kaychis ñoqa ch'uya kasqayrayku. Ama pampanta suchuq mayqen animalwanpas qhellichakuychischu. 45Ñoqan Señor Diosqa kani, Diosniykichis kanaypaqmi Egipto suyumanta horqomurqaykichis. Ch'uya kaychis ñoqa ch'uya kasqayrayku.
46Chaykunan uywakunamanta kamachisqa simiqa, hinallataq phalaq animalkunamantapas, unupi kaq llapa kawsaqkunamantapas, pampanta puriq llapa huch'uy animalmantapas. 47Qankunaqa reqsinaykichismi qhellikaqtawan mana qhellikaqtawan, mikhuna animalkunatapas mana mikhuna animalkunatapas, nispaykichis, nispa.
Currently Selected:
LEVÍTICO 11: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
