ISAÍAS Qelqaq Qallariynin
Qelqaq Qallariynin
Cristoq nacenanpaq qanchis pachak wata kurakraq kashaqtinmi Isaiasqa ancha reqsisqa profeta karqan.
Kay libropin willakun Diospa atiyniyoq-kayninmanta munayniyoq-kayninmanta, ch'uyay-ch'uya kayninmantawan. Willakullantaqmi Diosqa hinantin suyukunapi tukuy tiempo kamachikusqanta. Chaymi Isaiasqa llaqtata anyaykun Dios hina ch'uyata kawsananpaq, Diospa munayninta kasukunanpaqwan.
Kay libroqa kinsa hatun t'aqamanmi t'aqakun. Ñawpaqkaq t'aqapin (1-39) willakun Judá suyuqa Asiria suyuq manchachisqan kasqanta. Chaywanpas Isaiasqa Judá runakunaq huchanmantan astawanqa riman Asiria suyu manchakunamantaqa. Payqa llaqtatapas kamachikuqkunatapas tukuy sonqowanmi rimaykun cheqaq chaninta kawsanankupaq. Hinaspan paykunaman willan qhepamanqa Davidpa mirayninmanta allin rey sayarinanta, chaypacha sumaq sami kawsay hallp'a pachantinpi kananta.
Iskaykaq t'aqapi (40-55) willakun Judá runakunaqa Babilonia suyupi manchay llakipi kapusqankuta. Chay hinapi kashaqtinkun Diosqa sumaqta kallpachaykun, payqa manan llaqtanta wikch'unchu aswanmi Babiloniamanta kacharichispa wakmanta pusapunqa. Hinaspan kutichimusqan runakunata kamachin llapa hatun suyukunaman Diosmanta willakunankupaq. Chaypiqa rikhurillantaqmi Señor Diospa kamachin nisqa runapas, paymi hukkunaq huchanmanta muchun, paywanmi Diosqa llaqtanta qespichin.
Kinsakaq t'aqapiqa (56-66) Jerusalenman kutimuq llaqtantan Diosqa anyaykun chanintapuni purinanpaq, samana p'unchayta waqaychananpaq, paymanta mañakunanpaq, sacrificiokunata haywananpaqwan. Chaymantataqmi Diosqa llaqtanta kallpachaykun prometesqankunata hunt'ananpaq willaspa.
Kay libropin kaykunamanta willakun:
1.1—12.6 Diospa anyaykuspa willasqankuna prometesqankunapiwan.
13.1—23.18 Suyukunaq ñak'arichisqa kanankumanta.
24.1—27.13 Kay pachata Diospa muchuchinanmanta.
28.1—35.10 Diospa anyaykuspa willasqankuna prometesqankunapiwan.
36.1—39.8 Judá rey Ezekiasmanta Asiria suyumantawan willakuykuna.
40.1—55.13 Diospa llaqtanta kallpachaspa willasqankuna.
56.1—66.24 Diospa anyaykuspa willasqankuna prometesqankunapiwan.
Currently Selected:
ISAÍAS Qelqaq Qallariynin: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.