ISAÍAS 60
60
Jerusalenpa qhepaman qhapaq kanan
1Jerusalén, sayariy, k'anchariy,
Señor Diosmi k'anchaykamusunki,
lliphipiyninmi k'anchaykamusunki.
2Laqhayaqmi hallp'a pachaman mast'arikun,
tutayaqmi hatun suyukunata tutayaykun,
qanmanqa Señor Diosmi k'anchaykamusunki,
lliphipiyninmi k'anchaykamusunki.
3Hatun suyukunapas k'anchayniykimanmi hamunqaku,
reykunapas illariyniyki k'anchaymanmi hamunqaku.
4Muyuriqniykita qhawariy:
Runaykikunan huñukamuspa hamushasunki,
churiykikunan karumanta chayamunku,
ususiykikunan marq'api hamunku.
5Qanqa chaykunata rikuspan anchata kusikunki,
sonqoykin kusikuymanta q'ochukunqa.
Hatun suyukunaq qhapaq-kayninkunatan apamusunkiku,
mama qocha chimpamantan qhapaq-kayninkuta chayachimusunkiku.
6Askhallaña camellokunan hunt'aykamusunki,
Madián runakunaq Efa runakunaq malta camellonkunan hamusunki,
chay uywakunan Sabá suyumanta chayamunqaku
qori q'epintin incienso q'epintin,
runakunataq Señor Diosta yupaychaspa hamunqaku.
7Kidar runakunaq llapa uywanmi qanman qatimusqa kanqa,
Nebaiot runakunaq anejonkunan qanpaq kanqa,
chaykunan altarpi Señor Diosman haywasqa kanqa,
paytaqmi sumaqta chaskinqa,
yupaychana qhapaq wasintapas astawanmi sumaqchanqa.
8¿Imakunataq chay phuyu hina phawaq barcokunaqa?
¿Pikunataq q'esankuman phawaq urpikuna hina hamushanku?
9Karumanta hamuq barcokunan kashan,
mama qocha ukhunta puriq hatun barcokunan ñawpamushan
wawaykikunata karumanta apamuspa.
Paykunawan kuskatan qolqenkutapas qorinkutapas apamushanku
Apu Señor Diosniykita yupaychanankupaq,
Israelpa Ch'uya Diosninta qhapaqchanankupaq.
Paymi hatunchasunki.
10Señor Diosmi Jerusalenta nin:
Wak llaqtayoqkunan perqaykikunata wakmanta perqanqaku,
reyninkun kamachiykita ruwanqaku.
K'arakta phiñakuspaymi muchuchirqayki,
sumaq sonqo kaspaytaqmi khuyapayarqayki.
11Llaqta punkuykikunaqa kicharayashallanqapunin,
manan p'unchaypas tutapas wisq'akunqachu,
hatun suyukunaq qhapaq-kayninkuna qanman apaykusqa kananpaq,
atipasqa reyninkupas pusaykusqa kanankupaq.
12Kamachiykita mana ruwaq hatun suyupas chinkanqan,
chay suyukunaqa ch'usaqyachisqan kanqa.
13Líbano orqo-orqopi sumaqnin sach'akunan chayamusunki,
ch'uya wasiyta sumaqchanapaqmi
cipreskunata, pinokunata, huk sach'akunatapas apamusunkiku.
ahinatan tiyasqay wasita qhapaqchasaq.
14Sarunchaqniykikunaq churinkunan k'umuykukuspa hamusunkiku,
pisichaqniykikunan llapallanku k'umuykamusunkiku,
hinaspan sutichasunkiku: Señor Diospa Llaqtan,
Israelpa Ch'uya Diosninpa Sión Llaqtan, nispa.
15Wikch'usqan cheqnisqan karqanki,
manan pipas qan ukhunta purirqanchu,
kunanqa qhapaq llaqtamanmi wiñaypaq tukuchisqayki,
qanta rikuspan sapanka miray runa kusikunqa.
16Hatun suyukunan allinnin mikhunawan uywasunkiku,
reykunan qhapaq-kayninkuta apamusunkiku,
hinan yachanki Qespichiqniyki Kacharichiqniyki kasqayta,
Jacobpa Atiyniyoq Diosnin kasqayta.
17Bronce apamunaytan qorita apamusqayki,
fierro apamunaytan qolqeta apamusqayki,
kurku apamunaytan bronceta apamusqayki,
rumi apamunaytataq fierrota apamusqayki.
Kamachikuqniykikunaqa manañan muchuchisunkikuchu,
aswanpas chanin-kaymi thak kawsaymi suyuykiman hunt'aykunqa.
18Manañan hayk'aqpas suyuykipi maqakuy uyarikunqachu,
manañan pipas suyuykipi thuniqpas purunyachiqpas kanqachu,
aswanmi perqaykikunata “Qespikuy” nispa sutichanki,
punkuykikunatapas “Yupaychay” nispa sutichanki.
19Intiqa manañan p'unchaypi k'anchaykuqniykichu kanqa,
manan killaq k'anchayninpas tuta k'anchaykusunkichu,
aswanpas ñoqa Señor Diosmi wiñaypaq k'anchaykusqayki,
ñoqa Diosniykin sumaqta lliphipiykusqayki.
20Manan intiykiqa hayk'aqpas haykunqachu,
manan killaykipas tutayanqachu,
ñoqa Señor Diosmi wiñaypaq k'anchaykusqayki,
manañan hayk'aqpas llakikunkiñachu.
21Runaykikunaqa chaninkaman kanqaku,
wiñaypaqmi suyunkuta hap'inqaku.
Ñoqan paykunata ruwarqani,
suyunkupipas plantarqani ñoqa qhapaqchasqa kanaypaqmi.
22Paykunamanta aswan huch'uymi hatun aylluman tukupunqa,
aswan pisipaq qhawarisqan mentasqa suyuman tukupunqa.
Ñoqan Señor Diosqa kani,
tiempollanpin chayta usqhaylla hunt'achisaq, nispa.
Currently Selected:
ISAÍAS 60: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
