ISAÍAS 58
58
Cheqaq ayunay
1Señor Diosmi niwarqan:
Kunkayoqta qapariy, ama upallakuychu,
pututuq waqasqanta hina qapariy,
mana kasukusqanta llaqtayman willay,
huchankunamanta Jacobpa mirayninta anyay.
2Paykunan sapa p'unchay yupaychayta munawanku,
munayniyman hinan kawsayta munanku
chaninkaqta ruwaq runakuna hina,
Diosninkuq kamachikusqan simita kasuqkuna hinapuni.
Chaninta kawsanankupaqmi tapukuwanku,
yupaychaytan munawanku.
3Paykunan niwanku:
¿Imapaqmi ayunayku, manataq rikunkichu chayqa?
¿Imapaqmi k'umuykukuyku, manataq reparankichu chayqa? nispa.
Ñoqataq paykunaman kutichini:
Ayunasqaykichis p'unchaypin ima munasqaykichista ruwankichis,
qankunapaq llapa llank'aqkunatapas sarunchankichismi.
4Ayunayniykichistaqa ch'aqwaspan maqanakuspan tukunkichis,
mana chanintan saqmanakunkichis.
Qankunachus chay hinata ayunankichis chayqa,
manan mañakusqaykichista uyarimusqaykichischu.
5Ayunaspaykichisqa qankuna kikillaykichistan muchuchikunkichis,
t'otora hinan k'umurayankichis,
yana qhasqa p'achawan churaykusqan uspha patapi siriykunkichis.
¿Chaychu ayunoqa qankunapaq?
¿Chaywanqa ñoqa kusikushanichu? ¡Manan!
6Aswanpas kay hinatan ayunanaykichistaqa munani:
Qankunaqa mana chaninpi watasqaykichiskunatan kacharipunaykichis,
manañan runata mat'inaykichischu,
sarunchasqakunatan kacharipunaykichis,
manañan pitapas muchuchinaykichischu,
7yarqasqamanmi mikhunata haywarinaykichis,
mana wasiyoq wakchakunatapas wasiykichispin qorpachanaykichis,
mana p'achayoqta rikushaspaykichispas p'achachinaykichismi,
wawqeykichiskunatapas yanapaykunaykichismi.
8Chay hinata ruwaqtiykichismi,
pacha illariy inti hina k'anchaykamusunkichis,
k'iriykichispas usqhayllan qhaliyanqa.
Chay chanin ruwasqaykichismi ñawpaqeykichista rinqa,
atiyniywantaq qhepaykichismanta waqaychasqaykichis.
9Chaypacha waqyakamuwaqtiykichismi, ñoqa kutichimusqaykichis,
yanapaykunaypaq qaparimuqtiykichismi: Uyarishaykichismi, nispa nimusqaykichis.
Manachus pitapas astawan mat'inkichis chayqa,
manachus pitapas ima nispapas manchachinkichis chayqa,
manachus pimantapas ima millaytapas rimankichis chayqa,
10mikhunaykichistapas yarqasqamanchus haywarinkichis chayqa,
llakisqa runatachus allintapuni yanapaykunkichis chayqa,
muyuriqniykichis laqhapin k'anchayqa k'anchaykusunkichis,
laqhayaqniykichispas chawpi p'unchay k'anchay hinan kanqa.
11Ñoqaqa pusallasqaykichispunin,
ch'inneqkunapin saksata mikhuchisqaykichis,
cuerpoykichistan kallpachasqaykichis.
Hinan allin qarpasqa huerta hina kankichis,
unuyoqllapuni pukyu hina kankichis.
12Qankunan ñawpa raqaykunata wakmanta perqankichis,
ñawpa p'unchaykunapi perqasqa teqsikuna patapin perqankichis.
Qankunamantan ninqaku: Q'asakunatan allicharqanku,
wasikunayoq callekunatan wakmanta ruwarqanku, nispa.
Samana p'unchaymanta
13Ama samana p'unchayta pisichaychischu,
ama ch'uya p'unchayniypi llank'aychischu.
Samana p'unchayta kusikuna p'unchaypaq qhawariychis,
ch'uya p'unchayniyta allinpaq hap'iychis.
Chayta allinta rikuychis
ama ima ruwanaykichiskunamanpas sonqollikuspaykichis,
ama llank'aspaykichis,
ama yanqakunata rimaspaykichis.
14Hinatachus ruwankichis chayqa,
serviwaspaykichismi kusikunkichis,
ñoqataq sumaqtapuni pusasqaykichis,
hinan qankunaqa taytaykichis Jacobman qosqan suyupi kusikunkichis, nispa.
Señor Diosmi chayta nin.
Currently Selected:
ISAÍAS 58: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
