ISAÍAS 57
57
Israelmi ídolo yupaychasqanmanta huchachasqa rikukun
1Chanin runakunan wañunku,
manataq pipas chayta kasunchu,
Dios sonqo runakunapas wañunkun,
manataq pipas entiendenchu
llakiq qayllanmanta chanin runaq karunchasqa kasqanta.
2Chaninta kawsaqkunaqa aya p'ampanapin samakunku,
thak-nisqataq kanku.
3Qankunan ichaqa layqakuna kankichis,
qhellipi puriqkunan wasanchaqkunan kankichis,
chayrayku juzganaman hamuychis.
4¿Pitataq asipayashankichis?
¿Pitataq pisichankichispas k'aminkichispas?
Qankunaqa huchasapakunan llullakunan kankichis.
5Llapa encina mallki k'uchupi,
llapa k'allmasapa sach'a chakipi
idolokunata yupaychaspa t'inkikunkichis.
Mayu patakunapi qaqa k'aktukunapi
wawakunata wañuchispa idolokunaman haywankichis.
6Qankunaqa chaypi kaq llusk'a rumikunata akllakuspan
idolokunaman tukuchinkichis yupaychanaykichispaq.
Chaykunamanmi vinota ch'uyashankichis,
ruru ofrendatapas haywashankichis,
ñoqari, ¿chaykunata hinallatachu qhawasaq?
7Hatunkaray orqo patapin puñunaykita mast'arqanki,
chaymanmi sacrificiokunata haywanaykipaq wicharqanki.
8Punku qhepapin idolokunata churakurqanki.
Qonqapuwarqankin ch'utikurqankin,
hinaspan munaqniykikunawan puñunaykipi siriykurqanki,
qanwan puñunankupaqmi paykunaman pagarqanki,
paykunawanmi anchatapuni qhellichakurqanki.
9Hawina aparisqan Molok nisqa idoloman rirqanki,
askha q'apaqkunatan payman aparqanki.
Kachapurikunatapas karumanmi kacharqanki
wak dioskunata maskhamunankupaq,
Wañuy-pachakamaraqmi paykunataqa uraykachirqanki.
10Sinchita purispaykin sayk'urqanki,
manataqmi nirqankichu: Saqepusaq, nispaykiqa.
Aswanpas wakmantan kallpachakurqanki,
chaymi mana pisi kallpayarqankichu.
11¿Pitan manchakunkipas yupaychankipas
mana iñiwanaykipaq mana yuyariwanaykipaq,
chaykunata mana reparanaykipaq?
Unayñan upallakurqani,
¿chaychu mana manchakuwanki?
12Qanqa chanin kawsasqaykipaqmi yuyakunki,
ñoqataqmi ruwasqaykikunata sut'inchasaq,
diosniykikunaqa manan yanapayta atisunkichu.
13Waqyakuqtiykiqa, manan idoloykikunaqa qespichisunkichu,
llapallankutan wayraqa apanqa,
hukllatan chaykunataqa phukurparinqa.
Ñoqaman k'askakuqmi ichaqa kay suyuta hap'ikapunqa,
ch'uya orqoytapas hap'inqa.
14Señor Diosmi nin:
Allin t'aqtasqatapuni ñanta ruwaychis,
misk'anakunata llaqtaypa pasananpaq wikch'uychis.
15Ñoqan kani Qollana Diosqa,
ñoqan kani Ch'uya Diosqa,
ñoqan wiñaypaq kawsani.
Ñoqaqa hanaqpin ch'uya cheqaspin tiyani,
chaypas huchanta reqsikuqwanmi k'umuykukuq sonqoyoqwanmi kashani,
k'umuykukuqkunata kallpachanaypaq,
huchankuta reqsikuqkunaq sonqontapas kawsarichinaypaq.
16Manan wiñaypaqchu llaqtayta muchuchisaq,
manan wiñaypaqpaschu phiñakusaq,
paqtan kamasqay runakunaqa ñawpaqeypi pisi kallpayankuman.
17Munapakusqanraykun phiñakurqani,
muchuchirqanin, phiñakuspaymi saqerparirqani,
paymi ichaqa mana kasukuspa sonqonwan aysachikurqan,
18ñoqataqmi imayna purisqanta rikurqani,
chaypas paytaqa qhaliyachisaqmi,
paytaqa pusaspaymi sonqochasaq,
wañuqmanta llakikuqkunatapas kusisqatan takichisaq.
19Karupi kaqkunatapas qayllapi kaqkunatapas:
Thak-kay qankunapaq kachun, nisaqmi,
llaqtaytaqa qhaliyachisaqmi, nispa.
20Mama qochaqa mana thanispan aytin,
ununmi t'uruta qhellitawan qhellamun,
chay hinan millay runakunaqa kanku.
21Millay runakunapaqqa manan thak kawsayqa kanchu,
nispan nin Diosniyqa.
Currently Selected:
ISAÍAS 57: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
