ISAÍAS 56
56
Diospa rimanakusqanta waqaychaqkunaq samin
1Señor Diosmi nin:
Chaninkaqta ruwaychis,
chaninta kawsaychis,
usqhaymanñan qespichisaq,
hamushaniñan kacharichinaypaq.
2Kusisamiyoqmi chayta ruwaq runaqa.
Paychus samana p'unchayta mana sarunchaspa waqaychan,
manataq ima mana allintapas ruwanchu chayqa,
ñoqan payta saminchasaq.
3Ñoqa Señor Diosman k'askakuq wak llaqtayoqpas ama nichunchu:
Señor Diosmi llaqtanmanta t'aqapuwanqapuni, nispaqa.
Ama kapasqa runapas nichunchu:
Ñoqaqa ch'akisqa mallki hinan kapuni, nispaqa.
4Kapasqa runakunachus samana p'unchayniykunata waqaychanku,
imachus munasqaytapas hunt'anku,
rimanakusqayman hinachus kawsanku chayqa,
5ñoqan yupaychana wasipipas churasaq
sutinkuwan qelqasqa saywa rumita,
chaymi chaykunaqa wawayoqkunamantapas aswan yuyarisqaraq kanqa,
paykunaqa mana hayk'aq chinkaq sutiyoqmi kanqaku.
6Wak llaqtayoqkunachus k'askakamuwankuman ñoqa Señor Diosta serviwanankupaq,
munakuwaspankuchus yupaychawankuman,
samana p'unchaytapas mana sarunchaspa waqaychankuman,
rimanakusqayman hinachus kawsankuman chayqa,
7ñoqan chaykunataqa ch'uya orqoyman pusamusaq,
hinaspan mañakuna wasiypi paykunata kusichisaq.
Altarniy patapi ruphachisqa sacrificionkunatapas,
wak sacrificionkunatapas chaskisaqmi,
wasiyqa “llapa llaqtakunaq mañakuna wasi” nisqanmi kanqa.
8Ñoqan Qollana Señor Diosqa kani,
Israel suyumanta ch'eqerisqakunata huñuykamuqmi kani,
huñuykamusqay runakunamantapas astawanraqmi huk suyukunamantapas huñuykamusaq, nispa.
Millay umalli runakunan anyaykusqa kanku.
9Salqa phiña animalkuna, hamuychis,
monte llapa animalkuna, paykunata mikhurqoq hamuychis.
10Israelta qhawaq umallikunaqa ñawsakaman kanku,
manan imatapas yachankuchu,
llapallankun upa alqokuna kanku,
manan kanikuyta atinkuchu,
paykunaqa chutarayaspan mosqokushanku,
puñuylla-puñuqkunan kanku.
11Paykunaqa rakrapu alqokuna hinan mana saksankuchu,
michiqkuna kaspapas manan imatapas yachankuchu,
sapankan ima munasqankuta kawsanku,
sapankan allinnillankuta maskhanku.
12Paykunan takin:
Haku, vinota ukyamusun,
haku, aqhawan machamusun,
paqarinpas kay p'unchay hinallataqmi kanqa,
aswan allinraqchá kanqapas, nispa.
Currently Selected:
ISAÍAS 56: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
