ISAÍAS 49
49
Señor Diospa kamachin
1Qocha patapi kaq suyukuna, uyariwaychis,
karupi kaq hatun suyukuna, maki uyariwaychis.
Señor Diosmi manaraq naceshaqtiy waqyawarqan,
mamaypa wiksanpi kashallaqtiyraqmi akllakuwarqan.
2Rimasqaytan filoyachisqa espadata hina ruwarqan,
maki llanthunwanmi pakaykuwarqan,
ñawch'iyachisqa wach'ita hinan ruwawarqan,
hinaspan wach'ina waqaychananpi pakaykuwarqan.
3Niwarqanmi: Israel, qanmi kamachiy kanki,
qan hawan hatunchasqa kasaq, nispa.
4Ñoqataq nirqani: Yanqan llank'arqani,
mana imapaqmi kallpayta tukurqani.
Chaypas Señorniymi: Allinmi, nispa chaninchawanqa,
Diosniymi premiota haywariwanqa, nispa.
5Señor Diosmi manaraq naceshaqtiy
kamachin kanaypaq ruwawarqan,
Jacobpa mirayninta payman kutichinaypaq akllawarqan,
ch'eqechisqa Israel runakunata payman huñumunaypaq.
Paymi hatunchawanpas kallpachawanpas.
6Paymi niwan:
Qanmi kamachiyqa kanki
Jacobpa ayllunkunata wakmanta sayarichinaykipaq,
Israel runakunamanta puchuqta kutichimunaykipaq.
Kay llank'anamanqa aswan hatun llank'anataraqmi yapaykusqayki,
hatun suyukunata k'anchanaykipaqmi qanta churasqayki,
kay pachantin runakuna qespichisqay kanankupaq, nispa.
7Señor Diospa kamachinmi hatun suyukunaq pisichasqan cheqnisqan kashan,
kamachikuqkunaq kamachinmi kashan,
ichaqa Israelta kacharichiq Señor Diosmi,
Israelpa Ch'uya Diosninmi payta nin:
Israelpa Ch'uya Diosninmi akllakurqayki,
ñoqa Señor Diosmi simiyta hunt'ani,
chaymi reykuna rikusunkiku hinaspan sayaykunqaku,
kamachikuqkuna rikusunkiku, hinaspan k'umuykamusunkiku, nispa.
Jerusalenta wakmanta sayarichinapaq Diospa rimarisqan
8Wakmanta qanta sumaqta qhawarispaymi uyarisqayki,
qespichinaypaq hamuspaymi yanapasqayki.
Ñoqan waqaychasqayki,
hinan runakunawan sutiypi rimanakunki.
Ñoqataq wakmanta suyuta t'ikarichisaq,
purunyachisqa hallp'akunata rakisaq.
9Presokunata: Lloqsiychis, nisaq,
laqhayaqpi kaqkunatapas: Rikuchikuychis, nisaq.
Kutimuspankun llapa ñan patakunapi oveja hina michisqa kanqaku,
llapa q'ara orqokunapipas q'achuta tarinqaku.
10Manan yarqachikunqakuchu ch'akichikunqakupaschu,
manan rupha wayrapas intipas paykunata muchuchinqachu,
ñoqan paykunata khuyapayasaqpas pusasaqpas,
unu pukyukunamanmi paykunata pusasaq.
11Llapa orqokunapin ñanta kichasaq,
purinankunapas pampayachisqan kanqa.
12¡Qhawariychis! ¡Karumantan hamunku,
wakinmi wichaymanta, wakintaq inti haykuymanta,
wakintaq Egipto suyupi Aswán nisqa llaqtamanta!
Señor Diosmi llaqtanta sonqochaykunqa,
wakcha runakunatan llakipayanqa,
13chayrayku, hanaq pacha, ¡kusisqa takiy!
Hallp'a pacha, ¡anchata kusikuy!
Orqokunapas, ¡kusisqa qapariychis!
14Jerusalenmi ichaqa nirqan:
Señormi saqerpariwarqan,
Diosmi qonqarpariwarqan, nispa.
15Chaymi Señor Diosqa nin:
¿Warmiqa ñuñusqan wawata qonqanmanchu?
¿Wachakusqan wawata mahipunmanchu?
Payña qonqapunqa chaypas,
manan ñoqaqa qonqasqaykichu.
16Ñoqaqa maki qochaypi k'iñasqatan hap'isqayki,
qhawashallanipunin perqaykikunataqa.
17Wakmanta perqaqniykikunaqa usqhayllan hamushanku,
raqayman tukuchiqniykikunataqmi qayllaykimanta ripunku.
18¡Muyuriqniykita qhawariy!
Llapallankun wawaykikuna huñuykukunku,
hinaspan qanman hamusunkiku.
Ñoqa Señor Diosmi sutiypi jurani,
paykunan sumaq rikch'ayniyoqman tukuchisunki,
hinan qanqa sumaqchasqa novia hina kapunki.
19Hatun suyuykiqa thunisqan kasharqan,
soqyayachisqa, purunyachisqa,
kunantaqmi thuniqniykikunaqa karupi kashanku,
hallp'aykiqa runaykikunapaq huch'uyllan kanqa.
20Manaña kapunanpaq yuyasqayki wawakunapas
ninriykimantan rimaykusunkiku:
Kay cheqasqa ñoqaykupaq sinchi huch'uyllan,
huk cheqasta tiyanaykupaq qowayku, nispa.
21Hinan qanqa sonqoykipi ninki:
¿Pitaq kay wawakunatari wachapuwarqan?
Ñoqaqa mana wawayoqmi qheparqani,
churiyaytapas manan atirqanichu,
wikch'usqataq t'aqasqataqmi kasharqani,
¿pitaq kaykunatari uywasharqan?
Sapallaymi qhepakurqani,
¿maymantataq kaykunari hamunku? nispa.
22Qollana Señor Diosmi llaqtanta nin:
Kayqa, hatun suyukunatan kamachisaq,
llaqtakunamanmi banderayta rikuchisaq,
churiykikunata marq'amunankupaq,
ususiykikunatapas q'epimunankupaq.
23Reykunan wawaykikunata wawachakuq kanqa,
qoyankutaqmi uywapuqniykikuna kanqa.
Paykunan pampakama ñawpaqeykipi k'umuykukunqaku,
qanmanmi qonqor-chaki k'umuykamusunkiku.
Chaymi yachanki ñoqa Señor Diosqa kasqayta,
manan p'enqasqachu kanqaku suyawaqniykunaqa, nispa.
24Llaqtanmi ichaqa nin:
¿Kallpasapa runamantaqa awqa-tinkuypi llat'anasqata qechuyta atikunmanchu?
Icha, ¿muchuchiqpa atiyninmanta huk presota kacharichiyta atikunmanchu? nispa.
25Señor Diosmi nin:
Arí, presotaqa kallpasapamanta qechunqakupunin,
muchuchiqmantaqa llat'anasqatapas qechunqakupunin.
Ñoqan hap'inakusaq qanwan maqanakuqkunawan,
ñoqan wawaykikunatapas qespichisaq.
26Sarunchaqniykikunamanqa kikin aychankutapunin mikhuchisaq,
vinowan hinan yawarninkuwanpas machachisaq,
chay hinapin llapa runa yachanqa
ñoqa Señor Diosqa qespichiqniyki kacharichiqniyki kasqayta,
Jacobpa atiyniyoq Diosnin kasqaytapas, nispa.
Currently Selected:
ISAÍAS 49: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
