ISAÍAS 48
48
Qhepaman kaqkunata Señor Diospa willakusqan
1Jacobpa ayllun, kayta uyariychis,
qankunaqa Israel sutiwan sutichasqan kankichis,
qankunaqa Judapa mirayninmi kankichis,
Señor Diospa sutinpin jurankichis,
Israelpa Diosninmantan mañakunkichis,
ichaqa hawa sonqollan manan chaninpichu,
2chaypas nishankichismi: Ch'uya llaqtamantan kayku,
Israelpa Diosninmanmi hap'ipakuyku,
payqa Tukuy-atiyniyoq Señor Diosmi, nispaykichis.
3Chay hinaqa Señor Diosmi nisunki:
Unaymantañan ñawpa sucedenankunataqa willakurqani,
ñoqan chaykunataqa sut'incharqani.
Usqhayllan ruwarqani, hinan hunt'akurqan.
4Rumi sonqo kasqaykitan reqsirqayki,
kunkaykipas fierro k'aspi hina kasqanta reqsirqayki,
mat'iykipas bronce hina kasqanta reqsirqayki.
5Chayraykun unaymantaña chayta nirqayki,
manaraq sucedeshaqtinmi chayta willarqayki,
mana chayqa niwaqmi karqan:
Idoloymi chayta ruwarqan,
llaqllasqa diosniymi unuyachisqa rikch'ayniymi chaykunata chayachimurqan, nispayki.
6Llapantan chaykunataqa uyarirqanki rikurqanki,
¿manachu qanqa chayta ninki:
Arí, cheqaqpunin sucedesqanqa, nispa?
Kunanmantaqa mosoq sucedenankunatan willasqayki,
mana yachasqayki pakasqakunatan willasqayki.
7Chaykunataqa kamarishanin, manan ñawpa kaqkunachu,
manan ñawpaqqa chaykunamanta uyarirqankichu,
chaymi: Yacharqaniñan, nispaqa mana niwaqchu.
8Yacharqanipunin mana hunt'aq kasqaykita,
nacesqaykimantapacha “mana kasukuq” nisqa kasqaykitapas,
chaymi qanqa manapuni chaykunamanta rimaqta uyarirqankichu,
manataqmi ninriykitapas kicharirqankichu reparanaykipaq.
9Sutiyraykun phiñakuyta mukikuni,
yupaychasqa kanaypaqmi sonqoyta tiyachikuni,
ama qanta wañuchinaypaq.
10Ñoqan ch'uyayachiyki,
ichaqa manan qolqeta hinachu,
aswanpas hornopi hina ñak'arichispan probayki.
11Ñoqaraykupunin chayta ruwani,
sutiytaqa manapunin qhellichanata munanichu,
manan pipas ñoqa hina qhapaqchasqaqa kanqachu.
Señor Diosmi llaqtanta qespichinqa
12Jacobpa ayllun uyariway,
waqyakusqay Israel, uyariway.
Ñoqallapunin Diosqa kani,
ñoqan ñawpaqkaqpas qhepakaqpas kani.
13Makiymi kay pachata teqsicharqan,
paña makiymi hanaq pachata mast'arqan,
sutinkumanta waqyariqtiymi llapallanku qayllaykamuwanku.
14Llapallaykichis huñukuychis, hinaspa uyariychis:
¿Mayqen idolonkutaq kay sucedenankunata willakurqan?
Munakusqay amigoy Ciron Babilonia contra yuyaykusqayta ruwanqa,
hinallataq Babilonia runakuna contra phawaykunqa.
15Ñoqapunin chayta rimarqani,
ñoqan payta waqyamurqani, hinaspan pusamurqani,
chaymi paypa ruwasqanqa allinpuni kanqa.
16-17Kunanqa Qollana Señor Diosmi kachamuwan,
hinaspan Espiritunwan hunt'aykuwan.
Chayrayku asuykamuwaychis, hinaspa kayta uyariychis:
Qespichiqniykichis Señor Diosmi,
Israelpa Ch'uya Diosninmi nin:
Qallariymantapachaqa manan pakapichu rimarqani,
tukuy chaykuna hunt'akuqtinqa chaypin kasharqani.
Ñoqan Apu Señor Diosniykiqa kani,
ñoqan allinniykipaq yachachiyki,
ñoqan purinayki ñantapas pusayki.
18Kamachikuyniykunallata uyariwaq karqan,
kusisamiykiqa mayu hinan hunt'a kanman karqan,
mama qochaq phoqchiqesqan hinan atipashallawaqpuni karqan.
19Mirayniykiqa aqo hinan askha kanman karqan,
wawaykikunaqa askhallañan kanman karqan,
ñoqaqa manapunin t'iraykichismanchu karqan,
manallataqmi qayllaymantapas chinkachiykichismanchu karqan.
20¡Lloqsiychis Babilonia suyumanta!
¡Ayqeychis Babilonia runakuna ukhumanta!
Kusisqa qaparispa teqsimuyuntinman kayta willaychis:
¡Señor Diosmi kamachin Jacobta qespichimun!
21Manan unumanta ch'akichikunkuchu,
ch'inneqkunata paykunata pusashaqtin,
unutan paykunapaq qaqamanta phullpuchimun,
qaqatan ch'eqtan, hinan unu phawarin, nispa.
22Señor Diosmi nin:
Manan thak kawsayqa millay runakunapaqqa kanchu, nispa.
Currently Selected:
ISAÍAS 48: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
