ISAÍAS 47
47
1Señor Diosmi nin:
Babilonia llaqta, uraykuy,
ñut'u hallp'api tiyaykuy.
Kamachikuy tiyanaykimanta uraykuy,
hinaspa pampapi tiyaykuy.
Ñawpaqqa doncella sipas hinan karqanki,
manan atipasqaraqchu karqanki,
kunanmi ichaqa manaña warmallaraq erqellaraq nisunkikuchu.
2Molino rumiwan hak'uta kutay,
uma qatanaykita horqokuy,
polleraykita q'allpakuy,
phakaykita q'alarakuy,
hinaspa mayukunata chimpay.
3Runakunan q'ala cuerpota rikusunki,
runa qayllapin p'enqachisqa kanki,
vengakusaqmi, manataqmi pipas hark'akuwanqachu, nispa.
4Qespichiqniykichisqa Tukuy-atiyniyoq Señor Diosmi,
Israel runakunaq Ch'uya Diosninmi,
paymi nin:
5Babilonia llaqta, ch'inlla tiyaykuy,
laqhayaqman haykuy,
manañan hayk'aqpas nisunkikuchu:
Hatun suyukunaq Qoyan, nispaqa.
6Llaqtaypaqmi phiñakurqani,
runaykunatan p'enqaman churarqani,
qanmanmi hap'ichirqayki,
manan qanqa paykunata llakipayarqankichu,
yuyaq runakunatapas sinchitapunin muchuchirqanki.
7Qanmi nirqanki: Wiñaypaqmi Qoyallapuni kasaq, nispa,
manan chaykunataqa sonqoykipi yuyaykurqankichu,
manallataqmi imayna qhepa kanaykitapas yuyaykurqankichu.
8Chayrayku aycha kusichiq warmi, kayta uyariway,
qanqa mana manchakuspan tiyashanki,
qanmi sonqoykipi nishanki:
Ñoqaqa Diosmi kani, ñoqamanta wakqa manan kanñachu.
Manan hayk'aqpas viudachu kasaq,
manan mana wawakunayoqpaschu kasaq, nispa.
9Sinchitaña layqakushaqtiykipas,
anchataña paqokushaqtiykipas,
huk p'unchayllapin qonqaylla chayamusunki kay iskay:
mana qosayoqmi kapunki, mana wawayoqmi kapunki.
10Millay ruwasqaykimanmi hap'ipakurqanki,
nirqankitaqmi: Manan pipas rikuwanchu, nispa.
Yachayniykin yuyayniykin pantachirqasunki,
sonqoykipin nirqanki:
Ñoqaqa Diosmi kani,
ñoqamanta wakqa manan kanñachu, nispa.
11Qonqayllan hatun llakiqa chayamusunki,
layqaykikunaqa manan qolluchiyta atinqachu.
Wañuraymi chayamusunki,
manan chaytaqa pagaspa kutichiyta atinkichu.
Mana yachasqayki wañuraymi qonqaylla hap'isunki.
12Layqakushallaypuni, anchata paqokushallaypuni,
chaykunamanmi wawa kasqaykimantapacha k'askakurqanki.
Ichapaschá imallapaqpas allin kasunki,
ichapaschá chaykunawan runakunata mancharichiwaq.
13Askhallañan yuyaychaqniykikunaqa karqan, sayk'unaykikamaraqmi.
Hanaq pacha qhawaqkuna kunan hamuchunku,
paykunan ch'askakunata qhawaspa sapa killa watunku,
imachus chayamunasuykimanta qanta qespichichun.
14Ichaqa ñut'u paja hinan kanku,
ninan paykunata ruphaykunqa,
manan paykunaqa ninaq ruphaykunanmanta
qespikuyta atinqakuchu,
chay ninaqa manan q'oñikunapaqchu,
manan chay qayllapi tiyaqkunapaqchu.
15Chay hinan layqaykikunaqa kasunki,
chaykunawanmi wawa kasqaykimantapacha sapa kuti watuchirqanki,
sapankan musphaspa thampiykachanqa,
manan mayqenninkupas qespichiyta atisunkichu, nispa.
Currently Selected:
ISAÍAS 47: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
