ISAÍAS 32
32
Chanin reypa kamachikunanmanta
1Chanintapuni kamachikuq reymi kanqa,
kallanqataqmi cheqaq-kayman hina kamachikuqkunapas.
2Sapankankun kanqa wayramanta pakakuna hina,
chikchi pukllaymanta pakakuna hina,
ch'aki hallp'api qarpana unu yarqha hina,
ch'in pampapi llanthuykukuna hatun qaqa hina.
3Ñawinkupas makillan qhawanqa,
ninrinkupas makillan uyarinqa.
4Manan ñawpa hinachu hawan ukhunta ruwanqa,
aswanpas yuyaywanmi ruwanqa,
akllu rimaqpas allin sut'itañan rimanqa.
5Millay runataqa: Millaymi, nillanqakupunin,
mana yuyayniyoqtapas: Mana yuyayniyoqmi, nillanqakupunin.
6Mana yuyayniyoqqa waq'a hinan riman,
mana chanin ruwayllatan yuyaykunpas,
mana chaninllatapunin ruwan,
Señor Dios contratataq llullakuspa riman,
yarqasqamanpas mikhunataqa manan qonchu,
ch'akisqaq ukyanantapas hark'akunmi.
7Millay runaqqa ima ruwasqanpas waqllisqakaman,
millay mana chaninkunatan yuyaykunpas,
wakchakunatan llullakusqanwan qaqapachin,
hinaña juzganapi wakchaq rimarisqan chanin kashan chaypas.
8Allin runaqmi ichaqa yuyayninpas allillantaq,
yuyaykusqankunapitaq qaqata sayan.
Jerusalén warmikuna contra willakuy
9Qankuna mana-llakhi warmikuna,
sayarispa uyariwaychis,
mana imapas reparaq warmikuna,
rimasqayta uyariychis.
10Kunanqa llakhiraqmi kashankichis,
huk wata kurakmanta hinan ichaqa khatatatankichis,
manan uvas kapunqachu pallanapaq,
cosechapas tukukapunqan.
11Yaw mana-llakhikuna, khatatataychis,
yaw mana reparaqkuna, mancharikuychis,
p'achaykichista ch'utikuspa q'alakuychis,
llakikuymanta luto p'achawan p'achakuychis.
12Llakikuymanta qhasqoykichista takakuychis
chay sumaq chakrakunaq allin ruruq uvaskunaq mana kapusqanmanta.
13Qhasqoykichista takakuychis
llaqtaypa hallp'anpi khiskakunaq t'ankarkunaqpiwan wiñasqanmanta.
Arí, lutokuychispuni kusikuyllapi kawsaq llaqtamanta wasinkunamantawan.
14Qhapaq tiyana wasin wikch'usqa kapunqa,
askha runayoq bullachakuq llaqtan purunyapunqa,
llaqta orqopas qhawana torrepas ch'inneqmanmi tukupunqa,
salqa asnokunan chayninta kusisqa purinqaku,
chayneqpin ovejakunata michinqaku.
15Hanaq pachamanta Dios Espiritunta kachaykamuqtinmi ichaqa
chay purun ch'inneqkuna chakra llank'ana kapunqa,
chay llank'ana cheqaskunataq qheswaman tukupunqa.
16Hinan lliw ch'inneqpi chaninchayta ruwanqaku,
qheswa ukhupitaq chanin-kaypi kawsanqaku.
17Chanin-kayta ruwaqtinkun thak-kay kanqa,
chanin-kaypi kawsaqtinkun mana ima sasachaypas kanqachu,
Señor Diospitaq suyakullanqakupuni.
18Llaqtayqa tiyakapunqa kusikuy cheqaspin
waqaychasqa wasikunapin
llakhilla tiyakunapin.
19Sach'a-sach'aña chikchiq chaqosqan kanqa chaypas,
llaqtaña kumpasqa kanqa chaypas,
20qankunaqa kusisqapunin tiyakunkichis
chakraykichispaqpas askha unu qarpayniyoq,
asnoykichispaqpas toroykichispaqpas askha pastoyoq.
Currently Selected:
ISAÍAS 32: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
