ISAÍAS 27
27
Israelpa qespikuyninmanta
1Chay p'unchaypin Señor Diosqa
manchana atiyniyoq hatun espadanwan muchuchinqa
Leviatán nisqa suchuspa ayqekuq mach'aqwayta,
Leviatán nisqa wank'irayaq mach'aqwayta,
mama qochapi manchana hatuchaq animaltapas wañuchinqan.
2Chay p'unchaymi Señor Diosqa ninqa:
Sumaq munay uvas chakramanta takiychis.
3Ñoqa Señor Diosmi qhawaqninqa kani,
sapa rato hinan qarpapayani,
tuta p'unchaymi qhawani,
mana imanasqapas kananpaq.
4Uvas chakrawanqa manan phiñasqachu kani,
khiskanña qoranña kaqtinpas,
chaqoqmi lloqsiyman,
hukpaqkaman ruphaykuyman.
5Ñoqaq qhawanayta munaspaqa
llaqtaypa awqankuna ñoqawan allipunachun,
arí, ñoqawanpuni allinpi kawsachun, nispa.
6Qhepamanmi Jacobpa miraynin saphirinqa,
qhepamanmi Israel runakunaqa ch'ikchimuspa t'ikarinqa,
pachantinmanmi rururispa hunt'aykunqa.
7Diosqa Israeltaqa manan muchuchirqan
k'iriqninkunata muchuchirqan hinatachu,
Israeltaqa manan wañuchirqan
sipiqninkunata wañuchirqan hinatachu.
8Diosqa llaqtanta muchuchirqan
wak karu suyuman apachispan,
llaksakuy samayninwanmi phukurparirqan
inti lloqsiy lado rupha wayra hinaraq.
9Wak'a altarninkunatan ñut'unqa
kutasqa isku rumita hina.
Asera nisqa diosaq rikch'aynin yupaychana k'ullutan ch'usaqyachinqa,
incienso q'osñichina altarkunatapas lliwtan thuninqa,
chaykunawanmi Jacobpa mirayninpa huchan pampachasqa kanqa,
llapan huchankunapas pichasqan kapunqa.
10Allin perqayoq llaqtan raqay-raqay qhepapun
wikch'usqa wasi hina,
mana runayoq purun hina.
Uywa michinan chayqa kapun,
chaypin uywakuna puñuran,
mallki raphikunatan mikhun.
11Mallkiq k'allmanqa ch'akispan p'akikun,
warmikunataq chayta huñuspa kanaykunku.
Kay llaqtaqa mana k'atay yuyayniyoqmi,
chayraykun Kamaqninpas paytaqa mana llakipayanchu,
manallataq sumaqtapaschu qhawarin.
12Yaw Israel runakuna, chay p'unchaymi Señor Diosqa
Eufrates mayumanta Egipto qorpapi mayukama
cebada saruchiq hinaraq saruchinqa,
qankunataqmi ruru hina ch'ulla-ch'ullamanta akllasqa kankichis.
13Chay p'unchaymi hatun putututa tocanqaku,
hinan Asiria suyupi chinkasqakunapas
Egipto suyuman apasqakunapas
Señor Dios yupaychaq kutimpunqaku Jerusalenpi Ch'uya Orqoman.
Currently Selected:
ISAÍAS 27: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
