ISAÍAS 23
23
Tiro llaqta contra willakuy
1Tiro llaqta contra willakuy:
Barcokunata purichiq runakuna, yupakuychis
chayanaykichis Tiro llaqta thunisqa kasqanmanta.
Chipremanta barcokunapi kutimushaspan
llaki willakuyta uyarinkichis.
2Qankuna qocha patapi tiyaqkuna, ch'inlla kaychis,
Sidón llaqtayoq qhatuqkuna, upallaychis.
Qhatuq kachasqaykichiskunan mama qochanta chimparqanku,
3chinkay-chinkay unu ukhunta tuyturqanku.
Paykunan apamurqanku Nilo mayuq chimpapuranpi trigota,
Nilo mayuq chimpapuranpi cosechawanmi Tiro llaqta qhapaqyarqan,
hinantin suyukunaq rantikunan cheqasmanmi Tiro llaqta tukurqan.
4Yaw Sidón llaqta, p'enqarikuypuni,
yaw mama qocha patapi allin perqasqa llaqta, p'enqarikuypuni.
Mama qochan nin:
Manan wachakuy nanayta reqsinichu,
manan wachakunichu,
manan ima churitapas uywanichu,
manallataqmi ima ususitapas uywanichu, nispa.
5Egipto suyuqa Tiromanta uyarispan phutikunqa.
6Yaw mama qocha patapi llaqtakuna, yupakuychis,
España suyuman ayqekuychis.
7¿Ñawpa llaqtaykichischu kay kanman?
¿Imaymana kusiykukuq llaqtaykichischu kay kanman?
¿Hinantinta purispa chaykunapi tiyamuq llaqtachu kay kanman?
8Tiroqa allin llaqtamá,
qhatuq puriqninkunapas allichachaqmá,
rantiq puriqkunapas allin mentasqakunamá,
chay hinari, ¿pitaq Tiro llaqta contra lliw chaykunata unanchamurqan?
9Tukuy-atiyniyoq Señor Diosmi unancharqan
llapa uma hoqariqta k'umuchinanpaq,
llapan kay pachapi allin mentasqakunata huch'uyyachinanpaq.
10España suyu runakuna, chakra llank'ayta qallariychis
Nilo mayuq chimpapuranpi chakra llank'aq hina,
manan barcoykikunaq chayanan llaqta kanñachu.
11Señor Diosqa makinta mama qochaman haywarispan
muyuriqninpi suyukunata khatatatachirqan,
Fenicia suyuq allin perqayoq llaqtankuna thuninapaqpas kamachikurqan,
12nirqantaq: Yaw Sidón llaqta,
manañan aycha q'ochukuypi musphankiñachu,
sinchi sarunchasqañan kashanki.
Chipremanña chimparqonki chaypas,
manapunin samaytaqa tarinkichu, nispa.
13Qhawariychis Babilonia runakunata,
paykunan chayta ruwarqanku, manan Asiria runakunachu.
Babilonia soldadokunan perqa thunichina carretakunata apamurqan,
qhapaq wasikunatapas thunirqan,
raqay-raqayman tukuchipurqan,
paykunan Tiro llaqtata salqa animalkunaq tiyananman tukuchirqanku.
14Hatun barcokunata purichiqkuna, waqaykuychis,
allin perqasqa llaqtaykichismi thunisqa kapun.
15Chaypachan Tiro llaqtaqa qonqasqa kanqa qanchis chunka watantin (mayqen reypas qanchis chunka watallan kawsan). Chay qanchis chunka wata tukukuqtinmi, Tiro llaqtaqa rabona warmi hina takipayasqa kanqa:
16Qonqasqa rabona qhelli warmi,
arpaykita tocakuspa llaqtata muyurimuy,
allinta tocamuy askhata takikuspa,
qanta mana qonqanankupaq, nispa.
17Qanchis chunka wata qhepatataq Señor Diosqa wakmanta Tiro llaqtata watukamunqa, hinan payqa wakmanta qhatuyta qallarinqa, rabona warmi hina purispataq llapan teqsimuyuntin suyukunawan qhellichakunqa. 18Tiro llaqtaqa llapan qolqe tarisqanta manan waqaychaspa taqenqachu, aswanmi Señor Diospaq t'aqasqa kanqa, paypa kamachin ruwaqkunamanmi qokunqa, askha mikhuyta sumaq p'achatawan rantikunankupaq.
Currently Selected:
ISAÍAS 23: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
