ISAÍAS 22
22
Jerusalén contra willakuy
1-2Rikhuriy rikusqan wayq'omanta willakuy:
Yaw qaparkachaspa ch'aqwaq llaqta,
yaw yanqa-nisqa q'ochukuy munaq llaqta,
¿iman kashan?
¿Imanaqtinmi llapaykichis wasi pataman wichashankichis?
Ayaykikunapas manan espadawan wañuchisqachu karqan,
manan awqa-tinkuypipaschu wañurqanku.
3Umalli runaykikunapas huk-nisqallan phawarirqanku,
mana p'eqtayoq maqanakuspallan hap'irqamurqanku,
hinaña karuman ayqekurqanku chaypas
taripaspa hap'isqapunin karqanku.
4Chayraykun nirqani: Ñoqamanta t'aqakuychis
unuy-parata waqanaypaq.
Ama pipas sonqochawaychischu
llaqtay runaq wañusqanmanta, nispa.
5Tukuy atiyniyoq Señor Diospunin unancharqan
hatun llaksakuy p'unchay chayamunantaqa.
Chay p'unchaymi rikhuriy rikusqa wayq'opi
runakuna qaparkacharqanku,
llaksakuymanta imaymana ch'aqway karqan.
Perqakunatan awqanku thunirqan,
runakunataq orqokunaman waqyakurqan yanapananpaq.
6Elam runakunan wach'inankuta wakichirqanku,
caballoq chutasqan carreta patapiñan kasharqanku,
Kir runakunapas escudontinkamañan kasharqanku.
7Sumaq wayq'oykikunapas carretaq hunt'aykusqanmi karqan,
caballoyoq soldadokunan llaqta punkuykita wisq'arqorqan,
8Judá suyuq hark'akuqninqa manan kapunchu.
Chay p'unchaymi qankunaqa sach'a-sach'api wasimanta armakunata horqorqankichis,
9rikullarqankutaq Davidpa llaqta perqanpi askha t'oqokunata,
chaymantapas Urakaq Qochana nisqamanmi unuta waqaycharqankichis.
10Jerusalén llaqtapi wasikunatan yuparqankichis,
wakinnintataq thunispa perqa q'asakunata rawkharqankichis,
11iskay perqa tupaypitaq huk qochanata ruwarqankichis
Mawk'a Qochana nisqamanta unuta churanaykichispaq.
Ichaqa Diosta mana tapuykuspan ruwarqankichis,
paymi ñawpaqmantaña chay llakikuna kananpaq yuyaykurqan,
payllataqmi lliw chaykunata unancharqan.
12Chay p'unchaymi Tukuy-atiyniyoq Señor Diosqa waqyarqasunkichis
waqanaykichispaq suyunaykichispaqwan,
umaykichista rutukunaykichispaq,
llakikuy nanaymanta yana p'achawan churakunaykichispaqwan.
13Qankunataq ichaqa kusikurqankichis q'ochukurqankichis,
wakata ovejatawan nak'aykuspa.
Aychata mikhurqankichis vinota ukyarqankichis,
nirqankichistaq: Mikhuykusunchis ukyaykusunchis
paqarinmi wañukapusun, nispaykichis.
14Tukuy-atiyniyoq Señor Diosmi rikhuriwaspa niwarqan: Kay huchaykichistaqa manapunin pampachasaqchu, qankunaqa ñawpaqtaraqmi wañunkichis. Ñoqa Tukuy-atiyniyoq Señor Diosmi chayta nini, nispa.
Sebnamanta willakuy
15Tukuy-atiyniyoq Señor Diosmi nillawarqantaq:
Phaway Sebnaqta, paymi reypa wasin mayordomo.
Hinaspa nimuy:
16¿Imatan kaypi ruwashanki?
¿Pin qan kanki aya p'ampanata kaypi ruwakunaykipaq?
¿Imanaqtinmi kay orqopi aya p'ampanata ruwakushanki,
ch'ila qaqapi samanata t'oqokuspayki?
17Yaw munayniyoq runa, ¡uyariy!
Señor Diosmi qaqata hap'iykuspa
karuman wikch'usunki.
18Q'aytuta hina kururqospan
hatun karu suyuman wikch'usunki,
chaypin wañumpunki,
chaypin uma hoqarinayki carretaykikuna sayamunqa.
Qanmi reypaq hatun p'enqay kanki.
19Señor Diosmi llank'anaykimanta qarqosunki,
reypa wasinpi kamachikunaykimanta wikch'usunki.
20Chay p'unchaymi Señor Diosqa
Hilkiaspa churin kamachin Eliakimta waqyakapunqa.
21P'achaykiwanmi p'achaykachinqa,
sumaq chumpiykiwanmi chumpiykachinqa,
kamachikuq-kayniykitan payman qopunqa.
Jerusalén runakunapaqpas Judá runakunapaqpas
taytan hinan kanqa.
22Paymanmi qonqa rey Davidpa wasin kichana llaveta,
manan pipas wisq'anqachu kichasqantaqa,
manataq pipas kichanqachu wisq'asqantaqa.
23Pay hawan taytanpa ayllun hatunchasqa kanqa,
Señor Diosmi payta allinta takyachinqa
takarpu takasqata hinaraq.
24Paymanmi perqapi takarpuman hina warkukunqaku
taytanpa ayllunkuna familiankunapas.
Paykunan llapanku kanqa huch'uy p'ukuchakuna hina,
qerukuna hina, jarrokuna hina.
25Chay p'unchaymi allin takasqa takarpu p'akikamunqa,
p'akikamuspan urmaykamunqa,
llapan chaypi warkusqa kaqkunan urmaykamuspa hich'akunqa.
Tukuy-atiyniyoq Señor Diosmi chayta nin, nispayki.
Currently Selected:
ISAÍAS 22: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
