ISAÍAS 21
21
Babiloniaq thunikunanmanta willakuy
1Qocha pataq ch'inneqninmanta willakuy:
Uraymanta t'uyurmi wayra phawamuq hinan chayamushan,
manchay-manchay suyumantan awqakuna hamushan.
2Diosmi rikuchiwarqan sinchi llaksakuy rikhuriyta:
Q'otukuqpa runamasinta hap'iykachipushasqanta,
llat'anaqpa qechusqanta apamushasqanta.
Nirqantaq:
¡Elam suyu runakuna, chay runakuna contra phawaykuychis!
¡Media suyu runakuna, llaqtankuta muyuykuychis!
Babilonia suyu runakunan hukkunata llakichirqan,
chay llakikuytan p'uchukachisaq, nispa.
3Chayta rikuspan cuerpoyraq nanaymanta khatatatashan,
wachakuq warmi hinaraqmi q'ewiykukushani.
Chaykuna uyarisqaywanmi llaksasqapuni kashani,
chaykuna rikusqaywanmi umayraq muyurishawan.
4Yuyayniyraqmi chinkarishawan,
manchakuymanta khatatatashallaniñan,
samaykunaypaq suyarayasqay ch'isin
aswan llaksakuyman tukurqapun.
5Mesaqa churasqañan,
chusipas tiyanapaq mast'asqañan,
mikhushankuñan, ukyashankuñan.
Soldado kamachiqkunatan nishankuña:
¡Sayariychis! ¡Escudoykichista wakichikuychis! nispa.
6Señor Diosmi niwan:
Phaway, qhawaqta churamuy,
ima rikusqantapas willakamunanpaq.
7Iskay caballoq chutasqan carretata rikuspapas
runakunata asnopiña camellopiña sillaykusqata rikuspapas,
makillapuni qhawachun, nispa.
8Chaymi qhawaq churasqaqa waqyakamurqan:
Wiraqocháy, kasqallanpin kashani,
ch'isiyaqmi sayashani,
tutapas parin-parinta qhawaspallan kashani.
9¡Qhawariy! Kaytan hamushan huk runa
iskay caballoq chutasqan carretapi.
Paymi waqyamushawan:
¡Urmaykapunmi! ¡Urmaykapunmi Babilonia llaqtaqa!
Llapanmi diosninkunapas pampapi p'aki-p'aki wikch'urayashan, nispan, nispa.
10Ñoqataq nirqani: Llaqtalláy,
trigo hina erasqan kanki,
ñoqan ichaqa willashaykichis
Israelpa Tukuy-atiyniyoq Diosninpa niwasqanta, nispa.
Edom suyu contra willakuy
11Edom suyu contra willakuy.
Seirmantan waqyamuwan:
Llaqta qhawaq runa, ¿ñachu paqarimunqaña?
llaqta qhawaq runa, ¿ñachu illarimunqaña? nispa.
12Ñoqataq nirqani: Paqarimushanñan,
ichaqa tutayarqollanqataqmi.
Tapukuyta munaspaqa tapukamullay,
huktawanpas kutimullay, nispa.
13Arabia suyumanta willakuy:
Dedán llaqta runakuna,
camellokunapi astakuspaykichismi
Arabia ch'inneq cheqaskunapi puñunkichis,
14unuta apamuychis ch'akichikuqkunaman qonaykichispaq.
Tema llaqtapi tiyaqkuna,
ayqekuqkunaman mikhunata haywariychis.
15Paykunaqa ayqekushanku
espadaq ñawch'inmantan,
p'eqtaq wach'inanmantan,
llaksakuy awqa-tinkuymantawan, nispa.
16Señor Diosmi niwan: Huk wata ukhullapin Kidar runaq uma hoqariq kayninqa tukurqakapunqa. 17Kidar runakunaq aswan allinnin qharikunaqa wach'iqkunan, chaykunamantapas pisillañan qhepaykapunqa. Ñoqa Israelpa Señor Diosninmi chayta nini, nispa.
Currently Selected:
ISAÍAS 21: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
