ISAÍAS 19
19
Egipto suyu contra willakuy
1Egipto suyu contra willakuy.
¡Qhawariychis! Señor Diosmi Egiptoman hamushan,
phawaq phuyu patapin usqhaylla phawamushan.
Paypa qayllanpin Egipto idolokunaqa khatatatan,
Egipto runakunapas pisi kallpayanqakun.
2Tukuy-atiyniyoq Señor Diosmi nin:
Egipto runakunatan awqanachisaq,
hinan paykunapura maqanakunqaku,
amigopas amigo contra,
llaqtapas llaqta contra,
suyupas suyu contra.
3Umankutan muyurichisaq,
yuyaykusqankutan waqllichisaq.
Chaymi idolokunata layqakunata ima tapukunqaku,
ayakunaq espiritun rimachiqmanpas watuqkunamanpas rillanqakutaqmi.
4Paykunataqa yana alma kamachikuqmanmi hap'iykachisaq,
paykunataqa sinchi millay reymi kamachinqa, nispa.
5Chay hinaqa Nilo mayu unupas tukukapunqan,
mayu unupas pasaqtan ch'akipunqa,
6yarqhankunapas millaytan asnarinqa.
Palqankunapas ch'akinankaman pisiyapunqa,
soqoskunapas t'otorakunapas lliwmi ch'akipunqa.
7Nilo mayu cantopi kashaq llach'ukunapas naq'epunqa,
mayu patapi tarpusqakunapas lliwmi ch'akipunqa,
chaykunatan wayra apapunqa.
8Nilo mayupi challwaqkunan khuyayta waqanqaku,
anzuelowan challwaqkunan llakikunqaku,
llikankuta unuman wikch'uykuqkunan umphuyanqaku.
9linopi llank'aqkunapas pisi kallpayanqakun,
sumaq lino awaqkunapas sinchitan umphuyanqaku,
10llapa awqakunapas sinchi musphasqan kanqaku,
llapan llank'apakuqkunapas hawapi ukhupi sonqoyoqmi kanqaku.
11Zoán llaqta umallikuna, sinchi mana yuyayniyoqmi kankichis,
qankunaqa rey Faraonpa yachaysapa yuyaychaqninmi kankichis,
ichaqa loqhe hinan yuyaychankichis.
¿Imaynataq rey Faraontaqa ninkichis:
Ñoqaykuqa yachaysapakunan kayku,
ñawpa reykunaq mirayninmi kayku, nispa?
12Yaw Faraón, ¿maytaq yachaysapa runaykikunari?
Paykuna willasunkimanqá Tukuy-atiyniyoq Señor Diospa Egipto contra yuyaykusqanta.
13Zoán llaqta umallikunaqa sinchi mana yuyayniyoqmi kanku,
Memfis llaqta umallikunapas q'otuchikurqankun,
ayllukunaq umallinkunapas runankunatan pantachirqan.
14Señor Diosmi paykunaq yuyayninta tutayachirqan,
chaymi paykunaqa tukuy imaymanapi Egipto runakunata pantachinku,
hinan Egipto runakunaqa thampiykachanku
imaynan machasqa runa lanzasqanpi thampiykachan hinata.
15Egiptopiqa manan pipas ima ruwaytapas atinchu,
hatunkaqpas huch'uykaqpas,
wakchapas qhapaqpas.
16Chay p'unchaymi Egipto runakunaqa manchali warmi hina kanqaku. Sinchitan mancharikunqaku llaksakunqaku paykunata muchuchinanpaq Tukuy-atiyniyoq Señor Dios makinta haywarisqanrayku. 17Judá suyu runakunapas sinchitan paykunatapas manchachinqa. Egipto runakunan sapankanku Judá suyuq sutinta uyarirqospallaraq pasaqta llaksakunqaku, Tukuy-atiyniyoq Señor Diospa paykuna contra yuyaykusqanta reparaspa.
18Chay tiempopin Egipto suyupi phisqa llaqta Hebreo simi rimaqkuna kanqa, paykunan Tukuy-atiyniyoq Señor Diosman hunt'aq kanankupaq juranqaku. Chay llaqtakunaq hukkaqninpa sutinmi Inti Llaqta nisqa kanqa.
19Chay p'unchaymi Egipto suyu chawpipi Señor Dios yupaychanapaq huk altar kanqa, suyu qorpa qayllapitaq Señor Diospa sutinpi huk rumi saywa kanqa. 20Chaymi kanqa huk señal, Egipto suyupi Tukuy-atiyniyoq Señor Diosta yuyarinapaq. Hinamantan sarunchasqa kaspa Señor Diosman waqyakuqtinku payqa uyarinqa, hinaspa huk qespichiqta kachanqa paykunata amachananpaq qespichinanpaqwan. 21Ahinapin Señor Diosqa Egipto runakunaman reqsichikunqa, paykunataq Señor Diosta reqsispa yupaychanqaku, hinaspa sacrificiokunata ruru ofrendakunata ima haywanqaku. Señor Diosta kasunankupaqmi prometekunqaku, hinaspa hunt'anqaku. 22Señor Diosmi Egipto runakunata muchuchispa k'irinqa, chaymantataq ichaqa qhaliyachinqa. Señor Diosmanmi kutirikunqaku, hinan paykunata khuyapayaspa qhaliyachinqa.
23Chay tiempopin huk hatun ñan kanqa Egiptomanta Asiriakama, chaymi Asiria runakunaqa Egiptoman rinqaku, Egipto runakunapas Asiriaman rinqaku. Egipto runakunawan Asiria runakunawanqa kuskan Señor Diosta yupaychanqaku. 24Israel suyuqa Egiptowanpas Asiriawanpas kuska wakin kanqaku, kay pachapipas huk saminchan kanqaku. 25Tukuy-atiyniyoq Señor Diosmi paykunata saminchanqa: Saminchanin Egipto llaqtayta, kamasqay Asiriata, hinallataq akllakusqa llaqtay Israeltapas, nispa.
Currently Selected:
ISAÍAS 19: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
