ISAÍAS 10
10
1¡Ay, qankunamanta, mana chanin kamachikuy simita kamachiqkuna,
runakuna sarunchanaykichispaq qelqa unanchaqkuna!
2¡Ay, qankunamanta, pisi kallpakunapaq chaninchayta hark'aqkuna,
llaqtaypi wakchakunaq uyarichikusqanta mana uyarpariqkuna,
viudakunata ch'utiqkuna,
mana tayta-mamayoqkunata suwaqkuna!
3Taripasqa kanaykichis p'unchaypiqa, ¿imanankichistaq?
karumanta hatun llakita Dios apamuqtin, ¿imanankichistaq?
¿Pimantaq asuykunkichis: Yanapaykuway, nispa?
¿Maypitaq qhapaq-kayniykichistaqa waqaychankichis?
4Manachus presokunawan kuska huch'uyyachisqa kankichis chayqa
maqanakuypin wañunkichis.
Chaywanpas Señor Diospa k'arak phiñakuyninqa manan thanirqanchu,
aswanpas: Muchuchisaqmi, nishallanpunin payqa.
Asiriawan Señor Diospa muchuchisqan
5Señor Diosmi nin:
¡Ay Asiria reymanta!
Payqa k'arakta phiñakuspa muchuchinay k'aspin,
phiñakuspa hoqarinay tawnan.
6Paytan kachani huk mana chanin llaqtaman phawaykunanpaq,
phiñachiwaqniy suyuta qhapaq-kayninkunata llat'anaspa qechunanpaq,
callekunapi t'uruta hinaraq sarumunanpaq.
7Asiria reyqa manan chayta reparanchu,
payqa manan chay hinatachu yuyaykukun,
aswanpas paypa yuyayninqa askha hatun suyukunata muchuchispa ch'usaqyachiyllan.
8Paymi hatunchakuspa nin:
Llapan umalliykunaqa reykunakaman kanku.
9Ñoqaqa Karkimes llaqtatan atiparqani, hinallataq Kalno llaqtatapas,
Arfad llaqtatan atiparqani, hinallataq Hamat llaqtatapas,
Damasco llaqtatan atiparqani, hinallataq Samaria llaqtatapas.
10Askha dioskunayoq suyukunatan munaychakurqani,
Jerusalenmantapas Samariamantapas aswan askha idolokunayoq suyukunatan munaychakurqani.
11Imaynan Samaria llaqtatapas idolonkunatapas ruwarqani,
ahinallatataqmi Jerusalén llaqtatapas idolonkunatapas ruwarqosaq, nispa.
12Señor Diosqa Sión orqopipas Jerusalenpipas lliw ruwananta tukuspanmi ninqa: Asiria reyta muchuchisaq hatunchakuspa, umata hoqarispa, anchaykachaspa ruwasqanmanta. 13Paymi nin:
Ñoqa kikiypa atiyniywanmi ruwarqani,
ñoqaqa yuyaysapan kani,
yachaysapa kaspaymi suyukunata qechuspa qorpankunata ch'usaqyachirqani,
qhapaq-kayninkunatan hap'ikapurqani,
huk allin qhari hinan reyninkunatapas wikch'urqani.
14Llaqtakunaq qhapaq-kaynintan atiyniywan hap'ikurqani,
llapan hallp'atan hap'ikapurqani,
imaynan huk runa q'esanpi wikch'usqa runtukunata hap'ikun hinata,
manataqmi raphranta kuyurichiq karqanchu,
manallataq chhurunanta kicharispa qereqeqpas karqanchu, nispa.
15¿Hachaqa hap'iqnin runamanta aswan munayniyoq kasqanta yuyanmanchu?
¿Sierraqa kuchuqnin runamanta aswan munayniyoq kasqanta yuyanmanchu?
Manan, huk tawnapas k'aspilla kashaspaqa,
hap'iqnin runata manan kuyuchinchu.
16Chayraykun Tukuy-atiyniyoq Señor Diosqa millay onqoyta kachamunqa,
hinan allin kallpasapa soldadonkunaqa pisimanta pisi umphuyaykapunqa,
cuerponkutapas ancha ruphapakuywan qanqechinqa.
17Israelpa k'anchayninqa ninamanmi tukunqa,
Ch'uya Diosqa rawraq ninamanmi tukunqa,
hinan suyupi kashaq llapan khiskakunatapas ch'aphrakunatapas
huk p'unchayllapi rupharparinqa q'olaykunqa.
18Thami sach'a-sach'akunatapas allin ruruq hallp'akunatapas pasaqtan chaqorqarinqa,
imaynan millay onqoyqa huk onqosqa runata p'uchukachin hinata.
19Sach'a-sach'api mallkikunapas sinchi pisillañan qhepanqa,
huk erqeq yupay atinan hinallaña.
20Chay tiempopin pisilla qhepaq Isael runakuna,
Jacobpa miraynin kawsashaqkuna,
manaña hayk'aqpas muchuchiqninkunamanqa hap'ipakunqakuchu,
aswanmi cheqaqtapuni hap'ipakunqaku Israelpa Ch'uya Diosnin Señorman.
21Jacobpa miraynin qhepaq runakunaqa pisillan Atiyniyoq Diosman kutirikunqaku.
22Yaw Israel llaqta, mama qocha aqo hina ancha askhaña kanki chaypas,
sinchi pisillañan kutinkichis.
Diosmi unancharqan muchuchisqa kanaykichista,
chay muchuchiyqa chaninpunin.
23Tukuy-atiyniyoq Señor Diosmi muchuchiyta unanchanña,
chaytan llapan suyukunapi hunt'anqa.
24Tukuy-atiyniyoq Señor Diosmi nin:
Sionpi tiyaq llaqtalláy,
Asiria runakunataqa ama manchakuychu,
Egipto runakuna hinaña varankuwan waqtasuqtiykipas,
maqanankuwanña p'anasuqtiykipas.
25Qankunapaq k'arak phiñakuyniyqa thaniykapunqañan,
chaymantataq k'arak phiñakuyniyqa paykunata ch'usaqyachinqa, nispa.
26Tukuy-atiyniyoq Señor Diosmi Asiria runakunataqa hasut'iwan soq'anqa,
Madián runakunata Oreb Qaqapi soq'asqanta hina,
imaynan Egipto runakunata ch'usaqyachirqan
chay hinatan Asiria runakunata ch'usaqyachinqa.
27Chay p'unchaymi q'epichisqasuyki q'epita q'epirachisunki,
much'uykiman yugo churasqasuykipas p'akisqataq kapunqa.
Asiria runakunaq aswan-aswanta qayllaykamusqan
Asiria awqakunan Samariamanta wichanku,
28Ahat llaqtamantaq chayan,
chaymantataq Migrón llaqtaman rin,
Mikmas llaqtapitaq q'epinkunata saqen,
29wayq'ota chimpaspataq
Geba llaqtapi puñusun, ninku.
Ramá llaqtan llaksakun, Saulpa llaqtan Gabaataq usqhaylla ayqekun.
30¡Yaw Galim llaqta, kunkayoqta qapariy!
¡Yaw Laisa llaqta, uyariy!
¡Anatot llaqta, “Alaw” niy!
31Madmina llaqtan usqhaylla ayqen,
Gebim llaqtapi tiyaqkunan pakakunku.
32Phawaykuq awqaqa kunanpachan Nobpi sayaykun,
chaymantapachan Jerusalenpaq k'utupakun,
Sión orqopaq sarupakun.
Davidpa mirayninpa chanin kamachikusqan
33Tukuy-atiyniyoq Señor Diosta qhawariychis,
manchay kallpawanmi sach'akunata kumpan,
aswan hatun sayayniyoq kaqkunapas wit'usqan urman,
aswan alto kaqkunatapas pampamanmi wikch'upun.
34Huk hachallawanmi thami sach'a-sach'ata kumpan,
Atiyniyoq Diospa waqtasqanmi Libanopi sach'akunaqa urman.
Currently Selected:
ISAÍAS 10: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
