ISAÍAS 11
11
1Ichaqa wit'usqa kurkumanta ch'ikchimuq hinan
Davidpa mirayninmanta huk rey paqarimunqa,
saphinmantan ch'ikchi hina phutumunqa.
2Señor Diospa Espiritunmi mana p'itiyta paywan kashanqa,
ahinapin yachayniyoq allin yuyayniyoq kapunqa,
payqa kusa yuyaykuqmi allin kallpayoqmi kapunqa,
Señor Diospa munaynintan reqsinqa,
paytan manchakunqa.
3Señor Diosta yupaychaspan payqa kusikunqa.
Manan payqa ñawinpa rikusqanman hinallanchu t'aqtanqa,
manataqmi rimayta uyarispallachu huchachanqapas.
4Chanin-kayman hinan sarunchasqakunata t'aqtanqa,
suyupi wakchakunaq uyarichikusqanmanmi sayakunqa.
Rimarispallan runakunata huchachanqa,
pay kamachikuqtinmi mana chaninkunaqa wañunqa.
5Chanin-kaywan cheqaq-kaywan p'achaykusqallapunin purinqa.
6Lobopas borregopas kuskan tiyanqaku,
uturunkupas malta cabrachapas kuskan puñunqaku,
torillowan uña leonwanpas kuskan mikhunqaku,
huk erqetaq michiqninku kanqa.
7Wakawan china ukumariwanqa kuskan mikhunqaku,
uñankupas kuskallan puñunqaku,
leonqa toro hinan q'achuta mikhunqa.
8Wawaqa mach'aqwaypa t'oqonpipas pukllallanqan,
picaqpa t'oqonmanpas makinta haywaykullanqan.
9Imaynan mama qochaqa unuwan hunt'a kashan,
chay hinan kay pachaqa Señor Diosta reqsiq runakunawan hunt'a kashan,
chayraykun Diospa lliw ch'uya orqonpiqa manapuni chhikan mana allinpas kanqachu.
Kamachipaq apasqakunaq kutimpusqan
10Chay p'unchaymi Davidpa mirayninmanta paqarimuq reyqa llaqtakunaq huñukunanpaq huk señal hina kanqa, suyukunan payta maskhaspa purinqaku, paypa tiyasqan llaqtaqa sumaq ch'ak nishaqmi kanqa.
11Chay tiempopin Señor Diosqa llaqtanmanta puchuq runakunata wakmanta horqokampunqa, hinan paykunaqa kutimpunqaku Asiriamanta, Wichay Egiptomanta, Uray Egiptomanta, Etiopiamanta, Elammanta, Babiloniamanta, Hamatmanta, mama qocha pata suyukunamanta, islakunamantawan.
12Suyukunapaqmi huk señalta hoqarinqa,
kamachipaq apasqa Israel runakunatan huñunqa,
ch'eqerisqa kashaq Judá runakunatan kay pachantinmanta huñumunqa.
13Israelqa manan envidiakunqañachu,
Judata sarunchaqkunapas wañuchisqan kanqaku,
Israelqa manan Judata envidiakunqañachu,
Judapas manataqmi Israelpa awqanñachu kanqa.
14Mama qocha patapi kashaq Filistea runakuna contran iskayninku phawarinqaku,
inti lloqsimuy ladopi llaqtakunamantapas iskayninkun qhapaq-kayninkuta qechumunqaku.
Edom suyutapas Moab suyutapas munaychakunqakun,
Amón runakunatataq kamachinqaku.
15Señor Diosmi Egipto suyu Mama Qochata ch'akichinqa,
Eufrates mayutataq sinchi ruphashaq wayrawan phukuchinqa,
hinan mayuqa qanchis yarqha hinallaña qhepanqa,
runakunataq mana usut'ankuta ch'utikuspalla chimpanqaku.
16Señor Diospa llaqtanmanta puchuq runakuna Asiriamanta kutimpushaspanmi
huk hatun ñanta tarinqaku,
imaynan Israel runakunapas Egiptomanta lloqsimpushaspa tarirqanku hinata.
Currently Selected:
ISAÍAS 11: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
