ÉXODO 9
9
Uywakunaq wañusqan
1Chaymi Señor Diosqa Moisesta nirqan: —Rey Faraonpata riy hinaspa nimuy: Hebreo runakunaq Diosnin Señormi nin: Llaqtayta kachariy yupaychamuwanankupaq. 2Manataq kachariyta munankichu, hark'akunkiraqtaq chayqa, 3ñoqan manchay onqoywan muchuchisaq campo uywaykikunata, caballokunata, asnokunata, camellokunata, wakakunata, ovejakunatapas. 4Ichaqa Israelpa uywankunatan Egipto runakunamanta t'aqasaq, ahinapi Israel runakunaq mayqen uywanpas ama wañunanpaq, nispan, nispayki.
5Hinaspataq Señor Diosqa horata señalarqan: —Paqarinmi chayta kay suyupi ruwasaq, nispa. 6Paqarisnintataq Señor Diosqa chayta ruwarqan, chaymi Egipto suyu llapa uywa wañurarqan, Israel runakunaq uywantaq ichaqa mana hukllapas wañurqanchu. 7Hinan rey Faraonqa yachaqta kacharqan, chaymi willarqanku: Israel runakunaq uywanqa manan hukllapas wañusqachu, nispa. Chaypas rey Faraonpa sonqonqa rumiyasqan karqan, manataq Israel runakunata kacharirqanchu.
Lleq-nishaq ch'upu onqoy
8Señor Diosmi Moisestawan Aarontawan nirqan: —Hornomanta hapt'ay qhechinchata horqoychis. Qanmi Moisés, rey Faraonpa qayllanpi chayta wichayman hach'inki. 9Ñut'u hallp'amanmi qhechincha tukunqa, hinaspan Egipto suyuntinman chayaspa lleq-nishaq ch'upuwan hap'ichinqa runakunatapas uywakunatapas, nispa.
10Chaymi horno qhechinchata horqospa, rey Faraonpa qayllanpi sayaykurqanku, hinaspan Moisesqa wichayman hach'irqan. Hinan lleq-nishaq ch'upu hap'irqan runakunatapas uywakunatapas. 11Ch'upuqa hap'irqan layqakunata llapan Egipto runakunatapas, chaymi layqakunaqa mana Moisesman qayllaykuyta atirqankuchu. 12Señor Diostaq ichaqa rey Faraonpa sonqonta rumiyaykachirqan, chaymi mana paykunata kasurqanchu, Señor Diospa Moisesta nisqanman hina.
Chikchiq chayasqan
13Señor Diosmi Moisesta nirqan: —Tutallamanta sayariy, rey Faraonpa ñawpaqenpi sayaykuspa nimuy: Hebreo runakunaq Diosnin Señormi nin: Llaqtayta kachariy yupaychamuwanankupaq. 14Kay kutiqa llapa muchuchiyniytan qanman chayachimusaq, oficialniykikunamanpas, runaykikunamanpas, chaywan yachanki kay pachantinpiqa mana wak diosqa ñoqa hina kasqanta. 15Ñoqachus qantapas runaykikunatapas onqoywan hap'ichiyman karqan chayqa, ñan kay pachamanta chinkapuwaqña karqan. 16Chaywanpas ñoqan kawsachishayki, atiyniyta rikunaykipaq, kay pachantinpi reqsichikunaypaqwan. 17Chaypiwanpas llaqtay contraraqmi sayarishanki, ripunanpaq mana kacharispayki. 18Kayqa paqarinmi kunan hina horasta sinchi llasa chikchita chikchichimusaq, chay hina llasaqa manan hayk'aqpas Egipto suyupi tiyay qallarisqamanta kunankama karqanchu. 19Kachayyá campopi hayk'an kaq uywaykita wasiman huñumunanpaq, chikchiqa chayanqa campopi kaq llapa runamanmi animalmanwan, hayk'an wasi ukhuman mana huñusqaqa wañunqan, nispan, nispayki.
20Rey Faraonpa oficialninkunamanta Señor Diospa siminta manchakuqmi wasinman ayqechirqan kamachinkunatapas, uywankunatapas. 21Señor Diospa siminta mana kasuqmi ichaqa campopi saqerqan kamachinkunatapas uywankunatapas.
22Señor Diostaq Moisesta nirqan: —Altoman haywariy, Egipto suyuntinman chikchimunanpaq runakunamanpas, uywakunamanpas, campopi llapa wiñaqkunamanpas, nispa.
23Hinan Moisesqa tawnanta altoman haywarirqan, chaymi Señor Diosqa q'aqyaqechispa chikchichirqan, suyuntinmanmi lliphllikirqan. Chay hinatan Señor Diosqa Egiptoman chikchichimurqan. 24Chikchiqa mana thanispan lliphllikispa chayarqan. Manan hayk'aqpas Egipto suyuntinpi tiyay qallarisqamantapacha chay hina sinchitaqa chikchirqanchu. 25Chay chikchin k'irirqan Egipto suyuntinpi hayk'an campopi kaqta, runatapas uywatapas. Hinallataq campo llapa qoratapas saqtarqan, chay suyu llapa sach'atapas chaqorqan. 26Israel runakunaq tiyasqan Gosén suyullatan ichaqa mana chikchirqanchu.
27Chaymi rey Faraonqa Moisesta Aarontawan waqyachimuspa nirqan: —Reqsikunin huchallikusqayta, Señor Diosqa chaninmi, ñoqawan llaqtaywantaq mana chanin kayku. 28Señor Diosmanta mañakuychis q'aqyaqeypas chikchipas thanipunanpaq, ñoqataq kacharisqaykichis, manañan hark'asqaykichisñachu, nispa.
29Moisestaq payta nirqan: —Llaqtamanta lloqsispay hinan Señor Diosman makiyta mast'arispa mañakusaq, chaymi q'aqyaqeykunaqa thaninqa, manañataq chikchinqañachu, ahinapin yachanki kay pachaqa Señor Diospa kasqanta. 30Chaypas yachanin qanpas oficialniykikunapas Apu Señor Diostaqa manaraq manchakusqaykichista, nispa.
31Linopas cebadapas saqtasqan karqan, cebadaqa chukchasharqanñan, linopas t'ikasharqanñan. 32Trigotawan centenotawanqa manan imanarqanpaschu qhepa wiñayña kasqanrayku.
33Rey Faraonpa qayllanmanta llaqta hawaman lloqsispataq Moisesqa Señor Diosman makinta mast'arispa mañakurqan, hinan q'aqyaqeypas chikchipas thanirqan, parapas manañataq chayarqanñachu. 34Parapas, chikchipas, q'aqyaqeykunapas thanipuqtintaq rey Faraonqa yapamanta huchallikurqan, hinaspan paypas oficialninkunapas sonqonkuta rumiyaykachirqanku. 35Rey Faraonpa sonqonqa rumiyasqan karqan, chaymi Israel runakunataqa mana kacharirqanchu, Señor Diospa Moiseswan nichisqanman hinata.
Currently Selected:
ÉXODO 9: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
