ÉXODO 7
7
1Señor Diostaq Moisesta nirqan: —Ñoqan rey Faraonpaq ñoqa hina kanaykipaq churayki, wawqeyki Aarontaq profetayki kanqa. 2Qanmi lliw imaymana qanman ñoqaq kamachisqayta Aaronman ninki, wawqeyki Aarontaq rey Faraonta rimapayanqa Israel runakunata suyunmanta kacharipuqtin ripunankupaq. 3Ñoqataq ichaqa rey Faraonpa sonqonta rumiyaykachisaq, Egipto suyupi señalkunata musphanakunata askhayachishaqtiypas, 4rey Faraonqa manan kasusunkichischu. Chaymi ñoqaqa Egipto suyu contra sayarisaq, hinaspan Egipto runakunata sinchita muchuchispa chay suyumanta horqosaq ejército hina Israel llaqtayta. 5Ahinapin Egipto suyu contra sayarispa Israel runakunata chaymanta horqoqtiy, Egipto runakunaqa yachanqaku ñoqa Señor Diosqa kasqayta, nispa.
6Moiseswan Aaronwantaq Señor Diospa kamachikusqanta hina ruwarqanku. 7Rey Faraonta rimapayashaspan Moisesqa pusaq chunka watayoq karqan, Aaronpas pusaq chunka kinsayoq watayoq karqan.
Aaronpa tawnan
8Señor Diosmi Moisestawan Aarontawan nirqan: 9—Rey Faraonchus nisunkichis: Milagrota rikuchiwaychis, nispa chayqa, Moisés, qanmi Aaronta ninki: Tawnaykita rey Faraonpa ñawpaqenman chanqay mach'aqwayman tukunanpaq, nispayki, nispa.
10Moiseswan Aaronwanqa rirqankupunin rey Faraonpata, hinaspanmi Señor Diospa kamachikusqanta ruwarqanku. Aaronmi tawnanta chanqarqan rey Faraonpa ñawpaqenman oficialninkunaq ñawpaqenmanwan, mach'aqwaymantaq tukurqan. 11Hinan rey Faraonqa waqyachirqan yachayniyoqkunata layqakunata, chaymi Egipto layqakunapas kasqallantataq layqakuyninkuwan ruwarqanku. 12Sapankan tawnanta pampaman chanqarqan, hinan sapanka tawnaqa mach'aqwayman tukurqan. Aaronpa tawnantaq ichaqa chaykunaq tawnanta oqoykurqan. 13Chaypas rey Faraonpa sonqonqa rumiyaykachisqan karqan, manataq paykunata kasurqanchu, Señor Diospa nisqanman hina.
Unuq yawarman tukusqan
14Hinan Señor Diosqa Moisesta nirqan: —Rey Faraonpa sonqonmi rumiyasqa kashan, manan Israel runakunata kachariyta munanchu. 15Tutamanta rey Faraón Nilo mayuta rishaqtin, rispayki mayu patapi payta suyamuy, mach'aqwayman tukuq tawnaykitataq aparikuy. 16Chaypin nimunki: Hebreo runakunaq Diosnin Señormi qanman kachamuwarqan, nirqasunkitaq: Llaqtayta kachariy ch'inneqpi yupaychamuwananpaq, manataq kunankama kasushawankichu, nispa. 17-18Kunantaq nisunki: Kamachiy Moisés tawnanwan mayu unuta waqtaqtinmi, yawarman tukunqa. Mayu challwakunan wañuranqa, mayun asnarinqa, chaymi Egipto runakunaqa mayu unu ukyayta millakunqaku, chaypin yachanki ñoqa Señor Diosqa kasqayta, nispa, nispayki.
19Señor Diosmi Moisesta nirqan: —Aaronta niy: Tawnaykita hap'iy, hinaspa haywariy Egipto unukunaman, mayunkuman, yarqhankuman, qochankuman, p'uytunkumanpas, yawarman tukunanpaq. Chaymi Egipto suyuntinpi yawar kanqa, k'ullu puruñakunapipas rumi p'uyñukunapipas, nispayki, nispa.
20Hinan Moiseswan Aaronwan ruwarqanku Señor Diospa kamachikusqanta hina. Aaronmi tawnata hoqarirqan, hinaspan rey Faraonpapas oficialninkunaqpas rikushasqan mayu unuta waqtarqan, chaymi mayu unuqa llapallan yawarman tukurqan. 21Mayu challwakunapas wañurarqan, mayupas asnarirqan, chaymi Egipto runakunaqa mana chay mayu unuta ukyapurqankuchu. ¡Egipto suyuntinpitaq yawar karqan! 22Egipto layqakunapas kasqallantataq layqakuyninkuwan ruwarqanku, chaymi rey Faraonpa sonqonqa rumiyasqallapuni kasharqan, manataq Moisestawan Aarontawan kasurqanchu, Señor Diospa nisqanman hina. 23Hinan rey Faraonqa chaytapas mana kasuspa wasinta kutipurqan. 24Egipto suyuntinpitaq mayu patapi p'uytukunata hasp'irqanku ch'uya unuta horqonapaq, mayu unuta mana ukyapusqankurayku.
K'ayraq wakwamusqan
25Qanchis p'unchayñan karqan Señor Diospa mayuta waqtasqanmanta.
Currently Selected:
ÉXODO 7: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
