ÉXODO 5
5
Moiseswan Aaronwan rey Faraonta rimapayasqanku
1Chaymantataq Moiseswan Aaronwan rey Faraonpa ñawpaqenman haykurqanku, hinaspan payta nirqanku: —Israelpa Diosnin Señormi nin: Llaqtayta kachariy ripunanpaq, ch'inneqpi fiestata ruwapuwanankupaq, nispa, nispanku. 2Rey Faraontaq kutichirqan: —¿Pitaq chay Señor Diosri, siminta kasunaypaq, Israel runakunata kacharinaypaqpas? Manan Señor Diostaqa reqsinichu, manataqmi Israel runakunatapas kacharisaqchu, nispa.
3Paykunataq nirqanku: —Hebreo runakunaq Diosninmi rikhurimuwarqanku, chaymi valekuykiku ch'inneqta kinsa p'unchay puriyta rinaykupaq, hinaspa Señor Diosniykuman sacrificiokunata haywamusaqku, paqtan wañuchiwankuman onqoywanpas espadawanpas, nispa.
4Hinan Egipto suyu reyqa nirqan: —Yaw Moisés, yaw Aarón, ¿imaraykutaq runakunaq llank'ananta sayachinkichis? Kutiychis llank'anaykichisman. 5Chay Israel runakunaqa askhan, ¿qankunachu llank'anankuta sayachiwaqchis karqan? nispa.
6Chay p'unchaypachan rey Faraonqa kamachirqan mit'ani oficialkunata hinallataq capatazninkutapas: 7—Amañan kunanmantaqa runakunaman pajata qonkichischu adobenankupaq. ¡Paykuna rispa pajata pallakamuchunku! 8Hayk'atachus kunankama ruwashanku chay chhikallatapunin adobenankupaqqa kamachinkichis. ¡Amataq ima chhikallantapas pisiyachinkichischu! Qella kaymi rimarinku: ¡Haku sacrificiokunata Diosninchisman haywamusunchis! nispanku. 9Astawan paykunata llank'achiychis, ahinapin tukuy tiempo llank'ashaspa llulla simikunata mana kasunqakuchu, nispa.
10Mit'ani oficialkunataq capatazninkupiwan runakunata nirqanku: —Kay hinatan rey Faraonqa kamachikun: Manan pajata qosqaykichischu. 11Qankunan rispaykichis pajataqa maymantapas pallamunkichis, manataqmi llank'anaykichisqa ima chhikallanpas pisiyanqachu, nispa, nispanku.
12Chaymi Israel runakunaqa Egipto suyuntinman ch'eqeykurqanku rastrojota pallamuq pajawan hina adobenankupaq. 13Mit'ani oficialkunataq paykunata qatirqan: —Paja churasqa hayk'atachus sapa p'unchay adoberqankichis chay chhikallatataqmi adobenkichis, nispa.
14Rey Faraonpa mit'ani oficialninkunan Israel runa capatazkunata churasqaku, chay oficialkunan capatazkunata waqtarqanku: —¿Imanaqtintaq adobe ruwayta mana tukuchinkichischu qayna p'unchaypas kunan p'unchaypas ñawpaq hina? nispanku.
15Chaymi Israel runa capatazkunaqa rey Faraonman uyarichikuq rispa nirqanku: —¿Imanaqtinmi kamachiykikunata kay hinata ruwawankiku? 16Manan kamachiykikunaman pajata qowankuchu, chaywanpas: Adobeychis, niwankuraqtaq. Chaymantapas waqtawankuraqtaq. ¡Oficialniykikunaqa mana allintan ruwashan! nispanku.
17Rey Faraontaq nirqan: —Qankunaqa qellan kankichis, arí, aysarayashankichismi, chaymi ninkichis: Haku sacrificiokunata Señor Diosman haywamusunchis, nispaykichis. 18Lloqsiychis, llank'amuychis. Manan pajataqa qosunkichischu, hayk'atachus adobenallaykichistapunin ruwankichis, nispa.
19Hinaqtinmi Israel runa capatazkunaqa llakipi rikukurqanku, paykunata: Manan sapa p'unchay adobenaykichis ima chhikallanpas pisiyachisqachu kanqa, nispa niqtin. 20Moiseswan Aaronwantaq hawapi suyasharqanku, hinan capatazkunaqa rey Faraonpa qayllanmanta lloqsimuspanku, 21paykunata nirqanku: —Señor Diosmi kayta rikuspa huchachasunkichis, rey Faraonwanmi oficialninkunapiwan cheqnichiwankiku, qankuna hawan wañuchisqapas kasaqku, nispa.
Moisespa mañakusqan
22Chaymi Moisesqa Señor Diosman qayllaykuspa nirqan: —Señornilláy, ¿imanaqtinmi kay llaqtaykita ñak'arichinki? ¿Imapaqmi kachawarqanki? 23Sutiykipi rimapayanaypaq rey Faraonman risqaymantapachan kay llaqtaykita aswanta muchuchiwanku, qanpas manataq imanankipaschu llaqtaykita qespichinaykipaq, nispa.
Currently Selected:
ÉXODO 5: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
