ÉXODO 4
4
1Hinan Moisesqa kutichirqan: —Paykunari creewankumanchus, simiytapas uyariwankumanchus, aswanpas niwanqakuchá: Manan Señor Diosqa rikhurirqasunkichu, nispanku, nispa. 2Señor Diostaq payta nirqan: —¿Imatan chayta hap'ishanki? nispa.
Paytaq: —Tawnatan, nirqan.
3Señor Diostaq kamachirqan: —Pampaman chayta chanqay, nispa. Hinan Moisesqa chayta pampaman chanqarqan, hinaqtinmi tawnaqa mach'aqwayman tukurqan. Moisestaq mach'aqwaymanta ayqerirqan.
4Chaymi Señor Diosqa Moisesta nirqan: —Chupanmanta hap'iy, nispan. Chupanmanta hap'iqtintaq makinpi tawnaman tukurqan. 5Nillarqantaq: —Chaywanmi creenqaku machulaykikunaq Diosnin, Abrahampa, Isaacpa, Jacobpa Diosnin, ñoqa Señor Diosqa qanman rikhurisqayta, nispa.
6Señor Diosqa nillarqantaqmi: —Makiykita qhasqoykiman winaykukuy, nispa. Paytaq makinta qhasqonman winaykukurqan, horqokamuqtintaq makinqa rit'i hina yuraqllaña onqoyniyoq kapushasqa. 7Hinan Diosqa nirqan: —Huktawan makiykita qhasqoykiman winaykukuy, nispa. Chaymi payqa huktawan makinta qhasqonman winaykukurqan, huktawan horqokamuqtintaq wakin aychan hina iman kaq kapushasqa. 8Señor Diosqa nillarqantaqmi: —Manataq ñawpaqkaq señalwan creesunkikuchu kasusunkikuchu chayqa, qhepakaq señalwanmi creesunkiku. 9Manataqchus kay iskay señalwanpas creesunkikuchu kasusunkikuchu chayqa, mayu unuta wisispa hallp'a pampaman hich'anki. Hinan chay unuqa hallp'a pampaman chayaspa yawarman tukunqa, nispa.
10Moisestaq Señor Diosta nirqan: —¡Ay, Señor Diosníy! Manan hayk'aqpas allin rimaq runachu karqani, ñawpaqpas kamachiykiman rimaykuwasqaykimantapas. Manan usqhay rimaqchu kani, sasa rimaqmi kanipas, nispa.
11Señor Diostaq payman kutichirqan: —¿Pitaq runata rimachin? Chayri, ¿pitaq ruwan upatapas, roqt'otapas, rikuqtapas, ñawsatapas? Ñoqa Señor Diospunin ruwani. 12Chhaynaqa rillay, ñoqan rimachisqayki, imatachus rimanaykitan yachachisqayki, nispa.
13Chaymi Moisesqa nirqan: —¡Ay, Señor Diosníy! Rogakuykin, hukta kachay, nispa. 14Hinan Señor Diosqa Moisespaq phiñakuspa nirqan: —Chaypin Leví runa wawqeyki Aarón kashan, ñoqaqa yachanin payqa allin rimaq kasqanta. Paymi taripamuqniyki hamushan, qanta rikuspan anchata kusikunqa. 15Qanmi payta rimapayanki, rimanan simikunatan yuyaychanki, ñoqataq rimachisqayki paytapas rimachisaq, yachachisqaykichistaq imatachus ruwanaykichistapas. 16Qanmi Aaronta rimapayanki ñoqapas rimapayashayman hinata, paytaq rimapayasqaykita runakunaman willanqa. 17Kay tawnatan apanki, kaywanmi musphanakunata ruwanki, nispa.
Moisespa Egipto suyuman kutisqan
18Moisesmi suegron Jetroq wasinman kutispa payta nirqan: —Valekuykin Egipto suyupi wawqeykunaman rinaypaq, kutispaymi kawsashankuraqchus icha manachus chayta yachamusaq, nispa.
Chaymi Jetroqa Moisesta: —Sumaqllaña rirqoy, nirqan. 19Señor Diosmi Moisesta Madián suyupi nillarqantaq: —Egipto suyuta kutipuy, wañuchiyta munasuqniykikunaqa wañupunkuñan, nispa. 20Chaymi Moisesqa warmintapas churinkunatapas huk asnoman sillaykachirqan, hinaspan Egipto suyuman kutirqan. Diospa tawnantapas aparikullarqantaq. 21Señor Diosqa Moisesta nillarqantaq: —Egiptoman kutispaykiqa, rey Faraonpa ñawpaqenpin kallpachasqay kaspa musphanakunata ruwanki. Ñoqataq sonqonta rumiyaykachisaq, chaymi Israel runakunata mana kacharinqachu. 22Rey Faraontan ninki: —Señor Diosmi nin: Israelqa phiwi churiymi. 23Ñan niykiña yupaychamuwananpaq churiyta kacharinaykita, manataq ripunanpaq kachariyta munankichu chayqa, ñoqan phiwi churiykita wañuchisaq, nispayki, nispa.
24Ñan puriyninkupi samakuna cheqaspin Señor Diosqa Moiseswan tuparqan, hinaspan wañuchiyta munarqan. 25Chaymi Seforaqa qhesqa rumita hap'ispa churinpa qhari-kaynin qarachata kuchuqarqan, hinaspa chaywan Moisespa phakanta tupaykurqan: —Qanqa cheqaqpunin ñoqapaq yawar qosa kanki, nispa. 26Chayraqmi Señor Diosqa Moisesta ripunanpaq kacharirqan. (Seforaqa: Yawar qosa, nispaqa nirqan qhari-kayta señalasqanraykun).
27Chaykamataq Señor Diosqa Aaronta nirqan: —Moisesman taripaq ch'inneqta riy, nispa. Chaymi payqa rirqan, Diospa orqonpi tupaspataq Moisesta much'aykuspa napaykurqan. 28Hinaqtinmi Moisesqa Aaronman willarqan Señor Diospa kamachimusqan llapan simikunata, hinallataq llapan señalkunata ruwanapaq kamachimusqantapas.
29Hinaspan Moiseswan Aaronwan rispa, llapa Israel kurak runakunata huñuykurqanku. 30Aarontaq Señor Diospa Moisesman lliw imaymana nisqanta paykunaman willarqan, Moisestaq runakunaq rikushasqan señalkunata ruwarqan, 31paykunataq creerqanku. Hinaspa Señor Diospa paykunata qhawamusqanta, ñak'arisqankutapas rikusqanta yachaspanku, yupaychanankupaq k'umuykukurqanku.
Currently Selected:
ÉXODO 4: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
