ÉXODO 3
3
Diospa Moisesta waqyasqan
1Madián suyupi sacerdote suegron Jetroq ovejankunata michishaspataq, Moisesqa ovejata ch'inneq chimpaman qatiykurqan, hinaspa chayarqan Diospa orqon Horebkama. 2Señor Diospa angelninmi Moisesman rikhurirqan t'ankar sonqo nina rawraypi. Paytaq qhawarispa rikurqan t'ankarpa rawrashaspa mana ruphasqanta. 3Hinaqtinmi Moisesqa nirqan: ¡Musphanamá kayqa! Risaq, qhawamusaq imanaqtinchus haqay t'ankarta mana ruphasqanta yachanaypaq, nispa.
4Qhawananpaq pay qayllaykusqanta Señor Diosqa rikuspataq, t'ankar ukhumanta waqyamurqan: —¡Moisés! ¡Moisés! nispa.
Paytaq kutichirqan: —Uyarishaykin, nispa. 5Hinan Señor Diosqa nirqan: —Sayashasqayki cheqasqa ch'uyan, chayrayku ama asuykamuychu, aswanpas usut'aykita ch'utikuy. 6Ñoqan kani taytaykiq Diosnin, hinallataq Abrahampa, Isaacpa, Jacobpa Diosnin kani, nispa. Chaymi Moisesqa Diosta qhawariyta manchakuspa uyanta qataykukurqan.
7Señor Diosqa nillarqantaq: —Rikunipunin llaqtaypa Egipto suyupi muchushasqanta, uyarinin mit'ani oficialninku hawa waqyakamusqankuta, yachanipunin ñak'arishasqankutapas. 8Egipto runakunamanta kacharichiqmi uraykamuni. Paykunatan chay suyumanta horqospa allinkaq hatunkaq hallp'aman pusasaq, imaymanaq hunt'asqa wiñanan hallp'aman. Chaypin tiyan Canaán runakuna, Het runakuna, Amor runakuna, Fares runakuna, Hiv runakuna, Jebus runakunapas. 9Kayqa Israel runakunaq waqyakamusqantan uyarini, rikullanitaqmi Egipto runakunaq sinchi muchuchisqantapas. 10Chayrayku rey Faraonman riy, paymanmi kachasqayki Egipto suyumanta Israel llaqtayta horqomunaykipaq, nispa. 11Moisestaq ichaqa Diosta nirqan: —¿Pitaq ñoqari kani rey Faraonman rispa Israel runakunata Egipto suyumanta horqomunaypaq? nispa.
12Chaymi Diosqa nirqan: —Qanwanmi ñoqa kasaq. Egipto suyumanta llaqtayta horqoqtiykin, kay orqopi yupaychawankichis, chaywanmi ñoqaq kachasqayta yachanki, nispa.
13Moisestaq Diosta nirqan: —Israel runakunaq kasqanman rispay: Machulaykichiskunaq Diosninmi qankunaman kachamuwan, niqtiyqa: ¿Imataq sutinri? niwanqakun. Hinari, ¿ima nisaqtaq paykunata? nispan.
14Diostaq Moisesman kutichirqan: —Ñoqan kani ñoqaqa. Israel runakunata ninki: “Ñoqan kani” nisqa sutiyoqmi qankunaman kachamuwan, nispayki, nispa. 15Diosqa Moisesta nillarqantaq: —Kay hinatan Israel runakunata ninki: Señor Diosmi machulaykichiskunaq Diosnin, Abrahampa, Isaacpa, Jacobpa Diosninmi qankunaman kachamuwan, nispayki. Kay sutiymi wiñaypaq, kay sutiywanmi wiñay-wiñaypaq reqsiwanqaku. 16Rispayki Israel kurak runakunata huñumuy, hinaspa paykunata niy: Señor Diosmi, machulaykichiskunaq Diosnin, Abrahampa, Isaacpa, Jacobpa Diosninmi rikhurimuwarqan. Paymi nisunkichis: Cheqaqtapunin qhawamurqaykichis, rikurqanitaq Egiptopi imanasqasuykichistapas. 17Ñoqan Egipto suyupi ñak'arisqaykichismanta horqonaypaq prometekuykichis, hinaspaymi imaymanaq hunt'asqa wiñanan hallp'aman pusasqaykichis. Chaypin tiyan Canaán runakuna, Het runakuna, Amor runakuna, Fares runakuna, Hiv runakuna, Jebus runakunapas, nispan, nispayki.
18Simiykitaqa uyarinqakun, hinan Israel kurak runakunawan Egipto suyu reypata rispayki ninki: Hebreo runakunaq Diosnin Señormi rikhurimuwarqanku. Chaymi kunan valekuykiku ch'inneqta kinsa p'unchay puriyta rinaykupaq, Apu Señor Diosniykuman sacrificiokunata haywamunaykupaq, nispayki. 19Ichaqa Egipto suyu reyqa manan rinaykichista munanqachu mana sinchi mat'isqaqa. Chaytaqa yachanin, 20chaymi atiyniywan imaymana musphanakunata chaypi ruwaspa Egipto runakunata hasut'isaq, chayraqmi ripunaykichispaq kacharipusunkichis. 21Ñoqataq Egipto runakunawan sumaqta qhawarichisqaykichis, lloqsishaspaykichisqa imallantinpas ripunaykichispaq. 22Sapanka warmin mañakunqa wasi-masinmantapas qorpanmantapas qolqe alhajakunata, qori alhajakunata, p'achakunatapas, chaykunawanmi p'achaykuchinkichis churiykichistapas ususiykichistapas, ahinatan Egipto runakunata llat'anankichis, nispa.
Currently Selected:
ÉXODO 3: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
