ÉXODO 34

Kamachikuy simiyoq iskay mosoq p'alta rumi

(Dt 10.1-5)

1Señor Diosmi Moisesta nirqan:

—Ñawpaq kuti hina iskay p'alta rumita ch'eqoy, chaykunapin qelqasaq p'akisqayki ñawpaq p'altakunapi kasharqan chay simikunata. 2Tutallamanta wakichikuspan Sinaí orqoman wichamunki, chay orqo patapitaq qayllaykamuwanki. 3Aman pi runapas qanwan wichamunqachu, aman pipas orqontinpi rikhurillanqapaschu. Aman ovejapas wakapas orqo chimpapi mikhunqachu, nispa.

4Hinan Moisesqa iskay p'alta rumita ch'eqorqan ñawpaq p'altakunata hina. Hinaspan tutallamanta sayarispa, iskaynin p'alta rumita aparikuspa Sinaí orqota wicharqan Señor Diospa kamachisqanman hina. 5Señor Diostaq phuyupi uraykamurqan, hinaspa chaypi Moiseswan kasharqan, paytaq:

Sutiyqa Señor Diosmi, nispa rimarirqan. 6Moisespa ñawpaqenta pasashaspataq kunkayoqta nirqan:

—¡Señor Diosmi kani! ¡Señor Diosmi kani! ¡Khuyapayakuq sumaq sonqo Diosmi kani! Manan usqhaylla phiñakuqchu kani, mana p'itiyllapuni munakuqmi cheqaqtaqmi kani. 7Waranqa miraykaman mana p'itiyta munakushallanipuni, huchallikusqatapas mana kasukusqatapas huchatapas pampachanin, huchallikuqtaqa manapunin hinallatachu qhawani, aswanmi tayta-mamakunaq huchallikusqanmanta muchuchini wawankunata, nietonkunata, nietonpa wawankunata ima, nispa.

8Hinaqtinmi Moisesqa usqhaylla pampakama k'umuykukuspa Señor Diosta yupaycharqan. 9Nirqantaq:

—Señor Diosnilláy, sumaqtapunichus rikuwanki chayqa, puriysiwayku, kay llaqtaña k'ulluchakushan chaypas, huchallikusqaykuta huchaykuta ima pampachaykuwayku, hinaspa qanpaq hap'ikapuwayku, nispa.

Diospa wakmanta rimanakusqan

10Señor Diostaq nirqan:

—Ñoqan qankunawan rimanakuni. Musphanakunatan qhawashasqaykichis ruwasaq, manan chay hinakunaqa kay pachantinpipas ruwasqachu karqan, mayqen hatun suyupipas. Ñoqa Señor Diosmi qankunapaq musphanakunata ruwasaq, hinan maypichus tiyasqaykichis llaqta runakuna may musphana kasqanta rikunqaku.

11Kunan qanman kamachisqayta hunt'ay. Ñoqaqa suyuman haykusqaykiman hinan wikch'usaq Amor runakunata, Canaán runakunata, Het runakunata, Fares runakunata, Hiv runakunata, Jebus runakunatawan. 12Aman maymanchus haykunki chay suyupi tiyaqkunawan imatapas rimanakunkichu, ama qankunapaq toqlla kanankupaq. 13Altarninkutan thuninkichis, yupaychana saywa ruminkutan p'akinkichis, Asera nisqa diosankutan kumpankichis. 14Aman mayqen diosmanpas k'umuykukunkichischu, ñoqaqa Señor Diosmi kani, sutiypas Sienteq nisqan, Sienteq Diosmi kani.

15Aman imatapas chay suyupi tiyaqkunawan rimanakunkichischu. Paykunawanchus rimanakunkichis chayqa, diosninkuta yupaychaspanku wachuq huchata ruwaspa, diosninkumanpas sacrificiokunata haywaspa waqyasunkiku, hinan sacrificasqankuta mikhunkichis. 16Paqtataq ususinkuwan churiykichista casarachiwaqchis, ususinkuqa diosninkuta yupaychaspankun wachuq huchata ruwaspa, churiykichista chay wachuq huchallapitaq purichinkuman.

17Ama unuyachispa hich'asqa dioskunataqa ruwakunkichischu.

Watapi kinsa hatun fiestakuna

(Ex 23.14-19; Dt 16.1-17)

18Mana Qonchuyoq T'anta Fiestata ruwapuwanki. Qanta kamachisqayman hinan qanchisnintin p'unchayta mana qonchuyoq t'antata Abib killallapipuni mikhunki, chay killapin Egipto suyumanta lloqsimpurqanki. 19Llapa phiwi qhari naceqqa ñoqaqmi, hinallataq llapa ñawpaq wachay orqo uña wakapas ovejapas cabrapas.

20Asnoq ñawpaq wachasqantan ichaqa huk borregowan kutichikapunki, manataq kutichikapunkichu chayqa, kunkantan q'ewipunki. Llapa phiwi churiykiq rantinpitaq ofrendata haywawanki. Manataqmi pipas mana ofrenda apantinqa qayllaykamuwanqachu.

21Soqtantin p'unchaymi llank'anki, qanchiskaq p'unchaypitaqmi samakunki. Yapuyña cosechayña kaqtinpas qanchiskaq p'unchaypiqa samakunkin.

22Ñawpaqkaq trigo rurusqata haywaspa Semanakuna nisqa Fiestatapas ruwallankitaqmi, hinallataq Cosecha Tukukuy Fiestatapas.

23Chay hinapin watapi kinsa kutita llapa qhari qayllaykamuwanqa Israelpa Diosnin ñoqa Qollana Señor Diospa ñawpaqeyman. 24Ñoqan hatun suyukunata qayllaykimanta wikch'usaq, hinaspa hallp'aykita hatunyachisaq. Manataqmi pipas hallp'aykiman suchuykamunqachu, ñoqa Apu Señor Diosniykiq ñawpaqeyman watapi kinsa kutita qayllaykamuwanaykipaq riqtiyki.

25Aman qonchuyoq t'antata sacrificio yawartawanqa haywawankichu. Aman Alqaspa Pasarpariy Fiesta sacrificasqamantaqa imapas paqarisninkamaqa saqekunqachu.

26Chakraykiq allinnin ñawpaq rurusqantan ñoqa Apu Señor Diosniykiq wasiyman apamuwanki.

Aman cabrachata mamanpa lechenpi t'impuchinkichu, nispa.

27Señor Diosmi Moisesta nirqan:

—Kay simikunata qelqay, kay simikunaman hinan qanwanpas Israelwanpas rimanakuni, nispa. 28Moisestaq Señor Dioswan chaypi qhepakurqan tawa chunka p'unchayta tawa chunka tutatawan, manan mikhunatapas mikhurqanchu, manan unutapas ukyarqanchu. Chay p'alta rumikunapin qelqarqan rimanakuy simikunata, chunka kamachikuy simita.

Orqomanta Moisespa uraykamusqan

29Chaymantataq Moisesqa Sinaí orqomanta uraykamurqan kamachikuy simiyoq iskaynin p'alta rumi apantin. Orqomanta uraykamushaspanmi Moisesqa mana reparakurqanchu Dioswan rimasqan qhepata uyanpa k'anchashasqanta. 30Aaronwan Israel llapa runakunawan Moisesta qhawarispankutaq uyanpa k'anchashasqanta rikurqanku, hinan manchakuspa mana payman asuykurqankuchu. 31Moisestaq ichaqa paykunata waqyarqan. Aaronwan llaqta llapa uma runawan payman asuykuqtinkutaq, Moisesqa paykunata rimapayarqan. 32Chaymantataq Israel llapa runakuna asuykurqanku, paykunatan Moisesqa kamachirqan tukuy imaymanata Sinaí orqopi Señor Diospa payman kamachimusqanta. 33Paykunaman rimaykusqan qhepatataq Moisesqa uyanta huk qatawan qataykukurqan.

34Señor Dioswan rimananpaq Dioswan Tupana Karpaman haykuspataq Moisesqa qatanta horqokuq Karpamanta lloqsinankama. Lloqsimuspataq Israel runakunaman willaq Señor Diospa kamachimusqanta. 35Israel runakunaqa Moisespa uyanta qhawarispan, k'anchashaq uyayoqta rikuqku, chaymi Moisesqa uyanta qatawan qataykukuq, huktawan Señor Dioswan rimaq haykunankama.

Currently Selected:

ÉXODO 34: QC88

Highlight

Copy

Compare