ÉXODO 33
33
Purinankupaq Señor Diospa kamachikusqan
1Chaymantataq Señor Diosqa Moisesta nirqan:
—Kaymanta ripuy, qanpas Egipto suyumanta pusamusqayki llaqtapas. Ripuychis Abrahamman, Isaacman, Jacobmanwan:
Mirayniykimanmi chayta qosaq, nispa jurasqay suyuman. 2Ñoqataq pusanasuykipaq angelta kachamusaq, hinaspan suyunkumanta wikch'usaq Canaán runakunata, Amor runakunata, Het runakunata, Fares runakunata, Hiv runakunata, Jebus runakunatawan. 3Riy imaymanaq hunt'asqa wiñanan hallp'aman. Manan ñoqaqa riysisqaykichischu, paqtan ñanpi wañurqarichiykichisman k'ullu kasqaykichisrayku, nispa.
4Llaqtataq chay k'arak simita uyarispa mayta llakikurqan, manataq pipas alhajakunawan sumaqchakurqanchu. 5Señor Diosmi Moisesta nisqa:
—Israel runakunata nimuy:
Señor Diosmi nin:
Qankunaqa k'ullu runan kankichis, asllatapas riysiykichisman chayqa, wañurqarichiykichismanmi. Kunallanña alhajakunata horqokuy, hinan qankunata ima ruwaytapas yuyaykusaq, nispa, nispayki.
6Hinaqtinmi Israel runakunaqa alhajakunata Horeb orqopi horqokapurqanku manañataq churakapurqankuchu.
Dioswan Tupana Karpa
7Sapa kuti Israel runakuna astakuspa karpakuqtinkun, Moisesqa karpata hoqarispa karpa-karpamanta chhikan karupi sayarichiq, chaytan suticharqan “Dioswan Tupana Karpa” nispa. Pipas Diosta tapukuyta munaspaqa, karpa-karpa hawapi kashaq Dioswan Tupana Karpamanmi riq. 8Karpata Moisés rishaqtintaq llaqtallantin sayariq, sapankataq karpanku punkupi sayaqku Moisespa qhepanta qhawaspa Karpaman haykunankama. 9Karpaman Moisés haykuqtintaq, sayashaq phuyu uraykamuq hinaspa Karpa punkupi sayaykuq, Señor Diostaq Moiseswan rimaq. 10Sayashaq phuyu Karpa punkupi kashaqta llaqtallantin rikuspataq, sapanka karpanku punkupi pampakama k'umuykukuqku. 11Señor Diosmi Moiseswan uya pura rimaq, imaynan pipas runamasinwan riman hinata. Chaymantataq payqa karpa-karpaman kutipuq. Nunpa churin Josué wayna kamachintaq ichaqa Dioswan Tupana Karpallapipuni kashaq.
Llaqtanta puriysinanpaq Señor Diospa rimarisqan
12Moisesmi Señor Diosta nirqan:
—Qanmi niwarqanki:
Kay llaqtata pusay, nispa, manataqmi qanqa willawankichu pitawanchus kachawanaykita. Chaypas, qanmi niwarqanki:
Ñoqaqa reqsiykipunin sumaqtan rikurqaykipas, nispayki. 13Kunanqa, sumaqtataq rikuwanki chayqa, rogakuykin yuyaykusqaykikunata yachachiwanaykipaq, qanta reqsinaypaq sumaqllatapuni rikuwanaykipaqwan. Kay runakunaqa llaqtaykin riki, nispa.
14Señor Diostaq nirqan:
—Ñoqaqa puriysisqaykipunin, hinaspan samachisqayki, nispa.
15Moisestaq kutichirqan:
—Manataq puriysiwankichu chayqa, ama kaymanta pusawaykuchu. 16Manataq puriysiwankikuchu chayqa, manan pipas yachanqachu ñoqatapas llaqtaykitapas sumaqta rikuwasqaykikuta. Ñoqaykuwan purisqallaykiwanmi kay pachapi kashaq llapa wak llaqtakunamanta t'aqasqa kasqaykuqa yachakunqa, nispa.
17Hinan Señor Diosqa Moisesta nirqan:
—Kay niwasqaykitapas ruwallasaqtaqmi sumaqta qanta rikusqayrayku, ñoqaqa reqsiykipunin, nispa.
18Chaymi Moisesqa nirqan:
—Rogakuykin lliphlli-kayniykita rikuchiwanaykipaq, nispa.
19Señor Diostaq kutichirqan:
—Ñoqan tukuy allin-kayniyta rikuchisqayki, hinaspan ñawpaqeykipi:
Sutiyqa Señor Diosmi, nispa rimarisaq. Pitachus:
Sumaqta rikusaq, nisqaytan sumaqta rikusaq, pitachus:
Khuyapayasaq, nisqaytan khuyapayasaq. 20Ichaqa manan uyayta rikuyta atiwaqchu, manan pi runapas rikuwaspaqa kawsanmanchu. 21Qhawariy, kayqa qayllaypin huk cheqas kashan, kay qaqa patapin qanqa sayaykunki, 22lliphlli-kayniy pasashaqtintaq ñoqaqa huk qaqa k'aktuman sayaykachisqayki, hinaspan makiywan pakaykusqayki pasanaykama. 23Chay qhepatataq makiyta hoqaripusaq, hinan wasayta rikunki, ichaqa manan uyaytaqa rikunkichu, nispa.
Currently Selected:
ÉXODO 33: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
