ÉXODO 35
35
Samana p'unchaypaq kamachisqa simi
1Moisesmi Israel llapan runakunata huñuykuspa nirqan:
—Kaykunatan hunt'anaykichispaq Señor Diosqa kamachimuwarqan:
2Soqtantin p'unchaymi llank'akunqa, qanchiskaq p'unchaytaqmi ñoqa Señor Diospaq t'aqasqa hatun samana p'unchay kanqa. Pipas chay p'unchaypi llank'aqqa wañuchisqapunin kanqa. 3May tiyasqaykichispipas aman samana p'unchaypiqa ninatapas hap'ichinkichischu, nispan, nispa.
Diospa karpanpaq ofrenda
(Ex 25.1-9)
4Moisesmi Israel llapan runakunata nirqan:
—Señor Diosmi kamachikun:
5Ñoqapaq ofrendata apamuychis. Llapa qoykukuq sonqoyoq ñoqa Señor Diosman ofrendata apamuchun:
qoritapas, qolqetapas, broncetapas, 6llawlli-puka millmatapas, sani-puka millmatapas, rawraq-puka millmatapas, yuraq rit'i linotapas, cabra suphutapas, 7puka teñisqa anejo qarakunatapas, llamp'uy-llamp'u qarakunatapas, acacia kurkutapas, 8lamparakunapaq olivo aceitetapas, hawina aceitepaq q'apaq inciensopaqwan q'apaqkunatapas, 9hinallataq yanayoq yuraq umiña rumikunatapas, umiña rumikunatapas uma sacerdoteq unkunman qhasqo-ch'uspanmanwan k'askachinapaq, nispan, nispa.
Karpa ruwanamanta
(Ex 39.32-43)
10Moisesmi nirqan:
—Tukuy allin yachaq artesanoykichiskunan hamunan, hinaspan Señor Diospa kamachikusqanta tukuy imaymanata ruwanan:
11Señor Diospa tiyananta karpantinta, karpaq qatanta, ganchonkunata, marconkunata, suskhuq k'aspinkunata, postenkunata, sayanankunatawan, 12cajata, suskhuq k'aspikunatawan, kirpanata, Ch'uyay-ch'uya Cheqasta t'aqaq cortinata, 13mesata, suskhuq k'aspikunantinta, llapa imaymanantawan, Diospa ñawpaqenpi churana t'antatawan, 14k'anchaqpaq candelerota kaqninkunatawan, lamparachakunata aceitetawan, 15incienso ruphachina altarta, suskhuq k'aspikunantinta, hawina aceiteta, q'apaq inciensota, karpa punku cortinata, 16ruphachina sacrificiopaq altarta, bronce rejillantawan, suskhuq k'aspinkunatawan llapa imaymanantawan, tiyanayoq puruñatapas, 17kanchapaq cortinakunata, postekunata, sayanankunatawan, kancha punku cortinata, 18karpapaq takarpukunata, kanchapaq takarpukunatawan waskhakunantinta, 19karpapi servinapaq p'achata, sacerdote Aaronpaq ch'uya p'achata, churinkunapaq sacerdote p'achakunatawan, nispa.
Llaqtaq ofrendata apamusqan
20Hinaqtinmi llapa Israel runakunaqa Moisespa qayllanmanta ripurqan. 21Hinan llapan pichus sonqon kuyurichisqakuna, hinallataq pikunachus tukuy sonqoyoqkuna Señor Diospaq ofrendantin hamurqanku Dioswan Tupana Karpata ruwanapaq, lliw imaymana ruwanapaq, ch'uya p'achapaqwan. 22Qharikunapas warmikunapas tukuy sonqonkuwanpunin apamurqanku tukuy imaymana rikch'aq qori alhajakunata:
t'ipanakunata, aretekunata, anillokunata, walqakunata. Llapallankun qorinkuta Señor Diospaq ofrendata t'aqamurqanku. 23Llapa llawlli-puka millmayoqkunan, sani-puka millmayoqkunan, rawraq-puka millmayoqkunan, ñañuy-ñañu linoyoqkunan, cabra suphuyoqkunan, puka teñisqa anejo qarayoqkunan, llamp'uy-llamp'u qarayoqkunapas chaykunata apamurqanku. 24Pipas qolqe ofrendata otaq bronceta hayway atiqqa Señor Diosmanmi chay ofrendata apamurqan. Pipas acacia kurkuyoqqa imaymana ruwanapaqmi apamurqan. 25Hinallataq kusa phuskay yachaq llapa warmikunapas phuskarqanku, hinaspan chay phuskasqankuta apamurqanku:
llawlli-puka q'aytuta, sani-puka q'aytuta, rawraq-puka q'aytuta, ñañuy-ñañu lino q'aytutawan. 26Phuskayta munaq kusa phuskay yachaq llapa warmipas cabra suphuta phuskarqanku. 27Uma runakunan apamurqanku yanayoq yuraq umiña rumikunata, hinallataq wak umiña rumikunatapas unkuman qhasqo-ch'uspamanwan k'askachinapaq. 28Apamullarqankutaq q'apaqkunata aceitetawan k'anchapaqpas, hawina aceitepaqpas, q'apaq inciensopaqwan ima. 29Israel qharikunapas warmikunapas, ruwanapaq hayk'an apamuytapuni munaqkunan Señor Diosman ofrendata tukuy sonqo apamurqanku, chaytan Señor Diosqa Moiseswan kamachikurqan ruwanankupaq.
Karpa ruwaqkuna
(Ex 31.1-11)
30Hinan Moisesqa Israel runakunata nirqan:
—Uyariychis, Señor Diosmi Judá ayllumanta akllarqan Hurpa churin Bezaleelta. 31Paytan Diosqa hunt'aykurqan Espiritunwan, yachaywan, yuyaywan, reqsiywan, tukuy ruway atiywan ima. 32Chaymi seq'ekunata kamarinqa qoripipas qolqepipas broncepipas llank'ananpaq, 33hinallataq umiña rumikunata thupaspa ch'olqochinqa, kurkutapas llaqllanqa, ima ruwaypipas llank'allanqataq. 34Bezaleelmanmi Señor Diosqa yachachinanpaqpas atiyta qollarqantaq, hinallataq Dan ayllumanta Ahisamakpa churin Aholiabmanpas. 35Paykunatan yachaywan hunt'aykurqan imaymana ruwayta atinankupaq seq'ekunata kamarinankupaq, llawlli-puka q'aytutapas, sani-puka q'aytutapas, rawraq-puka q'aytutapas, ñañuy-ñañu linotapas pallayniyoqta awanankupaq. Paykunan tukuy imaymanata ruwayta atinqaku, seq'ekunatapas kamariyta atinqaku.
Currently Selected:
ÉXODO 35: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
