ÉXODO 32
32
Qori torillo
(Dt 9.6-29)
1Orqomanta Moisesqa mana usqhayta uraykamuqtinmi runakunaqa Aaronman muyuykuspa nirqan:
—Sayariy, pusawaqniyku dioskunata ruwapuwayku, manan yachaykuchu imaynachus Egipto suyumanta pusamuwaqniyku Moisesqa kapusqanta, nispa.
2Hinan Aaronqa paykunata nirqan:
—Warmiykichispa, churiykichispa, ususiykichispa ninrinpi kaq qori aretekunata horqoychis, hinaspa apamuwaychis, nispa.
3Chaymi ninrinkupi kaq qori aretekunata llapallanku horqokurqanku, hinaspan Aaronman apamurqanku. 4Paytaq chaskirqan, hinaspan qorita unuyachispa moldeman hich'aykurqan, chaymantan qori torillota horqospa thuparqan.
Hinaqtinmi nirqanku:
—¡Israel, kaymi diosniykiqa, Egipto suyumanta pusamuqniyki! nispa. 5Chayta rikuspataq Aaronqa torilloq ñawpaqenpi altarta perqarqan, hinaspan qaparirqan:
—¡Paqarinmi Señor Diospaq fiestata ruwasunchis! nispa. 6Paqarisnintaq tutallamanta sayarispa ruphachina sacrificiokunatapas sumaq kawsay sacrificiokunatapas haywarqanku, hinaspan llaqtaqa mikhuq ukyaq tiyaykurqan, chaymantataq warmiwan qhariwan wachuq huchata ruwarqanku.
7Chaymi Señor Diosqa Moisesta nirqan:
—Uraykuy, Egipto suyumanta pusamusqayki llaqtaykin waqllipun. 8Usqhayllan t'aqakunku kamachisqay purinanku ñanmanta, unuyachisqa qori torillotan ruwakunku, hinaspan yupaychanku, sacrificiokunatapas haywanku, ninkutaq:
—¡Israel! ¡kaymi diosniyki, Egipto suyumanta horqomuqniyki! nispanku. 9Yacharqaniñan kay llaqtaqa rumi sonqopuni kasqanta. 10¡Kunanqa ama hark'awaychu, paykunapaqmi anchatapuni phiñakushani, wañurqarichisaqmi! Qanmantataqmi ancha hatun suyuta paqarichisaq, nispa.
11Hinaqtinmi Moisesqa Señor Diosninmanta tukuy sonqo mañakurqan:
—Señornilláy, ¿imanaqtintaq llaqtaykipaq anchatapuni phiñakunki, Egipto suyumanta hatun atiyniykiwan kallpaykiwan pusamusqaykipaq? 12Egipto runakunachá ninkuman:
Mana allinninkunapaqmi pusasqa, orqo-orqopi wañuchinanpaq, hallp'a pachamanta paykunata chinkachinanpaq, nispa. Amaña k'arakta phiñakuychu, amaña:
Llaqtayta muchuchisaq, niyñachu. 13Yuyarikuy kamachiyki Abrahamta, Isaacta, Israeltawan. Paykunamanmi sutiykipi juraspayki nirqanki:
Ñoqan mirayniykichista hanaq pacha ch'askakunata hina askhayachisaq, mirayniykichismantaq kay llapan qankunaman prometesqay hallp'ata qosaq, hinan chayqa wiñaypaq herencianku kanqa, nispayki, nispa.
14Chaymi Señor Diosqa llaqtanta mana allin ruwananpaq yuyaykusqanta manaña hunt'apurqanchu.
15Moisestaq kutimuspa orqomanta uraykamurqan kamachikuy simiyoq iskay p'alta rumita aparikamuspa, chaykunan iskaynin uyanpi qelqasqa kasharqan. 16Kikin Diosmi chay p'alta rumikunata ruwasqa, Diosllataqmi chaykunapi qelqasqatapas qelqasqa.
17Josuetaq runakunaq qaparisqanta uyarispa Moisesta nirqan:
—Maqanakuy qapariymi karpa-karpapi uyarikun, nispa.
18Moisestaq kutichirqan:
—Manan atipaqkunaq kusikusqanchu, manallataqmi atipasqakunaq waqasqanpaschu, takishasqankutan ñoqaqa uyarishani, nispa.
19Moisesqa karpa-karpaman qayllaykuspan hinan torillota tusuqkunatawan rikuspa k'araktapuni phiñakurqan, hinan chay p'alta rumikunataqa ch'aqerqan, chaymi orqo k'uchupi p'akikurqan. 20Hinaspataq torillota hap'ispa ninaman wikch'uykurqan, chaymantataq ñut'uy-ñut'uta kutarqan, hinaspan unuman hach'iykurqan, chaytataq Israel runakunaman ukyachirqan.
21Hinaspanmi Moisesqa Aaronta nirqan:
—¿Imanarqasunkin kay llaqtata ancha hatuntapuni huchallichinaykipaq? nispa.
22Aarontaq kutichirqan:
—Wiraqocháy, ama phiñakuychu, qanqa yachankipunin kay llaqtaqa mana allinkaqman k'askakuq kasqanta. 23Paykunan niwarqanku:
Pusawaqniyku dioskunata ruwapuwayku, manan yachaykuchu imaynachus Egipto suyumanta pusamuwaqniyku Moisesqa kapusqanta, nispa. 24Ñoqataq paykunaman kutichirqani:
Pipas qoriyoqqa, horqokuchun, nispa. Hinan qowarqanku, chaytataq ninaman wikch'uykurqani, kay torillotaq lloqsimurqan, nispa.
25Moisestaq rikurqan llaqtaq waqllipusqanta, Aaronqa hinallata qhawasqanta, repararqantaq awqankuq asipayananpaq kasqankutapas. 26Chaymi karpa-karpaman haykunapi sayaykuspa waqyakurqan:
—¿Pitaq Señor Diospaq kashan? ¡Ñoqawan huñukuchun! nispa. Hinan Leví ayllu runakuna llapallanku payman huñuykukurqanku. 27Hinaqtinmi Moisesqa paykunata nirqan:
—Israelpa Diosnin Señormi nin:
Sapankaykichis espadaykichista teqniykichisman churaykukuychis, hinaspa karpa-karpata huk haykunamanta huk haykunakama hinantinta puriychis, sapankaykichistaq wawqeykichista, amigoykichista, llaqta-masiykichista wañuchiychis, nispan, nispa.
28Leví ayllu runakunataq Moisespa kamachisqanta hunt'arqanku, hinan chay p'unchay kinsa waranqa hina runakuna wañurqan. 29Hinaqtinmi Moisesqa nirqan:
—Kay p'unchaymi qankunaqa Señor Diosta servinaykichispaq t'aqasqa kapunkichis, sapankaykichismi churiykichista wawqeykichista wañuchirqankichis, chaymi kay p'unchay Señor Diosqa saminchasunkichis, nispa.
30Paqarisnintaq Moisesqa llaqtata nirqan:
—Anchatapunin qankunaqa huchallikurqankichis, kunantaq Señor Diospa kasqanman wichasaq, ichapas kay huchaykichista pampachachiykichisman, nispa. 31Hinaspanmi Moisesqa Señor Diospa kasqanman kutispa, nirqan:
—Arí, kay llaqtaqa anchatapunin huchallikun, qori diostan ruwakusqaku. 32Chaypas, kunan rogakuykin huchankuta pampachaykunaykipaq ... mana chayqa, ¡qelqasqayki qelqaykimanta sutiyta horqopuway! nispa.
33Señor Diostaq Moisesta nirqan:
—Pichus contraypi huchallikunqa, chayllatan ñoqaqa qelqaymanta horqopusaq. 34kunanqa riy, hinaspa maymanchus pusanaykipaq kamachirqayki chayman kay llaqtata pusay, angelniymi pusasunki. Muchuchinay p'unchaypin ichaqa paykunata huchankumanta ñoqa muchuchisaq, nispa.
35Hinaspan Señor Diosqa llaqtata muchuchirqan Aaronpa ruwasqan torillo hawa.
Currently Selected:
ÉXODO 32: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
