ÉXODO 2
2
Moisespa nacesqan
1Leví ayllu runan kikin ayllun warwiwan casarakurqan. 2Warminmi wiksallikuspa qhari wawata wachakurqan. Munayllaña kasqanta qhawaykuspataq mamanqa kinsa killantin pakarqan. 3Manaña astawan pakayta atispataq t'otora canastata t'uruwan breapiwan llut'aspa chayman wawata churaykurqan, hinaspataq mayu pata t'otora-t'otoraman churaykamurqan. 4Wawaq panantaq karumanta qhawasharqan, imachus wawata sucedenanta rikunanpaq.
5Rey Faraonpa ususintaq mayuta bañakuq uraykurqan, kamachin sipaskuna mayu patapi purishanankamataq payqa t'otora-t'otorapi canastata rikuspa huknin kamachin sipasta kacharqan horqomunanpaq. 6Chayta kicharispa qhawaykuqtintaq qhari wawa waqaykushasqa, hinan rey Faraonpa ususinqa khuyapayaykuspa nirqan: —Hebreo runakunaq wawanmi kayqa, nispa.
7Wawaq panantaq rey Faraonpa ususinta nirqan: —¿Waqyampusqaykichu huk Hebreo warmita kay wawata ñuñupunasuykipaq? nispa.
8Rey Faraonpa ususintaq: —Phaway, nirqan. Chaymi sipasqa rispa wawaq mamanta waqyamurqan, 9chay warmitan rey Faraonpa ususinqa nirqan: —Kay wawata apapuway, uywampuway, ñoqataq pagapusqayki, nispa. Warmitaq wawata apaspa uywampurqan.
10Hatunña wawa kaqtintaq, warmiqa rey Faraonpa ususinman apampurqan, paytaq wawachakapurqan, suticharqantaq Moisesta#“Moisés” sutin Hebreo rimaypi ‘horqomuy’ simiman rikch'akun.: Unumantan horqomurqani, nispa.
Egiptomanta Moisespa ayqesqan
11Moisesqa yuyayniyoq runaña kaspanmi wawqenkunaman watukuq rirqan, hinaspan paykunata rikurqan khuyay llank'ashaqta, rikullarqantaq huknin Hebreo wawqenta Egipto runaq maqashasqanta. 12Chaymi tukuyneqta qhawarqarikurqan, mana pitapas rikuspataq Egipto runata wañurqochispa aqoman p'amparqorqan. 13Paqarisninta rispataq iskay Hebreo runakuna maqanakushaqta rikurqan. Chaymi maqaqkaqta nirqan: —¿Imanaqtinmi wawqeykita maqashanki? nispa.
14Paytaq kutichikurqan: —¿Pin qanta churarqasunki kamachiwanaykikupaq anyawanaykikupaqpas? ¿Egipto runata wañuchisqaykita hinachu wañuchiwayta munanki? nispa. Hinaqtinmi Moisesqa manchapakurqan, repararqantaq Egipto runata wañuchisqanqa sut'i yachakusqanta. 15Moisespa Egipto runata wañuchisqanta yachaspanmi, rey Faraonqa payta wañuchiyta yuyaykurqan. Moisestaq ichaqa rey Faraonpa qayllanmanta ayqekapuspa Madián suyupi tiyarqan.
Unu p'uytu qayllapi tiyashaqtintaq, 16Madián suyupi sacerdoteq qanchis ususinkuna unu wisiq hamurqanku uywa ukyanakunaman hunt'achinankupaq, hinaspa taytankuq ovejanta unuchinankupaq. 17Ichaqa michiqkuna hamuspanmi sipaskunata chaymanta qatirirqanku. Chaymi Moisesqa sipaskunamanta sayarikurqan, hinaspanmi ovejakunata unuchirqan.
18Taytanku Reuelman paykuna kutiqtinkutaq, taytaqa paykunata tapurqan: —¿Imanaqtintaq kunanri usqhaylla kutirqamunkichis? nispa. 19Paykunataq nirqanku: —Egipto runan michiqkunamanta hark'akuwanku, unutapas wisipullawankutaq, hinaspa ovejanchiskunata unuchin, nispa.
20Chaymi ususinkunata nirqan: —¿Maypitaq chay runari kashan? ¿Imapaqmi saqemunkichis? Waqyamuychisyá, mikhunata qosunchis, nispa.
21Moisestaq Reuelpapi tiyananpaq uyakurqan, chaymantataq Reuelqa Séfora ususinwan Moisesta casarachirqan. 22Paymi huk qhari wawata wachakurqan, Moisestaq Gersonta#“Gersón” sutin Hebreo rimaypi “karu llaqtayoq” simiman rikch'akun. suticharqan, nirqanmi: Karu llaqtayoqmi kani wak runaq hallp'anpi, nispa.
23Unaymantataq Egipto suyu reyqa wañukapurqan, chaywanpas Israel runakunaqa sinchi llank'achisqaraykun waqasharqanku waqyakusharqanku. Hinan sinchi llank'achisqamanta paykunaq waqyakusqanta Diosqa uyarispa, 24Abrahamwan, Isaacwan, Jacobpiwan rimanakusqanta yuyarirqan. 25Chaymi Diosqa Israel runakunata qhawarispa paykunamanta llakikurqan.
Currently Selected:
ÉXODO 2: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
