ÉXODO 1
1
Egipto suyupi Israel runakunaq muchusqan
1Jacobmi churinkunapiwan sapanka warmintin wawantin Egipto suyuman haykusqaku. Chaykunan kaykuna: 2Rubén, Simeón, Leví, Judá, 3Isakar, Zabulón, Benjamín, 4Dan, Neftalí, Gad, Aserpiwan. 5Jacobpa llapa mirayninmi qanchis chunka runa kasqa. Josetaq Egiptopiña kashasqa.
6-7Josepas wawqenkunapas llapa wiñay-masinkunapas wañukapusqan qhepatan Israel runakunaqa miraspa askhayaspanku sinchita yapakurqanku Egipto suyuman hunt'aykunankukama.
8Qhepamantaq Joseta mana reqsiq huk rey Egipto suyupi kapurqan. Paymi llaqtanta nirqan: 9—Qhawariychis, Israel runakunan ñoqanchismantapas aswan askha kashan, aswan kallpasapataq kashanpas. 10Kunanqa yuyaysapan kasun, ama miraqta hinallatachu qhawasun, paqtan hatun maqanakuy kaqtin awqanchiskunawan huñukuspa ñoqanchis contra maqanakunman, hinaspa kay suyumanta ripunkuman, nispa.
11Chaymi Israel runakunapaq mit'ani oficialkunata churarqanku sinchita llank'achispa muchuchinankupaq. Hinan rey Faraonpaq mikhuy taqena llaqtakunata perqachirqanku, Pitón llaqtata Ramsés llaqtatawan. 12Paykunata astawan muchuchiqtinkuqa astawanraqmi suyuntinpi askhayarqanku. Chaymi Egipto runakunaqa Israel runakunata manchakurqanku, 13hinaspan sinchita ñak'arichispa Israel runakunawan servichikurqanku. 14Sonqo nanayta t'uruchachispa adobechispa, imaymana chakra llank'anata llank'achispa waqapachirqanku, llapan chay llank'anawanmi sinchitapuni mat'irqanku. 15Hinallataq Egipto suyu reyqa hebreo parterakunata Sifrata Fuatawan kamachirqan: 16—Hebreo warmikunata onqochispaykichisqa ima wawachus kasqantan qhawaykunkichis, qhari kaqtinqa wañuchinkichismi, warmi kaqtintaq ama wañuchinkichischu, nispa. 17Parterakunataq ichaqa Diosta manchakuspa, mana Egipto suyu reypa kamachikusqanman hinachu ruwarqanku, aswanmi qhari wawakunata kawsachirqanku. 18Chaymi Egipto suyu reyqa paykunata waqyachimuspa nirqan: —¿Imanaqtintaq qhari wawakunatari kawsachinkichis? nispa.
19Parterakunataq rey Faraonta nirqanku: —Hebreo warmikunaqa manan Egipto warmikuna hinachu, manan sasatachu onqokunku, paykunaman manaraq chayashaqtiykun wachakunkuña, nispa. 20-21Ahinapin Israel runakunaqa aswan-aswanta askhayarqanku. Diosta parterakuna manchakuqtinkutaq, Diosqa paykunata sumaqta qhawarispa wawakunata qorqan.
22Hinan rey Faraonqa llapa llaqtanta kamachirqan: —Llapa Hebreo runakunaq qhari wawan naceqtinqa Nilo mayumankama wikch'uykuychis, llapa warmi wawan naceqtintaq ama wikch'uykuychischu, nispa.
Currently Selected:
ÉXODO 1: QC88
Highlight
Copy
Compare
Share
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.
