Rom 1

Moswɨhlɨ

1Mɛm Pol, syɛl mosa mo Yesʉs-Krɨst ó lé etile bɨn kalara nwa. Zyɛm a jebe me ó, me diʼe lʉmlʉ we, le ecyel me é syɛɛ ó, me toʼ le elɛɛ Mbɨambɨa Lɔɔ we.

2Mbɨambɨa Lɔɔ waa, Zyɛm a si bɛa kɛʼ é zi ogwiha o mɨlɔb ó, nye óntɨh bɨna ga wa. Nkɛʼ waa, nye ó tila é Kalara Zyɛm. 3Mbɨambɨa Lɔɔ waa, wé etiibe ó e Mwan we. É nko paʼ mbyɛla we, nye a be ó mʉr mpoŋbʉr mo David. 4É nko paʼ mo Sisim we ndɨ ti ɨ, nye a si jwɨrɔ ó «Mwan mo Zyɛm» e bwaʼbwaʼ nkul ebe pɛ̀ha foo: Tî ga wina Yesʉs-Krɨst. 5Zyɛm a si lɛʼle me ncwɨncwɨa we le ecyel me é dia lʉmlʉ we ó, dumo e nye é l'efu ó, byʉʉ bɨkul bibyɛh, byé jyɛʼɛ taa buʼo yɔɔ boo nye, le esa nye mojoʼo. Nye a sa me syɛɛla yaa ó, é l'efu le edwe die e Mwan we kum. 6Bɨn nteme, bé ó é bʉr baa, bɨn bʉr o b'a jebɔ, dumo e Yesʉs-Krɨst ɨ.

7Me etile ó, bʉr bɨbɛh ndɨ Rom, baa Zyɛm a bul kpɛl ndwe le epɛh ó, bé diʼe mɨsaŋ mɨ bʉr be e. Mocyɛʼ mo mpom e motala mo Zyɛm Sɔŋ ga wina bé e Da Yesʉs-Krɨst, mé swɨŋɨ é bɨn.

Pol lé egwɨm to bee bʉr o Rom

8Sa efoʼ, me edwe Zyɛm Sɔŋ wam ekiba é zyɛŋa wih boo Yesʉs-Krɨst é lɔb win, ebe, é si nwaʼ nyiwɛh, bʉr bé ejoʼo mɨlɔɔ min, mpʉ bɨn lé ejyɛʼ taa buʼo yin boo Yesʉs-Krɨst ɨ. 9É jɔʼ yiyɛh, me ejwɨʼla e nye é l'efu lɨn. Zyɛm nye mʉr tɨ, nye egʉa ó, me elɛɛ ó ocyecye. Nye waa ó me lé esea syɛɛ ye e leme wam wiwɛh ɛ. Me esea ye ó, é zi elɛɛ Mbɨambɨa Lɔɔ lé etiibe e Mwan we e. 10Me ejwɨʼla e nye é jɔʼ yiyɛh ó, nye dweʼ me jɔʼ eze bee bɨn, lé edu bɨgwɨma bɨ leme we, 11ebe, me ejoʼo dweh ebee bɨn é l'efu le eliʼe bɨn e byʉʉ bɨntɔɔ Mbɨambɨa Sisim lé enol bɨna ga ɛ, ó bɨn nʉŋa pim é buʼo. 12Sa me lé elɛɛ ɛ, yé ó, bɨna beʼ ga, baʼ fuʼo ba, baʼ fuʼo ba, é buʼo. Buʼo bɨn ndɨ e ye boo Krɨst ɨ, le yaa yam, byé ó ngo gba bɨna ga nkul é monyʉl. 13Obɨɔ ga bam aa! Me egwɨm ó, bɨn gʉŋa ó, é bɨjɔʼ é buobuo, me a be ó lé ejwɨʼ ó, me óze bee bɨn. Sa gwar, me a si bul bɔma e mokɔbla. Me óze yɛɛ é l'efu le eze sa syɛɛ-Zyɛm é l'esama lɨn, yé guma nteme mpumo bɨn ye é mpʉ yi gumo mpumo é mɨlal mɨ bʉr o ndɨ abe oYʉden ɨ, ó me nkʉʼ to é mɨngol. 14Empomo e syɛɛ lam, lé ó, me lɛŋɨ Mbɨambɨa Lɔɔ boo bʉr o lwib grɛk bé e bʉr o bɨlwib bɨfih. Me lɛŋɨ we boo ogwɨa be okalara, ndwe e mɨmiʼ. 15Ebe no, me egwɨm ó, me lɛŋɨ nteme we bɨn ye, bɨn bʉr o Rom.

Nkul ndɨ é Mbɨambɨa Lɔɔ ɛ

16Me abe e nkul ejoʼo ba fwon lé elɛɛ Mbɨambɨa Lɔɔ, ebe, wé ó nkul mo Zyɛm é l'efu le etiʼ mʉr nyiwɛh óbuʼla we e, taare é l'oYʉden, to pyal é baa ndɨ abe oYʉden ɨ. 17Mbɨambɨa Lɔɔ waa, wé elɛʼle mpʉ bʉr lé ebi mokebe é mih mo Zyɛm ɨ. Mokebe maa, mé edweŋɔ ó, njɨ ebe taa buʼo mʉr lé ejyɛʼ boo Krɨst ɨ, taare é l'etɔɔrʉ, to pyal é l'efehle. Yé ó mpʉ yé ndɨ tila é Kalara Zyɛm ɨ. Yé ó tila ó: «Mʉr ndɨ e tiʼ molu mo mpoʼ mɨmɛh ɛ, nye ó njɨ waa a bi mokebe é mih mo Zyɛm ebe taa buʼo nye a jyɛʼ boo nye e.»

Mʉr nyiwɛh, nye ó e mɨsyem

18Zyɛm, nyi lɛʼle bɨna ga mpʉ nye lé ekpaa empime é lɔb ga wina ɛ. Nye esa no ó, bʉr é sʉlʉlʉ, duho é jobo kʉ. Bɨna bé esa ga nye ebɨh ndwe e bɨsyɛɛla bɨ ebebe bibyɛh. Bɨna bé elwimla ga e l'ocyecye, du-du njɨ bɨsyɛɛla bɨ ozyɛhozyɛh. 19Sa lé esa ó, mʉr gʉŋa Zyɛm ɨ, yé enyin bʉr bɨbɛh é pono. Bʉr bɨbɛh, bé ebee sa yaa ó, ebe, Zyɛm nye mʉr tɨʼ a si lɛʼle be ya. 20Taare é jɔʼ Zyɛm a cye sa yiyɛh ɛ, njwɨr we ndɨ abeɔ ɛ (no, yé ó nkul we ndɨ njʉmdia e njʉmdia ɛ, ndwe e kwɨmla we ndɨ anwɨɨla e waa mo mɨcyea bɨsɔʼɔ ɛ), wé enyin bʉr é mih é pono, é jɔʼ bɨna lé egʉa dwɛʼ ga le epahle bɨsyɛɛla bye e. No ó, bʉr o ndɨ esa Zyɛm mongan ɨ, bé aka be e nkar é mih me. 21Dam be ó, bé a be ó si kʉ gʉa ó, Zyɛm, nye ó tɨ, bé a baadwiibɨ nye mpʉ yé a jala ɛ, nkʉ dwe nye ekiba é lɔb bɨsyɛɛla bye. Bé a kʉ ka pahle sɔʼɔ ó njɨ bɨsa byaa ndɨ abe e nyɔm ɨ. Bé ze lihba ó, mɨmiʼ. 22Bé dam doʼo e l'ocyoo wɔɔ, bé eka to fuʼla ó bɨgʉ. 23Laa ó, bé dwiibɨ Zyɛm, waa ndɨ abe e nkul edwè e, bé a fuo mɛʼle yɛɛ ó, bé dwiibɨ njɨ bɨbaŋabaŋa bɨdweʼle ndɨ mɨkpɛʼa ɛ. Bé a kpaʼ bɨsa byaa ó, lé edweʼle bʉr o ndɨ edwè-dwè e, bé e bɨnɔn, otir o mopɔrʉ, otir o motɔrʉ, nkʉ onyʉa.

24Ebe no ó Zyɛm a fuo ka bir ó, bé loŋla bɨgwɨma bɨ nyʉl bɨpuno wɔɔ, ndwe le elama fwon lé edu njɨ bɨjyɛʼ byɔɔ. Tina, yé ó, bé a dɨ sɛɛla bɨsa bɨ fwon byaa paʼra wɔɔ! 25Bé a si bene lé ebuʼla ocyecye mo Zyɛm, ka kpɛl dwiibɨ njɨ ozyɛm o mpʉl. Laa ó, bé dweʼ Zyɛm Kwihbʉr kum, bé a kʉ ka mɛʼle ó njɨ bé dwiibɨ bɨsa nyɛɛ a cye e. Kum diʼe e Zyɛm waa, njʉmdia e njʉmdia. Amɛn!

26Ebe no ó Zyɛm a fuo ka bir ó, bé saʼ bɨsyɛɛla lé eloŋlo bɨgwɨma bɨ nyʉl bɨpuno wɔɔ ɛ, lé esa ó, bé lama fwon. Bʉba bɛɛ lé ebene lé esyɛŋa e bʉrʉm é bɨduo, mpʉ Zyɛm a cye be ó, bé diʼe sa ɛ. Laa ó, bé saʼ mpaŋ syɛɛla yaa, bé a kʉ ka gba monyʉl mɔɔ ó njɨ lé ekœbla paʼra wɔɔ. 27Bʉrʉm, bé esa nteme no, jwɨʼ gwar yaa. Bé ebene lé eka syɛŋa duo e bʉba mpʉ bé a cyeŋɔ ó, bé dɨʼe sa ɛ. Laa ó, bé saʼ no, bé a kʉ ka joʼo dweh ó njɨ bé syɛŋa duo e bʉʉ bʉrʉm! Bʉrʉm e bʉrʉm, bé elama fwon lé ebana tɛbla paʼra wɔɔ. Bé edaʼre bɨntɨʼa é monyʉl mɔɔ. Bɨntɨʼa byaa, byé ó ndɨ myɛna bé lé ebi ɨ, duho é syem bé lé esa ɛ. 28Bʉr baa, bé a baabee ó, yé ejala ó, bé gʉŋa Zyɛm. No ó Zyɛm a fuo ka bir be ó, pɨʼ wɔɔ beʼ ntul ɨ. Nye ebir be ó, bé saʼ bɨsa bɨ fwon byaa ndɨ ajala ɛ. 29Bé efwahle bɨsyɛɛla bibyɛh ndɨ ozyɛhozyɛh ɛ. Byé ó: jeele e laŋ, bɨgwɨma, bɨn, zii, ejwɨɨ e bʉr. Bé esa mpɔʼa monkɔm, bé e bɨkʉʉŋʉ e tíila ndwe e bɨbuʼa, 30ka kɛl movoʼ. Bé nteme, bé ebene Zyɛm, le epyeh bʉr. Bé e nkɛa nyʉl, ndwe e jaale. Bé ekʉ ka saa ó njɨ mopɨʼ mo ekuhlo mʉʉ mobebe mofih. Bé ajoʼo obyɛl bɔɔ. 31Bé ó mɨmiʼ. Bé adira monkɛʼ mɔɔ. Bé e cere é mɨleme. Bé abe e njwɨʼa-nkoo. 32Dam be ó, bʉr baa, bé egʉa ó, Zyɛm a lɛɛ ó, bʉr bɨbɛh ndɨ esa mɨmbi mɨ ebebe myaa ɛ, bé edaʼre ó efie é monyʉl mɔɔ, bɛɛ, bé ó njɨ lé eto dolo lé esa-sa bɨsyɛɛla byaa. Yé abe njɨ no, yé ome. É jɔʼ bé lé ebee bʉʉ bʉr lé esa syem ɨ, bé ekʉ mɛʼle bɨsyɛɛla byɔɔ le esoʼlo be ó, bé toʼ dolo lé esa bye, to-to ó toʼ.

Currently Selected:

Rom 1: ozmBad

Highlight

Copy

Compare