Mɨlʉmlʉ 28

Pol é dine Malta

1É jɔʼ bɨbɛh, bé a kumo tin, sɔʼɔ l'asa bɨh ɨ, bɨh ze jwɨʼ ó, dine laa, lé a be die ó, Malta. 2Bʉr o dine laa, bé a si bul jwɨʼ bɨh nkoo. É mpʉ mpie a be lé enwɨɨ, ejyoo, lé osi mɛr be e, bé a si tira duro, ntɔʼ jebe bɨh ó, bɨh dwabla siʼe. 3Pol ntɔʼ tœʼ ebeʼe e bɨnkpɨnkpa, ntɔʼ guho le é duro lɔɔ. To kœb ó, gurokɔɔ, yé a be ó tɨʼ tʉŋlʉ! Yé ntɔʼ ze duho é bɨnkpɨnkpa byaa lé ekpɛɛ modiʼa mo siʼe, yé ntɔʼ lʉ nye é mbo, nara. 4É jɔʼ bʉr o dine laa, bé a bee nye e gurokɔɔ é mbo é cyèl-ɨ-cyèl ɨ, bé ó: «Mʉr nwa, nye ó bana kʉ be njʉl bʉr cyecye. Dam be ó, nye be ó si pamla efie é maŋ, zyɛm ga wina, Ocɨcyel, nye amɛʼle ó, nye tiʼa.»

5Pol nyɛɛ a kʉ ka syɛʼre ó njɨ mbo, syɛʼre syɛʼra, nyʉa ntɔʼ kur é l'ebeʼe e siʼe. Nye nteme, ajoʼo ba mokpaa. 6Bʉr, bé a buʼla ó, mbo mo Pol lwɨɨ nyʉa ɛ, wé ónkaŋle, nkʉ ntɔʼ ó, nye ódwè, ajaa to. No é jɔʼ bé a be, bé mu si bul bono efie le, é bono bono, abee yʉʉ sa ebebe lé epyal nye e, bé ntɔʼ siila twii wɔɔ. Bé ó, nye a be ó guu mbi zyɛm.

7Tɨʼ é dine laa, yé a be ó e njwɨ̂ʼ mʉr wé a be e bii ye e, die le Publɨɔs. Nye a be ó si bɨlan e bɨh, bɨh ze ja é mbɛr we tɔɔ molu molɛl. 8To kœb ó, sɔŋ mo Publɨɔs a be ó njaʼa si é duo lé ejoʼo ejyoo, nyɛɛ lé esyɛb nkumlo motié. Pol ze to dwɛʼ nye, ze jwɨʼla e Zyɛm, ntɔʼ kɛl nye mbo é nyʉl, nye ntɔʼ tiʼ nye. 9É jɔʼ bé a bee syɛɛla yaa ɛ, bʉr o b'a syɛb é dine laa ɛ, bé ze fwalɔ, Pol ze tiʼ be. 10Bé a si dwaabe bɨh é buobuo. É jɔʼ bɨh bé a be lé ebâʼle to kable é titima, ó bɨh tɨʼe cyen, to e, bé ze sa bɨh monkɔʼ é l'efu e cyen yih.

Pol lé ekumo Rom

11Pie e l'ongɔn olɛl, bɨh ze kable é titima, tɨ cyen, ntɔʼ to zi lé eto nko paʼ Rom ɨ. Akum titima nyɛɛ a be ó mʉr nkana Alɛksandri. É ndʉa titima, bé a be ó si kpaʼ bɨdweʼle bɨ ozyɛm oba, mogbah. Titima yaa, yé a be tiila é l'ebʉm laa ó, é mya epʉla le ejyoo. 12Bɨh ze pyal ɨ Sʉrakus. Bɨh ze lɛŋ molu molɛl tɨ. 13Lé enkɛɛ tɨ, bɨh ze kpah pɨn e pɨn, to pyal ɨ Regio. Jaŋɔ si. É dwine mɛn, pubo ndɨ eduho paʼ tie e, wé ze taare lé ekuulo. É mɛn tɨ, bɨh ze pyal ɨ Potwolɔs. 14Bɨh bé a si kœb obɨɔ ga bɨna é nkana yaa. Bé ze lɛɛ e bɨh ó, bɨh jaʼ tɨ. Bɨh e boo nɔɔ ntɔʼ di tɨʼ tɔɔ sono ntinɨ. É mbi waa ó bɨh bé a pyal é nkɔra Rom ɨ. 15Obɨɔ bɨna o Rom, bé a si joʼo mɨlɔɔ é lɔb epyal lɨh. No ó bé a ze é mpɔma wih, lé esoho bɨh. Bʉʉ, bɨ ze é ze ze, ze cyɛb é l'ebɨm e Mompɛma Apius, lé ebono. Bʉʉ, bé a to bonɔ ó, kwar bé lé ejebe ó, Bɨsaʼ-monyʉla-bɨlɛl ɨ. É jɔʼ Pol a bee bʉr onɨ ɨ, nye ntɔʼ dwe Zyɛm ekiba, ntɔʼ tʉm nyʉl. 16É jɔʼ bɨh bé a ka kumo nkana Rom ɨ, bʉr o jwɨɨ, bé ntɔʼ mɛʼle ó, Pol diʼe ye gumo nye ome, bé e zima yé a be lé ebaʼle nye e.

Pol lé elɛɛ Mbɨambɨa Lɔɔ ɨ Rom

17Molu molɛl, mé osi laa nɛʼɛ, Pol ntɔʼ baŋle ojwɨɨ be oYʉden bé a di ɨ Rom ɨ, bé ntaʼ, ze gwɨhla é mbɛr we. É jɔʼ bé a fwal ɨ, nye e be ó: «Obɨɔ ga bam aa! Me apa sa syɛɛla gwar ó, me lwimla e lal ga wina, nkʉ pyeh mɨnjwɨr bɨmpam ga bina byé a liʼe e. Dam be no, bé a si naʼ me mobo é nyʉl ɨ Yerʉsalɛm, ze ntɨhɔ me kaʼ Rom. 18É jɔʼ bé a dî me nkar le etimle lɔb wam ɨ, bé a lɛɛ ó, bé bir ó me, ebe, bé a baakœb me e sa ebebe me a pa kʉ sa ó, me dweŋɔ mobe mo jala e l'efie e. 19OYʉden bɛɛ, bé a be ó lé etɨ mɨlɛa myɔɔ. Me a be ó abe e mbi fih, njɨ ó, me cenɨ lɔb wam boo Kɛɛza. Me abe e sa me pur kul yam e ye. 20Ebe no ó me a be lé ekpɛl bee bɨn, le elwib e bɨn ɨ. Me mu é nkara ó, ebe mbɛla bɨna ga e boo bwa b'Ɨzraɛl ndɨ e tɨʼ é mɨleme e.» 21Bé ze bɨha e nye ó: «Nkʉ obɨɔ ga bɨna ndɨ é lal Yʉda ɛ, bɨ tile yʉʉ sɔʼɔ é lʉ go e, bɨh bé apa bi ye. No nteme, bɨh bé a baabee mɨɔ ga wina ngwar a duho gʉʼ lé eze lɛɛ bɨh yʉʉ sa ebebe é lʉ go. 22No ó, bɨh bé ekpɛl joʼo mpʉ go lé epahle mɨlɔb myaa ɛ, ebe, é nko paʼ wih, sa bɨh bɛɛ ndɨ egʉa ɛ, yé ó, é bɨgumo bibyɛh, bé etɨ-tɨ mɨlɛa mɨ tɨ.»

23Bé ze cyel moho, bé e boo nɔɔ, bé a be ó, bé óbɔma ɛ. É jɔʼ moho waa, wé a pyal ɨ, bé ntɔʼ ze e bʉr é buobuo, ze kœb nye é gumo nye a di-di ɨ. Taare é mɛn, to pyal é bii kʉʼ, Pol a be ó lé epɛʼle be lɔɔ Zyɛm, le eboʼlo, tiibe e jwɨ̀ʼa mo Zyɛm, ndwe le esaa ó, nye dulo ó be, ó bé buʼla sikʉlʉ nye a dwe lé etiibe e Yesʉs ɨ. Nye a kœb-kœb sikʉlʉ nɨ ó, é motie mo Moyiz ndwe e sikʉlʉ ogwiha o mɨlɔb, bé a dwe e. 24Baʼ bʉr, bé a be ó si twe twii e nye ebe sa nye a lɛɛ-lɛɛ be e; bʉʉ bɛɛ abuʼla. 25Bé ze bɔʼa motwii, ntɔʼ pyalɔ kʉl, ebe, Pol a be ó si lɛɛ e be ó: «Mbɨambɨa Sisim a kʉ lwib ó e l'ocyecye é jɔʼ nye a cwɨɨ é zi ngwiha mɨlɔb Ezayi, lé elɛɛ ó:

26“Zyɛm lé elɛɛ ó nɛɛ:

‘Toʼ nko bʉr baʼ ndɨ ɨ. Go à lɛɛ e be ó nɛɛ:

Bɨn bé ógʉa joʼlo; sa gwar, bɨn bé aŋa bi ba pɨʼ.

Syɛmɨ ga mih! Bɨn bé aŋa gʉa sɔʼɔ, duho tɨ.

27Bʉr o kul yi, bɨ lɨl mɨleme.

Mogwal mɔɔ, mé agʉa joʼo sɔʼɔ. Bɨ dible mih mɔɔ.

Nkʉ bé a be ó be, bee e mih mɔɔ é sʉlʉlʉ

ndwe le ejoʼo e mogwal mɔɔ é saŋ-saŋ,

mpa bɨ gʉa é kpɛhla é jɔʼ yaa.

Nkʉ bé a be ó be, gʉa ocyecye nɛʼɛ,

mpa bɨ dwibra, ntɔʼ ze boo me.

Mpa bɨ sa nteme ó, me dweʼ be tiʼ molu mo mpoʼ mɨmɛh.’”»

28Pol ze ko tɨʼ ó: «Gʉŋa ga ó nɛɛ: mpaŋla nwa, waa ndɨ elɛɛ mpʉ Zyɛm mu lé edwe bʉr tiʼ molu mo mpoʼ mɨmɛh ɛ, nye mu ó lé ecenɔ bʉr o ndɨ abe oYʉden ɨ! Bɛɛ, bé ókʉ joʼo we!#28.28 Dwɛʼa nteme 1 Timote 3.16 «Bʉr o bɨkul bɨfih, bé a si joʼo lɔɔ lé etiibe e nye e.»» [29#28.29 Myʉʉ mɨnjʉ̌m mɨtila mɨ lwib grɛk myɛɛ, myé elɛɛ ó: «Jɔʼ nye a sil lwib é mbi waa ɛ, oYʉden baa ze fiʼɔ, ntɔʼ taarɔ lé epɨra mokan paʼra wɔɔ.»] 30No ó Pol a ze di mɨmbu mɨmba tɨʼ é mbɛr nye mʉr tɨʼ a jɛna-jɛna ɛ. Nye a nʉa-nʉa ó bʉr bɨbɛh, bé a ze bee-bee nye e. 31Nye a be nteme lé elɛɛ-lɛɛ Mbɨambɨa Lɔɔ é lɔb jwɨ̀ʼa mo Zyɛm, le eyeʼle bʉr mɨlɔb lé etiibe e Da Yesʉs-Krɨst ɨ, é kpɛŋlɛm, abaawe sɔʼɔ e mʉr, abe e ntɨʼa.

Currently Selected:

Mɨlʉmlʉ 28: ozmBad

Highlight

Copy

Compare