Mɨlʉmlʉ 19

Pol é Efɛɛz

1É jɔʼ Apolos a be, nye mu Korɛnt ɨ, Pol a si liʼe Antios, ntɔʼ to mɨmpaʼa e mɨmpaʼa lé ecwɨɨ mɨlal é buobuo, to pyal Efɛɛz. Nye ze kœb bʉʉ ompʉn gʉ. 2Nye ze dî e be ó: «Zê bɨn bé a si bi Mbɨambɨa Sisim é jɔʼ bɨn bé a jyɛʼ taa buʼo yin boo Zyɛm ɨ?» Bé ntɔʼ bɨha e nye ó: «Bɨh l'apa joʼo bé le elɛɛ ó, yʉʉ sɔʼɔ, yé ó “Mbɨambɨa Sisim”.» 3No ó Pol a dî e be ó: «Yé be no nɛʼɛ, bɨn bé a pa kʉ nʉa wáa mbi ndubo?» Bé ntɔʼ bɨha e nye ó: «Bɨh bé a nʉa ó ndubo mo Yʉanes.» 4Pol ze lɛɛ e be ó: «Yʉanes a dù-dù ó, baa b'a gwɨma mobebe mɔɔ, le edwir mɨleme e. Nye a lɛɛ-lɛɛ e bwa b'Ɨzraɛl ó, bé jyɛʼɛ taa buʼo yɔɔ boo mʉr lé edu nye é koo pihe e. No, yé ó Yesʉs.»

5Jɔʼ bé a sil joʼo mokan maa ɛ, bé ze nʉa ndubo é die mo Da Yesʉs. 6É jɔʼ Pol a kɛl be mobo e, Mbɨambɨa Sisim ntɔʼ ni be é monyʉl, bé ntɔʼ taare lé elwib bɨlwib bɨfih, le egwih mɨfela mɨlɔb mo Zyɛm. 7Bʉr baa bɨbɛh, bé a be ó kwoʼ be ewʉm e l'oba.

8Pol ze to-to é mpah mɨnjwɨʼla oYʉden, tɔɔ ongɔn olɛl. Nye a yeʼle be mɨlɔb mo Zyɛm ó, é kpɛŋlɛm, abe e bʉa, é lɔb jwɨ̀ʼa mo Zyɛm, ndwe le esaa edulo bʉr o b'a joʼlo nye e. 9Sa gwar, mpʉ bʉʉ bʉr bɛɛ, bé a sa elele e mɨlʉ, saŋɔ lɔɔ Zyɛm ebɨh, le elwɨɔ baa ndɨ edu Zi Tiʼ ɨ, Pol ze duho é sama yɔɔ, ntɔʼ nʉa ompʉn, to e be é mpah sikʉlʉ mo Tiranos. Tɨʼ ó bé e boo nɔɔ, bé a sa bɨlɛba dobo lɨlɛh ɛ. 10Pol a sa no ó, tɔɔ mɨmbu mɨmba, to pyal é jɔʼ bʉr bɨbɛh bé a be lal Azia ɛ, oYʉden ndwe e bɨkul bɨfih, bé a sil joʼo mɨlɔb mo Da ɛ.

Bwan mo Skeva

11No ó, Zyɛm a sa-sa bɨbwaʼbwaʼ mosima ó, é zi mo Pol. 12No nteme, osana o mɨkan ndwe e bɨpeh mɨkan Pol a kuna e bye e, bʉr bé a dɨ ó nʉa bye, ze taare lé ekɛl mɨsyoblʉ bya é monyʉl, myé ntɔʼ tiʼe! Bɨbɨbla mɨsisim nteme bana duho be é monyʉl!

13No ó, bʉʉ oYʉden, bé a be ó lé eto-to mokwar e mokwar mɛh, lé eto le edwih bʉr bɨbɨbla mɨsisim. Bé a jwɨʼla sa nteme ó no, é die mo Da Yesʉs. Bé a lɛɛ-lɛɛ e bɨbɨbla mɨsisim ó: «Me lɛɛ e bɨn é die mo Yesʉs, waa Pol lé etuno lɔɔ we ó, duha nye é nyʉl!» 14Bʉʉ bʉr o b'a sa-sa no e, bé a be ó esama e bʉr tambɛl, bwan mo nuu Yʉden a be njwɨɨ opara ɛ. Die le, lé a be ó Skeva. Ngbaa le eka be, é guu moho, é jɔʼ bé a be lé esa syɛɛla yaa nɛʼɛ, 15yʉʉ bɨbla sisim, yé ntɔʼ bɨha e be ó: «Me egʉa Yesʉs. Mɨ gʉa nteme yʉʉ sɔʼɔ é lʉ mo Pol. A bɨn bɛɛ, bé ó ozé?» 16Mʉr a be e bɨbla sisim ɨ, ntɔʼ nkaŋa be é monyʉl, ntaa be é nkul. Bé ntɔʼ buma mɨkam, pyalɔ kʉl, duhɔ é mbɛr we fufwah e monyʉl é gʉra-gʉra.

17Bʉr o Efɛɛz bɨbɛh, oYʉden le bʉr o bɨkul bɨfih, ze joʼo syɛɛla yaa, bɨbɛh ntɔʼ bil ekɛn. No ó die mo Da Yesʉs, lé a ze bul gumo e. 18Buobuo bʉr o b'a jyɛʼ taa buʼo yɔɔ boo nye e, bé a be ó si gwih mobebe mɔɔ. 19Buobuo bʉr o b'a taare sa mɨmir mɨ eleme e, bé ntɔʼ ze-ze e mɨmbom mɨ okalara o madiʼ bɔɔ, ze diʼɔ be é nkɛŋlɛm, bʉr bɨbɛh lé ebee. No ó bé a ze sa motɔɔ mo mɔn okalara baa, ntɔʼ bee ó, bɨmɔn bé a dimle lé ebwam be e, byé a be ó tɔɔ mɨsaŋ mɨ odenie otɔɔyin mowʉm motɛn (50 000)! 20Bʉr ntɔʼ to dolo lé elɛɛ lɔɔ Zyɛm. Lɔɔ we ze myɛma e buobuo nkul.

Demetrios lé esoʼlo bʉr é lɔb Artemis

21Pie tɨ, Pol ze tiʼe é leme we ó#19.21 Yé e nkul edwirɔ nteme ó: «Sisim mo Zyɛm ze cyɛb Pol é leme, ze tine nye ó, nye toʼ Masedwan, é lal Akayi.», nye to ó, to ntaa Masedwan, le Akayi. Nye òka to Yerʉsalɛm. Nye a lɛɛ-lɛɛ ó: «É jɔʼ me óbe si pyal gʉʼ ɨ, me ejala le ebâʼle tɨ cyen, to pyal nteme nkana Rom.» 22No ó nye a lomo bʉr be, oba, bé a sea-sea e nye é lal Masedwan ɨ, Timote bé e Erast. Nye mʉr tɨʼ a be ó si liʼ é lal Azia bwa molu.

23É molu maa, bɨntʉ, byé a be ó si bul syɛɛ é lɔb bʉr o ndɨ edu Zi Tiʼ ɨ. 24Nuu lul molul a be die ó, Demetrios. Bé e myʉʉ mɨcɨcyoo bɨ bʉr, bé a be ó lé ekpaʼ-kpaʼ bwa bɨdweʼle e nkoho mɔn, bɨdweʼle byaa lé enwɨɨla ba e mbɛr mɨndwɛa mo zyɛm Artemis. Mɨcɨcyoo myaa, myé a be ó si bul bwaʼ e l'efu e syɛɛ yɔɔ nɨ. 25Demetrios a be ó si baŋle mɨcɨcyoo myaa, syɛŋ be gumo gwar, bé e bʉr o b'a biʼ e be e. Nye e be ó: «Jyɛɛ ga yam, bɨn bé egʉa ó, bɨna bé etiʼe ga ó e l'efu e syɛɛ yi. 26Bɨn bé ejoʼo le ebee mpʉ mʉr nɨ Pol lé elwib ɨ. Nyi sil nyiŋ montumo mo bʉr é buobuo lé elɛɛ ó, bɨbaŋabaŋa bɨdweʼle ndɨ mɨkpɛʼa ɛ, byé abe ozyɛm. Nye esa no wâʼ Efɛɛz. Sa gwar, nyi sa nteme ó, é lal Azia wiwɛh! 27Bɨna mu ga ó, é nkpah ebebe. ǃNye si to dolo lé esa no nɛʼɛ, yé e nkul esamle efu e syɛɛ ga lɨna. Abe njɨ no yé ome. Nye e nkul esa ó, Mbɛr mɨndwɛa mo Artemis, bwaʼbwaʼ zyɛm mʉma ga wina#19.27 Artemis a be ó die e baŋabaŋa dweʼle ndɨ kpɛʼa ɛ. Bʉr o Efɛɛz, bé a be ó si jyɛʼ taa buʼo yɔɔ boo nye. Bé a dweʼle nye ó, yé nkʉʼ nyin ó, nye ó mʉma. Bé a si seʼle nye, lé elɛɔ ó, nye ó lé esa ó, bʉba nʉŋa ebum, ntɔʼ bya bwan. Nye a jebɔ nteme ó, Diane., wé liʼɨ é dwɛhba é mbea wɔɔ! To kœb ó, bʉr o lal Azia bɨbɛh ndwe bʉr o si nwaʼ nyiwɛh, bé ekʉ jala le edwiibɨ zyɛm ga wina Artemis wâ. Bé amu ka birɔ nye, aka láa ó, nye e modile.»

28É jɔʼ ntuntuma bʉr, yé a joʼo no e, yé ze bul kpaa mompime le ebɨnɔ motwii kʉ. Bé a ze lɛɛ okʉkʉ ó: «Artemis, zyɛm bʉr o Efɛɛz, nye é bwaʼ ɔɔ!» 29No ó, nkana yiyɛh, yé a be ó, kʉ be é leŋe-leŋe. Bʉr ze mɛrɔ Gaywis bé e Aristarkus, to le edulo be si e si, to e be é l'ebɨm e bɨjʉʉ. Bʉr baa, bé a be ó bʉr o Masedwan. Bé a be ó bʉr o sama cyen mo Pol, bʉr o bé e boo nɔɔ, bé a dɨ kœʼ œ. 30Pol a tiʼe é leme we ó, nye to ó cyɛb é l'efoʼ e sama. Sa gwar, ompʉn, bé a si kamle nye lé esa no. 31Bʉʉ ongoman o lal Azia, baa bé a be ofo be e, ze lomlo nye mpaŋla, lé ejwɨʼla e nye ó, nye l'aka to gʉ, é l'ebɨm e bɨjʉʉ, ntʉ yaa dina lé esyɛɛlɨ.

32É jɔʼ yaa, bʉr, bé a baagʉa sa tuʼ, yé a be lé elaa ɛ. Bé a be ó, baʼ bʉ bɨtim é wiʼ lɔb; bʉʉ bʉ bɨtim é guu lɔb fih. No ó, buobuo bʉr é sama yɔɔ, bé a baagʉa sa tuʼ bé a pa kʉ fwal e tɨʼ ɨ. 33Baʼ oYʉden, bé a si tine Alɛksandros ó, nye cyɛba be efoʼ, bé osi tɨe nye mpʉ nye lwibɨ ɨ. Nye ntɔʼ peble be mobo, lé engbaa sa ó, ntuntuma bʉr tiʼa lwib, diŋa ó, nye òkomo nkar si é jɔʼ yaa. 34É jɔʼ bé a gʉa ó, nye ó Yʉden ɨ, bɨbɛh, bé a si taare ebʉ bɨtim kʉ kʉ. Bé ó: «Artemis, zyɛm bʉr o Efɛɛz, nye é bwaʼ ɔɔ!»

Mowala, mé osi laa kwoʼ be moba nɛʼɛ, 35ngoman nkana ze leʼe egolo. Nye ó: «Bɨn bʉr o Efɛɛz ee! Mʉr, nye ajeʼe ó, bɨna ga ó ndɨ e mbɛr lé ebaʼle dweʼle mo Artemis, bwaʼbwaʼ zyɛm wina ɛ. Dweʼle ye, yé ó b'a duho é jobo kʉ, duma si wâ. Yé ó tɨʼ é mbɛr waa tʉŋlʉ lé ebaʼlɔ. 36Yé abe e mʉr ndɨ e nkul esoŋlo ye. Mɨleme min, myé ejala le edi é myeeŋ. Asa ga bɨsyɛɛla bɨgʉ! 37Bɨn ze e bʉr baʼ kaʼ ó, bé a baadíbe bɨsɔʼɔ é mbɛr mɨndwɛa ga wina, nkʉ sa pyeh é nko paʼ mo zyɛm ga wina. 38Yé be ó, Demetrios bé e mɨcɨcyoo bɨ bʉr bɨ esama le, bé e pura e nuu mʉr nɛʼɛ, bɨna ga bé wâʼ ó e l'otiʼà o mɨlɔb ndwe e l'ongoman. Bɨbɛh kara é mih mɔɔ bɨpura bé ókpɛl lé epuura ɛ! 39ǃBɨn si gwɨm dî tia fih nɛʼɛ, bé óka sil lé etimle mɨlɔb mɨ tɨʼ ó, jɔʼ ngoman óbâʼle syɛŋ bɨna ga é mih me e, 40ebe, bɨna ga mu ó, é nkpah ebebe. Mpa bɨ pur bɨna ga é lɔb ekpɛl lé esa-sa bɨntʉ. Bɨna bé a baangbaa lɛɛ ga be sa tuʼ ndɨ esyɛŋ bɨna ga muh ɨ.» Jɔʼ nye a sil lwib no e, nye ze bir bʉr ó, bé fiʼi.

Currently Selected:

Mɨlʉmlʉ 19: ozmBad

Highlight

Copy

Compare