Mɨlʉmlʉ 18

Pol lé eto nkana Korɛnt

1Jɔʼ ze laa ba, Pol ze mʉa ɨ Atɛn, to Korɛnt. 2Nye ze bɔma e Yʉden, die le Akilas. Nye a byɛl ó, é lal Pɔŋtos. Nye a bɛa be ó Italia, ntɔʼ duho gʉ, ze Atɛn, bé e myɛl Priska, ebe, Kɛɛza Klodiʉs a cyel oYʉden mpene ó, mʉr aka di ɨ nkana Rom. No ó, Pol a ze baʼra mobo e be 3lé ekomlo bɨsaʼ mɨkan. Mpʉ Pol bé e boo nɔɔ, bé a bɛa be e l'efu e syɛɛ egwar laa ɛ, nye ze di nteme é mbɛr wɔɔ, bé e boo nɔɔ lé esea gumo gwar. 4No ó, é moho saba wiwɛh, Pol a be ó lé eyeʼle bʉr mɨlɔb mo Zyɛm é mpah mɨnjwɨʼla, le esaa edulo oYʉden ndwe e bʉr o Grɛs.

5É jɔʼ Silas bé e Timote, bé a duho Masedwan ɨ, Pol ntɔʼ lɛŋ jɔʼ ye yiyɛh njɨ lé elɛɛ bʉr lɔɔ Zyɛm, le eboʼlo é mih mo oYʉden ó, Lœma mulo mo Zyɛm ó ndɨ Yesʉs. 6OYʉden, bé a be ó lé epɨra mokan e nye, le elwɨɔ nye. Nye ze kuro pim é mɨkan mye. Nye ó: «ǃƗ nuu mʉr é nko paʼ win si dim cyecye nɛʼɛ, bɨn bʉr o tɨʼ ó ngo bɨha é lɔb waa; mɛm, me ó mʉr ndɨ agʉa lɔb ɨ. Taare é banana, me muno ze to boo bʉr o ndɨ abe oYʉden ɨ!»

7No ó nye a duho é gumo yaa, ze to mbɛr mo nuu mʉr, die le Titwios Yʉstʉs, mʉr a bɛa ni é buʼo oYʉden ɨ. Mbɛr we, wé a be ó kunokuno e mpah mɨnjwɨʼla oYʉden. 8No ó, Krispʉs, njwɨɨ mpah mɨnjwɨʼla oYʉden, a ze jyɛʼ taa buʼo ye boo Da Yesʉs, bé e mbɛr bʉr we wiwɛh. Buobuo bʉr o Korɛnt, bé a joʼo-joʼo Pol ɨ, bé a si buʼla nteme, le enʉa ndubo.

9É guu pum nɛʼɛ, Da Yesʉs ze lwib e Pol é lima, lé elɛɛ e nye ó: «Ajoʼo bʉa. Toʼ dolo lé elwib. Adi titil. 10Ebe, bɨna e go ó ndɨ. Abe e mʉr ndɨ e nkul emɛr go, nkʉ waa ngbaa sa go sa cere. Mɛm, me e bʉr é buobuo é nkana nɨ.» 11Pol ntɔʼ di ɨ Korɛnt mbu ntinɨ e peh, lé eyeʼle bʉr lɔɔ Zyɛm.

12Sa gwar, é jɔʼ Galiɔŋ a be, nye dina ngoman é lal Akayi ɨ, oYʉden, bé a be ó si syɛŋa lé elwimla e Pol. Bé a si to nteme e nye é mpah mɨlɔb. 13Bé ó: «Mʉr nwa, nye esa ó, bʉr gwaʼa lé edwiibɨ Zyɛm mpʉ motie mɨh ndɨ elɛɛ ɛ.» 14To kœb ó, é jɔʼ Pol a be ó, nye nʉa ó lwib ɨ, Galiɔŋ nyɛɛ ó b'a bɨha e l'oYʉden, lé elɛɛ ó: «OYʉden! Nkʉ yé be ó be, be lɔb lé edwɛʼ bɨsyɛɛla bɨ ebebe nkʉ mobe mo jala e l'efie nɛʼɛ, mpa mɨ kʉ nʉa jɔʼ lé ejoʼlo bɨn. 15Mpʉ yé mu lɔb mogo, ndwe e mie, ndwe e motie mɨn ɨ, yé edwɛʼ ó, bɨn bʉr o tɨ, ebe, me abe e nkul etiʼe mɨlɔb ndɨ no e.» 16No ó nye a ze fo oYʉden é mpah mɨlɔb we. 17Ntuntuma bʉr#18.17 Bʉr baa, bé a baabe oYʉden, pɛʼ njɨ Sostɛn, mʉr bé a bî ɨ. yiyɛh, yé ntɔʼ mɛr njwɨɨ mpah mɨnjwɨʼla oYʉden, die le Sostɛn, bîŋɔ nye gumo Galiɔŋ a be é dia tiʼà mɨlɔb ɨ. Sa yaa yiyɛh, yé a baalɛɛ nye sɔʼɔ.

Pol lé ebâʼle to Antios

18Pol a si di tɨʼ ɨ Korɛnt ba é bɛabɛa. Nye ze jɛna e l'obɨɔ bɨna, bé e boo Priska, ndwe e Akilas ntɔʼ kablɔ é titima yé a be lé eto nko paʼ Siria ɛ. Nye l'apa to, nye a si cwɨa lʉ é Kɛŋkrɛyas. Nye a cwɨa lʉ we ó, ebe, nye a be ó si bɛa de mɨnkɛla é nko paʼ mo Zyɛm. 19To kœb ó, titima yaa, yé a taare cyɛb ó, nkana Efɛɛz. Pol bé e sama cyen ye ze fulo tɨ. (Tɨʼ ɨ Efɛɛz ó Priska bé e Akilas, bé a ka liʼ ɨ.) Fula Pol a fulo tɨʼ ɨ, nye ze to é mpah mɨnjwɨʼla. Bé e l'oYʉden, bé ntɔʼ taare lé etimle mɨlɔb mo Zyɛm. 20Bé ze jwɨʼla e nye ó, nye diʼe tɨʼ molu é bɛabɛa ɛ, nyɛɛ lé ebene. 21No ó, é jɔʼ nye a mʉa é l'esama lɔɔ, to e, nye a lɛɛ ó:#18.21 Myʉʉ mɨnjʉ̌m mɨtila mɨ lwib grɛk myɛɛ, myé elɛɛ ó: «Yé ekʉ jala ó, me toʼ, to di é l'ebʉʼ lé ósyɛɛ é Yerʉsalɛm ɨ.» «ǃƗ Zyɛm si kpɛl nɛʼɛ, me óbula ze.»

No ó nye a ze kable é yʉʉ titima ɨ Efɛɛz, ze tɨ cyen, ntɔʼ to pyal ɨ Sezare. 22No ó, é jɔʼ nye a fulo é titima Sezare e, nye a si to bara e bʉr o mbɛr Zyɛm bé a be tɨʼ#18.22 Yé e bʉʉ odwira o kalara Zyɛm ndɨ egba «Yerʉsalɛm» wâʼ ɛ. ɨ. Pie tɨ, nye ze to Antios#18.22 Nkana Antios yi, yé ó yaa lal Siria.. 23Nye ze ja bwa molu gʉ, ntɔʼ mʉa, to é bɨpeh bɨ lal Galat ndwe e lal Frigia, lé eto le egba ompʉn bɨbɛh nkul é monyʉl#18.23 Pol, nye etaare cyen lɛl ye wâ. Cyen yaa, yé etaare ó Antios, to sie ó ɨ Yerʉsalɛm. (To dwɛʼ Mɨlʉmlʉ 21.17.) Yé a be ó paʼra mbu 53 ndwe e 57..

Apolos lé edwe sikʉlʉ mo Da Yesʉs ɨ Efɛɛz é kpɛŋlɛm, abe e bʉa

24Nuu Yʉden a be ó gʉʼ Efɛɛz, die le Apolos. Nye a byɛl ó, Alɛksandri, nye ntɔʼ ka to di Efɛɛz. Nye a be ó mʉr a be e nkul elwib e bʉr e mokan é lʉo-lʉo e, nye nteme lé ekʉ gʉa Kalara Zyɛm é kpɛhla. 25Nye a si bul dweŋɔ sikʉlʉ é mpʉ mʉr lé edu zi mo Da Yesʉs ɨ. Sikʉlʉ yaa, yé a si kʉ kubla nye é leme. Nye a be nteme ó, lé elɛɛ bʉr lɔɔ lé etiibe e Yesʉs ɨ, le edwe bʉr sikʉlʉ tɨʼ é l'ocɨcyel. Sa gwar, cye yaa yiyɛh, nye a kʉ ka gʉa ó, njɨ yé ó e ndubo mo Yʉanes wé ome. 26Nye ze taare lé elwib é mpah mɨnjwɨʼla oYʉden tʉŋlʉ é kpɛŋlɛm, abe e bʉa. É jɔʼ Priska bé e Akilas, bé a joʼo nye e, bé ze nʉa nye, ntɔʼ kʉ pɛʼle nye zi mo Da Zyɛm, laa mpʉ nye a taare dweŋɔ sikʉlʉ tɨʼ ɨ. 27Pie tɨ, Apolos ze tiʼe é leme we ó, nye laa ó, to lal Akayi. Obɨɔ bɨna ze gba nye nkul é nyʉl, ntɔʼ tile ompʉn o lal waa ó, bé nʉŋa nye mbɨmbɨa. É jɔʼ nye a pyal gʉʼ ɨ, nye ze gba bʉr o b'a jyɛʼ taa buʼo yɔɔ boo Zyɛm ebe ncwɨncwɨa we e, nkul é monyʉl. Apolos a si bul gul be, 28ebe, é jɔʼ nye a pyal ɨ, bé e l'oYʉden, bé a si do é po, nyɛɛ lé entaa be. Nye a si lɛʼle bʉr, duho é Kalara Zyɛm ó, Lœma mulo mo Zyɛm ó ndɨ Yesʉs.

Currently Selected:

Mɨlʉmlʉ 18: ozmBad

Highlight

Copy

Compare