Mɨlʉmlʉ 20

Cyen mo Pol ɨ Masedwan

1É jɔʼ bɨntʉ, byé a sie e, Pol ze baŋle ompʉn. Nye ntɔʼ sil lé etɨe be, ntɔʼ jɛna e be, mʉa, ka to Masedwan. 2No ó, jɔʼ nye a laa gumo yaa ɛ, nye a be ó lé egba ompʉn nkul é monyʉl. Pie tɨ, nye ka ze to é lal Grɛs#20.2 Korɛnt. 3Nye a to di gʉʼ ó, ongɔn olɛl. Nye a jwɨʼ ó, nye ókable é titima, tɨ cyen, ntɔʼ to nko lal Siria. Sa gwar, oYʉden, bé a be ó si kaʼ bɨbla bʉm é lʉ we. Nye ntɔʼ baʼle jwɨʼ ó, nye ófuo fiʼ, lé ebâʼle to Masedwan. 4Sopatros, mwan mo Piros, mʉr Bere, a be ó si liʼle Pol bé e Aristarkus, ndwe e Sekundos, bʉr o Tesalonika. Gaywis, mʉr Dɛrbe, bé e Timote, ndwe e Tisikos, kɛl Trofimos, bʉr o lal Azia, bé a be ó si liʼle nye nteme. 5Bʉr baa ó b'a taare to efoʼ. Bé a ka to bono bɨh ó, Troas. 6É wih paʼ, bɨh bɛɛ, bé a si kable é titima, lé emʉa ɨ Filipi, pie e l'ebʉʼ e Bɨbler ndɨ ebubɔ, agbaŋɔ levure ɨ. Molu motɛn, mé osi laa nɛʼɛ, bɨh ntɔʼ to kœb be é Troas, gumo bɨh bɨbɛh bé a ja sono ntinɨ ɨ.

Cyen epihe mo Pol ɨ Troas

7É dobo e sono#20.7 É lwib grɛk, yé ó «dobo le efoʼ é sono»., bɨh ze syɛŋa gumo gwar lé epuhba mobo. Mpʉ Pol a be ó, nye óto é mɛn tɨʼ ɨ, nye ze yeʼle bʉr mɨlɔb mo Zyɛm, lé ejyɛɛle lwib, to pyal é teme pum. 8Tina, yé ó, bɨh bé a be ó é toloŋo mbɛr, lé egwɨhla é cye lɛl. Molama mɛɛ, mé a be ó é buo é tiʼe mbɛr bɨh bé a be e. 9Nuu ma soho a be ó ndindil é wina, die le Etikwis. Nye kʉ ze to é dwo. No ó, é mpʉ Pol a be si bul ka dulo sikʉlʉ é bɛabɛa ɛ, le mpʉ dwo yé a bul mɛr ma soho nɨ ɨ, nye ntɔʼ fɛbra é cye lɛl é toloŋo mbɛr yaa, duma si é kum. Bé a to kœb nye tɨʼ si ó, muu é bɨʼrɨ, nye osi bɛa dwè. 10Pol ze fulo si, to bubro nye é nyʉl, mɛr nye é mbo, nye ntɔʼ lɛɛ ó: «Ajoʼo ga bʉa. Nye etiʼe!»

11Nye ntɔʼ bâʼle bere, pɛ̂ʼ peh bler, ntɔʼ de. No ó nye a ze bâʼle lwib é buobuo, to pyal é molama mo mɛn. Nye ze mʉa, to. 12No ó bé a to e ma soho waa mbɛr, nye mu lé etiʼe. Bɨbɛh ntɔʼ kʉ filɔ mɨleme si.

13Bɨh bé a si bâʼle kable é titima yé a taare nkɛɛ bɨh ɨ, yé ze to e bɨh Asos, gumo bɨh bé a jala le ebɔma e Pol é l'ebʉm, kɛl nye é titima ɛ. (Yé ó sa nye mʉr tɨʼ a lɛɛ e be ó, bé saʼ ɛ, ebe, nyɛɛ a kpɛl ó, nye cwɨɨ ó tin.) 14É jɔʼ nye a kœb bɨh ɨ Asos ɨ, bɨh ntɔʼ nʉa nye, to e nye é Mwitilɛn. 15É mɛn tɨ, bɨh ntɔʼ pyal kunokuno e dine Kios. Jaŋɔ si. É moho wé a bɔma ɛ, bɨh bé a si laa, pyal ɨ Samos. Bɨh ntɔʼ bâʼle ja si. É moho wé a ka bɔma ɛ, bɨh ntɔʼ pyal ɨ Miletos, 16ebe, Pol a gba cere é leme we ó, nye laa ó laŋa e byɛl, acyɛb Efɛɛz é lal Azia. Nye a bene lé ecyɛb tɨʼ ó, nye amu jaa dimle jɔʼ, aka di ɨ Yerʉsalɛm é l'ebʉʼ e Paŋtekot. Nye a sihle cyen ó, nye pyala gʉʼ é l'epʉla laa, yé óbana wa.

Pol lé ejɛna e l'ocyɛb be efoʼ be Efɛɛz

17É jɔʼ Pol a be é Miletos ɨ, nye a si lomlo mbɛr Zyɛm ndɨ ɨ Efɛɛz ɨ, mompaŋla, lé ebaŋle ocyɛb be efoʼ o mbɛr Zyɛm waa ó, bé toʼ, to bee nye. 18É jɔʼ bé a pyal gumo nye a be e, nye e be ó: «Bɨn bé egʉa mpʉ me a di-di é sama yin é jɔʼ bɨna bé a di-di ga, taare é l'elu le efoʼ me a cyel ebò lam é lal Azia ɛ, to pyal é dobo bɨna bé a bɔʼa ga ɛ. 19Me a sea-sea Da syɛɛ é jɔʼ yiyɛh nɨ ó, lé efil nyʉl si, e myɛɛle é mih, oYʉden bɛɛ lé eto le elam me. Sa yaa ó b'a bul dwe me tuu. 20Bɨn bé egʉa ó, me a baaliʼa lé eyeʼle bɨn é mɨlɔb mimyɛh myé a be e nkul ebe bɨn e nyɔm ɨ. Me a yeʼle-yeʼle bɨn ó, é bɨgumo bʉr lé esyɛŋa-syɛŋa ɛ, ndwe e mɨmbɛr e mɨmbɛr myɛh. 21Me a si boʼlo boo oYʉden, ndwe e bʉr o bɨkul bɨfih ó, bé gwɨma mobebe mɔɔ le edwir mɨleme, lé esa Zyɛm mojoʼo. Bé jyɛʼɛ taa buʼo yɔɔ boo Tî ga wina Yesʉs.

22«To kœb ó, banana, me mu ó lé eze to Yerʉsalɛm é mpʉ Mbɨambɨa Sisim ndɨ etine ó, me saʼ ɛ. Me agʉa yɛɛ sa yé ópyal me gʉʼ ɨ. 23Dam be no, me egʉa ó, njɨ é nkana yiyɛh me lé ecwɨɨ ɨ, Mbɨambɨa Sisim, nye ekʉ bal me ó, me ókaʼɔ e mɨkʉkob, ó me bɔma e mɨtuu e mɨndɛl, 24mɛm yɛɛ lé ebee ó, tiʼ yam, yé abe me dime sɔʼɔ. Nyɔm wam, wé njɨ ó, me fimɨ é duò bɨjʉʉ, to pyal é l'odumo, le efwahle syɛɛ Da Yesʉs a liʼe me e. Syɛɛ yaa, yé ó lé eto le eboʼlo Mbɨambɨa Lɔɔ, waa ndɨ elɛʼle ncwɨncwɨa mo Zyɛm ɨ.

25«Sa gwar me egʉa é bananaʼ ɛ, yé ó: abe e mʉr ngwar é l'esama lɨn óka bâʼle bee me, dam be bɨn bɨbɛh bé a bee me lé elaa-laa paʼra win, lé elɛɛ lɔɔ lé etiibe e jwɨ̀ʼa mo Zyɛm ɨ. 26Ebe no, me eboʼlo muh é dobo lɨʼ ó nɛɛ: ǃɨ nuu mʉr é l'esama lɨn si dim cyecye nɛʼɛ, me óbe ó agʉa lɔb tɨ, 27ebe, me a baaliʼa lé egwih bɨn sa yiyɛh Zyɛm a tiʼe é leme we e. 28Diʼe ga ncye, taare é bɨn bʉr o tɨ, ndwe e Mbɛr-Zyɛm. Mbɨambɨa Sisim a si cyel bɨn é dia obɔʼlʉ é Mbɛr-Zyɛm tʉŋlʉ. No ó, kobla ga daa e bɨntœme, bʉr Zyɛm a siila motié me e be e. 29Me egʉa ó, é jɔʼ me óbe si laa ɛ, bʉr lé enwɨɨla e l'otir o monyan ɨ, bé ópyal-pyal gumo bɨn ndɨ ɨ. Bé aŋa pɨm daa e bɨntœme mo Zyɛm l'asaŋɔ bye ebebe. 30Bʉʉ obuʼla, bé óze e mbʉl é mbɛr Zyɛm win, le edulo ompʉn ó, bé jyɛlɨ e be ɨ diʼ. 31Diʼe ga nkehe. Bɨn bé à toŋlo ó, dam be ó bɨsyɛɛla bin byé a be lé epyɛl me myɛɛle é mih ɨ, me a baakar tuu ebal mʉr ngwar e ngwar é l'esama lɨn, moho e pum, tɔɔ mɨmbu mɨlɛl.

32«No ó, banana, me etimle bɨn é mobo mo Zyɛm. Nyi lɛʼle bɨn ncwɨncwɨa we é zi mokan me. Nye baʼla bɨn e mokan maa. Mé ó e nkul egba bɨn nkul é monyʉl ndwe le edwe bɨn tiʼ molu mo mpoʼ mɨmɛh jwɨʼ gwar e gwar e mɨsaŋ mɨ bʉr be bɨbɛh.

33«Me a baagwɨm nkʉ mɔn, nkʉ gol, nkʉ mɨkan mɨ mʉr. 34Bɨn bʉr o tɨ, bé egʉa ó, me a sea ó e mobo mam mé mʉr tɨ, le esaa sa yé a sa bɨh e l'ofo bam sɔɔlʉ ɨ. 35Bɨsyɛɛla byam bibyɛh, byé a be bɨn ó dweʼle. Yé ekʉ jala ó, bɨn sea syɛɛ é dwiii, le egul bʉr o ndɨ é cyɛʼ ɛ, ebe, bɨna bé etoŋlo ga sikʉlʉ Da Yesʉs nye mʉr tɨʼ a dwe ó: “Le mʉr lé edwe e, le waa lé enʉa ɛ, waa lé edwe ó ndɨ esʉŋɔ mocyɛʼ mo mpom.”»

36Jɔʼ nye a sil lwib no e, bé e bʉr baa bɨbɛh ze kur moboo si, nye ze jwɨʼla e Zyɛm é l'efu lɔɔ. 37Bʉr bɨbɛh ntɔʼ jɨŋɔ modwe, myɛɛle é mih é puba-puba, le ebeŋlɔ Pol, le edu nye momuʼ é mpyɔʼ-mpi-mpyɔʼ. 38Bé a kʉ bul jwɨʼ bé bʉr o tɨʼ nkoo ó, ebe, nye a lɛɛ ó, bé aŋa ka bâʼle bee nye. No ó bé a to liʼle nye, to pyal é gumo titima yé a bono nye e.

Currently Selected:

Mɨlʉmlʉ 20: ozmBad

Highlight

Copy

Compare