Mɨlʉmlʉ 1

Yesʉs lé ekɛʼ mɨlʉmlʉ mye Mbɨambɨa Sisim

1Tamamʉr Teofil, é kalara efoʼ me a taare tile go e, me a si lɛɛ sa yiyɛh Yesʉs a sa ndwe le eyeʼle, duho é l'etɔɔrʉ, 2to pyal é moho nye a bɨnɔ é jobo kʉ ɨ. Nye l'apa to é jobo kʉ, nye a si cyel mɨpɛha mɨlʉmlʉ mye mompene é zi mo Mbɨambɨa Sisim. 3É jɔʼ nye a be si sia e mɨtuu ɨ, nye a si lɛʼle mɨlʉmlʉ mye bɨsyɛɛla ndwe e bɨdweʼle é buobuo, lé elɛʼle mye ó, nye a kʉ be ó kublakubla. É molu mowʉm monâ, bé e boo nɔɔ ó b'a be-be e, nye a be ó lé elɛɛ-lɛɛ be mɨlɔb mɨ jwɨ̀ʼa mo Zyɛm. 4Guu moho é jɔʼ bé e boo nɔɔ, bé a be lé ede e, nye a si cyel be mpene ó: «Apʉʼa ga Yerʉsalɛm, to jaabe. Bɨn bé à bono sa Sɔŋ wam a kɛʼ bɨn ɨ. Yé ó sa me a lɛɛ bɨn ɨ, 5ebe, Yʉanes a dù-dù bʉr ó e modibe. Yi liʼ njɨ bwa molu abuo, bɨn bɛɛ, bé ónʉa ndubo ó, é Mbɨambɨa Sisim.»

Eto e kʉ mo Yesʉs

6No ó, é jɔʼ bé a be, bé mu bé ome e, bé ze dî e Yesʉs ó: «Da, zê é jɔʼ yiʼ ó go óbâʼle cyel jwɨ̀ʼa Ɨzraɛl cyecye ɛ?» 7Yesʉs ntɔʼ bɨha e be ó: «Bɨn bé ajala le egʉa bɨjɔʼ le mɨmbu Sɔŋ wam ósa bɨsyɛɛla bye tɨʼ ɨ. Nye ó b'a cyel bɨjɔʼ byaa e nkul we nye mʉr tɨ. 8Bɨn bé óbi nkul é jɔʼ Mbɨambɨa Sisim wé ófulo bɨn é monyʉl ɨ. No ó, bɨn bé óbe ó oboʼla o lɔb wam, taare ɨ Yerʉsalɛm, le mokwar mo Yʉda mɨmɛh, ndwe e maa mo Samari, to pyal é modumo mo si mɨpaʼ mimyɛh.»

9Jɔʼ Yesʉs a sil lɛɛ mɨlɔb myaa ɛ, nye ze bɨnɔ é jobo kʉ é mih mɔɔ. Mɨnkur ze buuro nye. Nye ntɔʼ dim be é mih.

10Ngbaa le eka be, bé dina lé edwɛʼ kʉ é tʉʉʉŋ, lé ebee mpʉ Yesʉs a be lé eto nɛʼɛ, bé ka twɨra ó, bʉrʉm oba e mɨkan é pan-pan é pumo-pumo, bɨ pyal be! 11Bʉr baa ntɔʼ lɛɛ e be ó: «Bʉr o Galɨle ee! Ebe yé bɨn lé ecyɛb naa, lé edwɛʼ jobo kʉ ɨ? Yesʉs, mʉr pɛʼɔ é l'esama lɨn ɨ, nye óbula ze ó, mbi ngwar e ngwar bɨn bee nye lé ebere é jobo kʉ nɨ.»

12Mɨlʉmlʉ, myé ntɔʼ taare lé ekɔa ecwɨʼ bé lé ejebe ó, Ecwɨʼ le olivye e, ze toŋɔ ɨ Yerʉsalɛm. Cyen yɔɔ yaa, yé a be ó kwoʼ be kilmɨra ngwar. 13É jɔʼ bé a pyal gʉʼ ɨ, bé ze bere é tiʼe toloŋo mbɛr bé a di ɨ. Bé a be ó: Pyɛr, Yʉanes, Jacques ndwe e Andreas, Filip ndwe e Tomas, Bartelemi ndwe e Mataos, Jacques, mwan mo Alfe, Simɔn, mʉr a jebɔ ó, Mʉr ndɨ ekamle e bʉr o lal ɨ, ndwe e Yʉdas, mwan mo Jacques. 14Mɨleme, myé a be ó be é ntɨɨɨŋ ó, bé gbaʼ monyʉl é syɛɛ mɨnjwɨʼla. Tɨʼ yé a be ó le obuʼla o bʉba, le Maaria, nyɔŋ mo Yesʉs, ndwe e l'obɨɔ mo Yesʉs.

15É jɔʼ yaa, mpʉ obuʼla bé a syɛŋa, kwoʼ be bʉr nter e bʉr mowʉm moba (120) ɛ, Pyɛr ze mʉa si, cyɛb teme ntuntuma bʉr nɨ. Nye ó: 16«Obɨɔ ga bam aa! Yé a kʉ jala ó, yé syɛŋɨ lé edira lɔɔ ndɨ tila é Kalara Zyɛm ɨ! Peh Kalara Zyɛm yaa, yé a tilɔ ó, mpʉ Mbɨambɨa Sisim a bɛa lɛɛ bɨna ga é nʉm mo David ɨ. Nye a tile ó, é lɔb mo Yʉdas, waa a lɛʼle bʉr mpʉ bé toʼ, to naʼ Yesʉs mobo é nyʉl ɨ. 17To kœb ó, nye a be nteme ó mʉr ngwar é l'esama ga lɨna, lé ebi nkɔb é syɛɛ lʉmlʉ ga yina yi.»

18Tina, yé ó, é mɔn Yʉdas a bi tɔɔ myɛna duho é syɛɛla ozyɛhozyɛh ye e, nye ze to bwam peme. É peme gwar yaa, nye ze duma si mbumbur, mo we ntɔʼ bʉl, bɨsa bɨ mo bibyɛh kʉl é lɛʼ-lɛʼ si e si. 19Bʉr o Yerʉsalɛm bɨbɛh, bé a si joʼo lɔɔ efie laa. No ó bé a ka jwɨr peme yaa die é lwib yɔɔ ó, Akɛldama. No, yé ó Peme motié.

20Pyɛr ze lɛɛ nteme ó: «Ebe, yé ó tila é Kalara OSam ó:

“Mbɛr we, wé liʼɨ fo.

Mʉr ayi ka nyamle di tɨ.”»

«Yé nteme, yé ó tila ó:

“Mʉr fih, nye nʉŋa dia mbɔʼlʉ Mbɛr-Zyɛm nye a taare be e ye e.”

21-22No ó yé lé ejala ó, nuu mʉr é l'esama e bʉr ga lɨna baʼra e bɨna ga, mɨlʉmlʉ. Nye nteme toʼ le eboʼlo ó, Da Yesʉs, nyi pàh. Mʉr waa, nye ejala le ebe ó, mʉr sama yé a kœʼ e Da Yesʉs ɨ. Nye beʼ mʉr sama ga yina, taare é jɔʼ Yʉanes a dù Yesʉs é dibe Yʉrdɛŋ ɨ, to pyal é jɔʼ nye a bɨnɔ é sama ga yina ɛ.»

23Bé ze pɛh bʉr oba: nwaʼ a be ó, die le Yoseb, waa bé a jwɨr Barsabas ɨ. (Lʉʉ die le, lé ó Yʉstʉs.) Nuu, le die Matias. 24No ó bʉr o gwɨhla bɨbɛh, bé a ze jwɨʼla e Zyɛm, lɛɔ ó: «Da, go ó lé egʉa mɨleme mɨ bʉr bɨbɛh. Lɛʼla bɨh é sama bʉr oba ba, waa go a pɛh ɛ, 25ebe, yé ekʉ jala ó, ngwar tɨʼ nʉŋa dia lʉmlʉ mo Yesʉs, yaa Yʉdas a dimle lé eto kœb dia yé a jala e nye e. Nyiha óto e syɛɛ lʉmlʉ dolo.» 26No ó bé a ze sa mpʉbla, mpʉbla waa ze lɛʼle ó, Matias ó jala le enʉa dia lʉmlʉ. No ó bé a ka ze nʉa nye mpʉ mʉr a jala le ebaʼra e l'esama e mɨlʉmlʉ ewʉm e ngwar ɨ.

Currently Selected:

Mɨlʉmlʉ 1: ozmBad

Highlight

Copy

Compare