Mɨlʉmlʉ 2

Epyal mo Mbɨambɨa Sisim

1É jɔʼ ebʉʼ e Paŋtekot#2.1 «Ebʉʼ e Paŋtekot», lé a be ó ebʉʼ e mɨngol. Yé a pyal-pyal ó, ebʉʼ e Paska oYʉden, lé osi laa e molu mowʉm motɛn., lé a pyal ɨ, obuʼla bɨbɛh, bé a be ó zyɛŋa, gumo gwar. 2Cye e cye yaa, bwaʼbwaʼ duu ze duho é jobo kʉ, nwɨɨla e duu nkuo lé ekuulo e nkul ɨ. Yé a si dibe mbɛr waa wiwɛh, gumo bɨbɛh, bé a be ondindil ɨ. 3Bé ka dwɛʼ nɛʼɛ, bé bee ó, byʉʉ bɨsɔʼɔ, nwɨɨla e bwa mɨnjʉl mɨ siʼe. Byé ntɔʼ myɛma, to le ecyɛb bɨbɛh é mɨlʉ kʉ. 4Bɨbɛh, bé a be ó, bé mu lwɨŋla e Mbɨambɨa Sisim. Bé ntɔʼ taare lé elwib bɨlwib bɨfih, byaa Sisim waa, wé a dwe be nkul ó, bé lwibɨ ɨ.

5Tɨʼ ɨ Yerʉsalɛm, yé a be ó e l'oYʉden bé a be lé edwaabe Zyɛm ɨ. Bé a byɛl ó, é mɨlal mimyɛh ndɨ é si nwaʼ ɛ. 6É jɔʼ bé a joʼo duu yaa ɛ, bé ze fwal gumo gwar, mɨnʉm mɨmbeʼ, ebe, mʉr nyiwɛh é sama yɔɔ a si joʼo lɔɔ Zyɛm é lwib ye! Myé a cwɨɨ ó, é zi nuu mbuʼla lwib fih. 7Bé a si laŋle jehe mɨnʉm mɨmbeʼ. Bé ó: «Bʉr bɨbɛh lé elwib ba, bé ntʉʼ bʉr o Galɨle? 8Yé be no nɛʼɛ, a, ebe yé mʉr nyiwɛh é sama ga yina mu lé ejoʼo bé lé elwib é lwib nye mʉr tɨʼ a byɛl ɨ? 9É sama ga yina yi, yé é buo bʉr o b'a duho mɨlal e mɨlal ɨ: baʼ duho é lal Partia, bé e waa Med, e Elam, ndwe e waa Mezopotami, ka kɛl lal Yʉda, le waa Kapadosia. Bʉʉ duho é lal Pɔŋtos, bé e waa Azia#2.9 Die e Azia, lé etwar lal wé a be é Rom ɨ. Yé a be ó é lal bɨna mu lé ejebe ga Turquie ɨ. , 10le waa Frigia, le waa Pamfilia, le waa Egipten ndwe e bʉr o Libi, baa b'a duho é nkana Sirɛn ndwe e bɨnkɔra bɨ nkana yaa ɛ, ka kɛl ojyoo bé a duho é nkana Rom ɨ, 11baʼ, bé ó oYʉden, bʉʉ, bʉr o bɨkul bé a ni é buʼo ga yina ɛ. Yé nteme, yé ó e bʉr o dine Krɛt le baa o lal Arabi. Sa jehe, yé ó, bɨna ga bɨbɛh, bé ejoʼo be lé elwib é bɨlwib ga bina, tiibe e bɨsyɛɛla bɨnɨnɨ mo Zyɛm!»

12Bɨbɛh, bé a si jehe, aka gʉa ndumlo tɨ. Bé ntɔʼ dîila paʼra wɔɔ ó: «Wáa mbi lɔb wi?» 13Sa gwar, bʉʉ, bé a be ó lé ekpeʼle obuʼla. Bé ó: «Bé mu ó lé efwaʼ monwoʼ!»

Tɔɔlʉ mo Pyɛr

14No ó Pyɛr a ze cyɛb cɨcyel, bé e l'esama le ompʉn ewʉm e ngwar. Nye ze bɨn twii kʉ, ze lɛɛ e ntuntuma bʉr yaa ó: «Bɨn bʉrʉm o lal Yʉda ɔɔ! Bʉr bɨbɛh lé edi ɨ Yerʉsalɛm ba ɔɔ! Gʉŋa ga lɔb wiʼ ɔɔ! Bɨn bé à kʉ gʉa joʼlo sa muno ze lɛɔ bɨn yiʼ ɔɔ! 15Bʉr o bɨn lé ebee ba, bé afwaʼ monwoʼ, mpʉ bɨn lé ejwɨʼ nɨ. Dobo, lé dina ó, mowala bu mo mɛn. 16Lɔɔ ngwiha mɨlɔb Joël a bɛa lɛɛ ɛ, wi dira muh. Nye a lɛɛ ó:

17“Zyɛm a lɛɛ ó:

‘É molu mé ófuʼla ɛ, me ólomlo bʉr bɨbɛh Mbɨambɨa Sisim.

Nye óbe ó, é be. Bwa o bʉba le bwa o bʉrʉm bɨn, bé ógwih mɨlɔb myam.

Mɨsoho min, myé óbee mɨfela bɨsɔʼɔ.

Mɨnjʉ̌m min, myé ójɨm bɨlima.

18Eee, me ólomlo be Mbɨambɨa Sisim, osyɛl o mosa bam,

bʉba le bʉrʉm, é molu maa.

Bé ógwih mɨlɔb myam.

19Me ósa bɨsa bɨ jehe é jobo kʉ le bɨdweʼle bɨ nkul wam é si nwa.

Motié, bé e siʼe e dwine bɨduulʉ, byé ónyin.

20Myɛn dobo, wé ólihba edurʉ.

Alomo óbe ó é zʉʉŋ mpʉ motié.

Bɨsa byaa, byé óbɛa syɛɛ ó, dobo le etiʼ e mɨlɔb mo Da Zyɛm, lé l'apa pyal.

Moho waa, wé óbe ó moho nɨnɨ le moho kum.

21É jɔʼ yaa, mʉr nyiwɛh ósa mɨnjwɨʼla é die mo Da ɛ,

nye óbi tiʼ molu mo mpoʼ mɨmɛh.’”

22«Mbɛngɛɛ! Bɨn bwa b'Ɨzraɛl ɔɔ! Zyɛm a be ó si bɨlan e Yesʉs, mʉr Nazarɛt, lé esa mosima e bɨsa bɨ jehe ndwe e bɨdweʼle bɨ nkul we é mih mɨn. Zyɛm a sa bɨsyɛɛla byaa é mobo me no ó, nye nkʉʼ lɛʼle bɨn mbi mʉr Yesʉs a be e. Bɨn bé ekʉ gʉa no. 23Zyɛm a bɛa gʉa ó, bɨn bé ókɛha nye é mobo mo bʉr o ndɨ entaa motie e. Bɨn bé a kʉ du ó, mpʉ nye a bɛa tiʼe é leme we e. Bé ze cyèl nye é klos kʉ, jʉŋɔ nye. 24Zyɛm ze pɛ̀h nye é foo, pɛʼ nye é mokpaa mo efie, ebe, efie, lé a baabe e nkul mɛr nye é bɛabɛa, 25ebe, David a tile, tiibe e nye ó:

“Me a be ó lé ebee Da bɨjɔʼ bibyɛh e mih mam.

Nye efuʼo me, é mbi ndɨ ó, me l'apɨn,

ebe, nye emɛr me é mbo ejʉm.

26Ebe no ó leme wam lé eloŋlo e bɨsʉhʉ ɨ.

Mokan mam nteme, maa bɨsʉhʉ.

Leme wam, wé óloŋlo e mbɛla,

27ebe, go ákwoʼ bir sisim wam kwar odwè.

No nteme, go aŋa mɛʼle ó,

Mʉr go ndɨ ti ɨ, boʼ é foo.

28Gɨ taare lɛʼle me mozi me lé ejala le ecwɨɨ tɨʼ ɨ.

Go óloŋlo leme wam e bɨsʉhʉ é jɔʼ bɨna bé ódi gumo gwar ɨ.”»

29Pyɛr ze ko tɨʼ ó: «Obɨɔ ga bam aa! Me paʼ kʉ gwih bɨn ocyecye é kpɨbɨbɨ é lɔb mpam ga yina David. Nye a si dwè, debe. No ó, foo we, nye dina ó tɨʼ lé enyin, ze pyal é muh é dobo lɨ. 30É mpʉ David a be ngwiha mɨlɔb ɨ, nye a be ó lé egʉa ó, Zyɛm a si kɛʼ, le ede mɨnkɛla ó, nye ópɛh nuu mʉr é mpoŋbʉr we, dil nye é dia taʼa ye. 31David a si bɛa bee sa yé a be ó, yé ópyal ɨ. No ó nye a ze lɛɛ lɔb epàh e foo mo Lœma mulo mo Zyɛm ɨ. Yé a be ó é jɔʼ nye a tile ó:

“Nye a baabirɔ kwar odwè.

Ebe no ó bɨpuno bye, byé a baabo e.”»

32Pyɛr ze ko tɨʼ ó: «Mʉr Zyɛm a pɛ̀h é foo nɨ, ó ndɨ Yesʉs. No ó, bɨh bɨbɛh, bé ó oboʼla o lɔb we waa. 33Nye a si bere, to di si é mbo ejʉm mo Zyɛm. Nye ó b'a ntɨh bɨh Mbɨambɨa Sisim, waa Zyɛm Sɔŋ a kɛʼ bɨh ɨ. Wé ó bɨn lé ebee le ejoʼo e. 34Yé ó no, ebe, ntʉʼ David nye mʉr tɨʼ a bere kʉ. Nye a lɛɛ ó#2.34 Dwɛʼa Sam 110.1.:

“Da a lɛɛ e Tî wam ó:

‘Diʼe si wâ, é mbo ejʉm wam,

35to pyal é jɔʼ me ósa bʉr o dɔm bo ó,

bé diʼe cyela mokʉ mo e!’”»

36Pyɛr ze ko tɨʼ ó: «Bʉr o ndɨ kaʼ é lal Ɨzraɛl ɨ, bé ejala le ekʉ gʉa lɔb wi: mʉr bɨn bé a cyèl é klos kʉ ɨ, die le Yesʉs, nye ó waa Zyɛm a cyel é dia Tî ga wina le é dia Lœma mulo mo Zyɛm!»

37Njoʼa bʉr, bé a joʼo mokan maa ɛ, mɨleme myɔɔ, myé ntɔʼ loŋlo e bʉa ndwe e l'empime. No ó bé a dî e Pyɛr bé e myʉʉ mɨlʉmlʉ ó: «Obɨɔ bɨh! Bɨh bé ejala le eka sa yé?» 38No ó Pyɛr a bɨha e be ó: «Gwɨma ga mobebe mɨn. Bɨn bé à dwir mɨleme. Mʉr nyiwɛh é sama yin, nye nʉŋa ndubo é nkul die mo Yesʉs-Krɨst, ó Zyɛm pɛʼɛ nye bɨbaa nye lé eniʼe é lɔb mɨsyem mye e. No ó bɨn bé òka ntɨhɔ Mbɨambɨa Sisim, sa Zyɛm a bɛa kɛʼ bɨn ɨ, 39ebe, Zyɛm a kɛʼ ó, bɨn e bwan bɨn, ndwe e baa bɨbɛh ndɨ é l'ejaa ɛ, ze pyal é baa bɨbɛh Sɔŋ ga wina Da Zyɛm ójebe e.»

40Pyɛr ze bâʼle boʼlo be myʉʉ mɨlɔb é buobuo, to le egba be nkul é monyʉl. Nye ó: «Kpɛŋɨ ga efie! Syɛhla ga ozyɛhozyɛh o bʉr o mya wi.» 41Buobuo bʉr é sama yɔɔ, bé ntɔʼ mɛʼle sa Pyɛr a lɛɛ ɛ, ntɔʼ nʉa ndubo. É moho waa, bʉr kwoʼ be otɔɔyin olɛl, bé a si ni é l'esama le obuʼla.

Tiʼ mbɛr Zyɛm wé a be ɨ Yerʉsalɛm ɨ

42Bé a be ó lé ekʉ gba monyʉl é jɔʼ yiyɛh lé eto joʼlo sikʉlʉ mɨlʉmlʉ myé a dwe-dwe be e. Bé a di-di nteme ó, é zyɛŋa-mɨleme tʉŋlʉ, le ede-de nteme gumo gwar, le ejwɨʼla-jwɨʼla e Zyɛm. 43Bɨbɛh bé a si joʼo bʉa lé ebee mpʉ Zyɛm a bɨlan e mɨlʉmlʉ lé esa bɨsa bɨ jehe, ndwe e bɨdweʼle bɨ nkul we le mosima ɛ. 44Obuʼla bɨbɛh, bé a ka sa ó, sama gwar; baʼlɔ-baʼlɔ mobi mɔɔ zyɛŋa. 45Bé a si bɛma mosi mɔɔ ndwe e mobi mɔɔ, ze kablɔ bɨmɔn bɨ tɨʼ paʼra wɔɔ, mʉr nyiwɛh nʉa-nʉa bim lé ejala e nye e. 46É dobo lɨlɛh, bé a si to dolo lé egwɨhla é jahla bii mo Zyɛm tʉŋlʉ. Go ó, é mɨmbɛr myɔɔ, bé a be-be ó lé epɛ̂ʼla bler, le edeŋɔ mode mɔɔ, mɨleme myɔɔ, myé osi loŋlo e bɨsʉhʉ byé a duho be é mɨmo si ɨ. 47Bé a be ó lé edwe Zyɛm kum. Bʉr bɨbɛh, bé a be ó lé eseʼle be. É dobo lɨlɛh, Da a be ó lé edwe bʉr tiʼ molu mo mpoʼ mɨmɛh, le eko be é mbɛr Zyɛm wɔɔ.

Currently Selected:

Mɨlʉmlʉ 2: ozmBad

Highlight

Copy

Compare