2 Korɛnt 13
13
Motɨɨ é nko paʼ osyɛl be ebebe
1Yé mu ó jɔʼ lɛl me muno ze pyal gʉʼ bɨn ye e. Yé ó tila ó: «Lɔb wiwɛh, wé ókʉ tiʼɔ ó, njɨ ebe bɨlwib bɨ oboʼla oba, nkʉ olɛl.» 2Me a si taare bal bɨn é cyen mba é jɔʼ bɨna bé a be ga ɛ. Me ebâʼle bal bɨn é jɔʼ bɨna ga dina é ncɛra ó: ǃme si bâʼle ze nɛʼɛ, me aŋa kamle e mʉr ngwar é sama bʉr o dina lé esa syem mpʉ bé a bɛa sa mɨsyem é molu pihe e. Me aŋa kamle e baa dina lé esa syem ɨ. 3Mbi zea waa, wé ó ngo be dweʼle bɨn lé egwɨm bee, yaa yé ólɛʼle bɨn ó, Krɨst ó ndɨ ekʉ lwib é zi wam. Krɨst, nye acyɛʼ é nko paʼ win! Nye ekʉ bul lɛʼle bʉr o mbɛr Zyɛm win nkul we. 4Yé cyecye ó, nye a si bomlɔ e mosen, bɨnɔ é klos kʉ ebe ecyɛʼ le. Sa gwar, nye mu ó lé etiʼe é nkul mo Zyɛm. Banana, bɨh bé é cyɛʼ é zyɛŋa wih boo Krɨst. Sa gwar, ebe nkul mo Zyɛm, bɨh e boo nɔɔ, bé ótiʼe é nyɔm win.
5Pahla ga bɨn bʉr o tɨ, bɨn beŋɨ nkʉ bɨn dina ó lé ejyɛʼ taa buʼo yin boo Zyɛm, nkʉ bɨn bé aka sa no. Bɨn bʉr o tɨ, saŋa egʉa ga nkʉ bɨn bé ekebe moveʼle le entaa mobʉbla. Zê bɨn bé agʉa ó, Yesʉs-Krɨst ó ndɨ é bɨn ɛ? Yé be ó, yé abe no nɛʼɛ, gʉŋa ga ó, bɨn bɨ ku moveʼle maa. 6No ó, leme wam, wé ó lwɨŋla e mbɛla ó, bɨn bé óbee, le egʉa ó, bɨh bé aku moveʼle maa. 7No ó, bɨh bé ejwɨʼla e Zyɛm ó, bɨn beʼ l'asa syɛɛla ebebe gwar. Me abul gwɨm ó, bʉr beŋɨ ó, bɨh bɛɛ, bɨ bi mokebe. Bé dam ka bee bɨh ó, bɨh bɨ ku moveʼle, me egwɨm ó, njɨ bɨn saʼ mɨmpaŋ bɨsyɛɛla. 8Ebe, bɨh bé abe e nkul esa Zyɛm mongan, aboʼlo ocyecye we. Nkul wih, nye ó njɨ é nko paʼ elɛɛ ocyecye. 9Bɨh bé esoho é jɔʼ bɨh lé enyin bɨcyɛʼ-bol, bɨn bɛɛ mɨlɨl-nkul ɨ. Lʉ ekan é mɨnjwɨʼla mih, wɛɛ, wé ó, bɨn gʉa kwɨmlɨ mbɨmbɨa. 10Ebe no ó me mu lé etile bɨn bɨsa bɨnɨ cye yiyɛh me l'apa ze gʉʼ bɨn ye e. Yʉʉ jɔʼ, é jɔʼ me óze gʉʼ bɨn ye e, me aŋa kœb sa yé ósa ó, me lɛʼla bɨn nkul mojwɨ̀ʼa wam ɨ. Da Yesʉs a dwe me nya ó, me gbaʼ bʉr nkul é monyʉl, abe ó, me biʼe nkul waa njɨ é l'efu le elɨr be lɨrɨ.
Moswɨhlɨ
11Obɨɔ ga bam aa! Sa me óka tile bɨn é l'epihe e, yé ó nɛɛ: diʼe ga mbɨmbɨa. Dɨʼe komla ga paʼra win. Dɨʼe gba ga nkul é nyʉl mo mɨɔ nyiwɛh paʼra win. Dɨʼe toŋlo ga sa gwar. Tiʼa ga é motala. No ó Zyɛm lé eze bɨna ga e ncwɨncwɨa ndwe e motala ɛ, nye ódi e bɨn. 12Swɨhla ga mbɨmbɨa paʼra win, lé edwiila momuʼ ndwia ndɨ ti ɨ. Mɨsaŋ mɨ bʉr mimyɛh, myé esoho bɨn.
13Ncwɨncwɨa mo Da Yesʉs-Krɨst, e kpɛl mo Zyɛm Sɔŋ ndwe e zyɛŋa-mɨleme mo Mbɨambɨa Sisim, byé diʼe e bɨn bɨbɛh.
Currently Selected:
2 Korɛnt 13: ozmBad
Highlight
Copy
Compare
Share
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
